Psalms 35

Chin (Mara Bible RV (BSI))

← Chapter 34 Jump to: Chapter 36 →

1Hy Abeipa, nâ chakhiatuhpazy chakhia la, Nâ dyuhtuhpazy a dyuh mah y!

2Vyhphao laipa nata vyhphao chyhpazy a chaba la, Na bao awpa ta thyu mah y!

3Asei nata seichhi zy phia la, Nâ chadaituhpazy pakhâ mah y! Ei hrona hnohta, “Na pachhana ei châ,” tah mah y!

4Ei hrona pahlei a chhuahpazy cha, Nozapa nata maophyuhpa ta y ei sala; Ei chô liata chhiena tao a chhuahpazy chhao, Kua ei sala hnabeidypa ta y mawh ei sy!

5Thlih ta sâh sihpa a phaopa hawhta châ ei sala, Abeipa vâlyuhchâpa ta âmo cha papua mawh sy!

6Ama lâpi zohpa ta pahnia sala, Abeipa vâlyuhchâpa ta âmo cha a chadai mawh sy!

7A chhâpa y leipa ta ama sao na chôkhâh ei ta, A chhâpa y leipa ta ei hrona he khaohtlô ama chao khâh.

8Â pachyh vei nota raona ta vaw tlô thlupa ta, A sao chôpa liata anosasyh a ao sala, Cha liata tlasao mawh sy!

9Chatawhcha Abeipa liata ei hro a ly aw ta, A pachhana liata a tha a pha aw.

10Ei rupa zydua ta, “Hy Abeipa, nâ hawhpa he ahy ma a y?” tah ei ta, “Thatlôpa tawhta dyhchhiepa a pachhatuhpa, Âmo a hraotuhpa tawhta dyhchhiepa nata phahlapa a pachhatuhpa cha, Ahy ma a y tly?” ama tah aw.

11Pahnokheituhpa pakheipazy thyu ei ta, Ei pahno beih leipa hmozy eina hiahri ei.

12Phana cha chhiena ta na thô ei ta, Ei hro rie a thei ngaita.

13Âmo ama pasa tita deikua cha, Latho poh a bu na ta; Kâhvileipa ta pasataopa ta, Ei luh a khupa ta thlah ei chhâ tyh.

14Ei viasa nata ei unawh zy ei taokheipa hawh ei ta, Âmo cha taokhei laih ei na ta, A nô châta chaphôh a tupa hawhta, A bôh na ta mâchhie ei sapa tyh ei.

15Âmo deikua cha ei chapiana liata, Thaphapa ta a hmaohpakhy ei ta; Keima tei awpa ta ei pahno leipa ta a hmaohpakhy ei ta, Bâh leipa ta eina taochhie ei.

16Kyhchhi nota chyhsa a pachhie tyhpazy hawhta, Ama hâhzy eina charieh chie ei.

17Hy Abeipa, khati taih ma na mo thlâh ha aw tly? Ei thlahpa he ama paraona tawhta pachha la, Ei hrona sôhpa he chakeibarôhneipazy tawhta pachha mah y!

18Pakhypi rônahpa liata alyna bie cha hlâ aw na ta, Chyhsa hluhpi hry liata ei cha reithai aw.

19A chhâpa y leipa ta nâ khakhaipazy cha, Ei chô liata hmo a tlôpa vâta amâ ly awpa pasaih leipa la; A chhâpa y leipa ta nâ haotuhpazy chhao, Eina mopasih awpa ei pasaih khah y.

20Adyhna bie reih leipa ei ta, Râh liata a y molo thlâh hapazy lâ a heih ei ta, Âmo dôvei nawpa biezy tlao ama pachâ tyh.

21Ama pakah na â chie ei ta, “Khawh, khawh, eima mo ta a hmô haw,” ama tah tyh.

22Hy Abeipa, hmô ha chi ta, A chalih khah y! Hy Abeipa, rie nâ hla khah y!

23Ei Khazohpa nata ei Beipa, Ei bie a duakhei ta thai na pachâsa awpa ta, A hra la, thyu mah y!

24Hy Abeipa, ei Khazohpa, Na sianazie lymâ hawhta thai na pachâsa la, Ei chhiena liata amâ ly awpa pasaih khah y!

25Ama palôh liata, “Khawh, eima khopa eima hmô ha hih!” Ama tah awpa pasaih leipa la; “Eima palâ khai haw,” Ama tah awpa chhao pasaih khah y.

26Ei chhiena liata a lytuhpazy cha, Maophyuhpa nata hnabeidypa ta y ei sala, Nâ palai thlupazy cha, Hmiachhiena nata nohzaona ta tobipa châ mawh ei sy!

27Ei thaichâna nâ lykheituhpazy cha, Thaphapa ta awh ei sala, “ Abeipa cha rônah ta, Ano a chakaotuhpazy hlaotlohna ama to tita, A ly kaw tyhpa a châ,” tahpa ta, Thaphapa ta khâ awh mawh ei sy.

28Chatanachata ei paleih ta na siana bie chho aw ta, Noh y ta ei cha reithai aw.

← Chapter 34 Jump to: Chapter 36 →