Psalms 78

Chin (Mara Bible RV (BSI))

← Chapter 77 Jump to: Chapter 79 →

1Hy ei phopi, ei pachuna nathlie la, Ei pakah biezy lâta na nah pachôh mah y!

2Pakhona bie hmâpa ta ei pakah â aw na ta, Hlâno tawhta bienyupazy ei reih aw.

3Miah pathlatuhpazy ta miah chho ei ta, Thei pi ta eima pahnopa biezy ei reih aw.

4Ama pathlazy phih leipa aw pi ta, Chhâ a vaw y awpa hnohta tlao eima chho aw; Abeipa hmotao rônahpa nata a thatlônazy chho aw pi ta, Hmonoâhpa a taopazy eima chho aw.

5Zakaw châta bieraopa padua ta, Izarei châta ryhpa a tao; Ama pathlazy pachu awpa ta, Miah pathlatuhpazy hnohta bie a pie ei.

6Chatanachata chhâ a vaw y awpazy ta pahno aw ei ta, Hawti a pih mâh leipazy chhao ta vaw pahno aw ei ta, Thyu aw ei ta ama pathlazy ama chho pachhuah lymâ aw.

7Ama hnabeiseihna Khazohpa liata pahnieh aw ei ta, Khazohpa hmotaopazy my leipa ta, A biepiepazy ama zyh lymâ aw.

8Âmo pathlatuhpazy hawhta, Chhorupa nata dyuhtuhpa châ leipa aw ei ta, Palôh a i leipa chhâ lyu leipa aw ei ta, Khazohpa châta thlahpa ngâchhih leipa hawhpazy châ aw veih ei.

9Epharai mo cha libaw a chaba ei ta, Châhrasala adyuhna noh liata hnôh amâ sy haw.

10Khazohpa biehrai zyh leipa ei ta, A ryhpa lâpi a chhih veih ei.

11A hmotaopazy my ei ta, Hmonoâhpa a pahmôsapazy chhao ama my haw.

12Ama pathlatuhpazy mohmô ta hmonoâhpazy tao ta, Izi râh Zônâ lyuzy liata hmonoâhpazy a taopa ei.

13Tilaipi pachhaihpa ta âmo cha pasiesa ta, Tizy toh ta a chalihsa.

14Nohchhô ta meihdo ta âmo chhihtha ta, Zâ ta mei khaihpa ta a chhihtha ei.

15Râhchawhpa liata lôpanôzy patlaw ta, Tilih athupa ti hawhta, Doh awpa hluhpi a pie ei.

16Lôpanô tawhta vahtiezy papua ta, Vahpi tizy hawhta a palosa.

17Chatanachôta a chô liata molei via rili ei ta, Chônôchaipa cha râhchawhpa liata amâ dyuh.

18Ama palôh ta Khazohpa pasia ei ta, Ama aohkhopa pati amâ hnaw.

19Khazohpa reipachhie ei ta, “Khazohpa ta râhchawhpa liana heta, Tlâhkhai â chhuahdy thei tlai aw ma?

20Lôpanô tu ta tizy vaw puapa ta, Vahtiepazy kao a khô pathlah. Viahchhâ chhao miah piepa ta, A phopi nie awpa sa miah a pie thei tlai aw ma?” ama tah.

21Chavâta, cha biezy cha Abeipa ta a thei nahta, A pathi ia ngaita ta; Zakaw cha mei ta vaw pua thlu ta, Abeipa hiehâhna ta Izarei cha a thyuhnao.

22Khazohpa a ngiapâ leipa ei ta, A pachhana ama ngâ leipa vâta, Cha hmo cha ama chô liata a tlôpa a châ.

23Chatahrasala chô lâ avâzy khi biepiepa ta, Vârâh ochhizy pahy ta;

24Ama nie awpa mânâ ama chô liata za pasuasa ta, Vârâh sâh a pie ei.

25Vâlyuhchâpazy viahchhâ cha chyhsazy ta nie ei ta, Khazohpa ta nie awpa hluhpi a za pathlapa ei.

26Avâzy liata nochhi thlih pathlisa ta, A hmotaotheina ta chho thlih a pathlisa.

27Dohlei hawhta ama chô liata sa pasuasa ta, Tilaipa sadi hawhta mathlaw hneipa pavawzy a pasuasa.

28Ama riehmo liah liata patlasa ta, Ama pahrâna zydua liata a patlasa.

29Ama aohkhopa a piepa vâ ei ta, Nie ei ta rihbiepa ta ama y.

30Châhrasala ama aoh lôhrâ tlô hlâta, Ama pakahzy liata pati a y thlâh chy nota,

31Khazohpa hiehâhna ama chô liata vaw tlô ta, Ama chyhsa thatlô chaipazy thie ta, Izarei satliazy a tusao ha ei.

32Cha zydua cha amâ tyhpa chhao ta, Molei ngâ thlâh chy ei ta; Hmonoâhpazy a taopa chhao ta, Zo hlei veih ei.

33Chavâta ama nohzy cha, Hu ei kha sopa hawhta a lei awpa ta tao ta; Ama kôzy chhao, China ta kô châh a padisa ei.

34A thie nah ei ta ano cha pado ei ta, Ropa ta Khazohpa ama tlua heih tyh.

35Khazohpa cha ama lôpanô a châ tahpa a thei ei ta, Chônôchai Khazohpa cha, Âmo chatlaituhpa a châ tahpa amâ thei heih tyh.

36Châhrasala ama pakah ta papyupahly pakhei ei ta, Ama paleih ta haipa bie ama rei thlu tyh.

37Ano liata ama palôh a i leipa ta, A biehrai liata ngâ a chhih veih ei.

38Chatahrasala ano cha thapasana ta a biepa a châpa vâta, Ama paraona cha a ngiahthai ta, Âmo cha pahleipadia vei. A hiehâhna ei hluhpi padia ta, A pathiiana zydua pathyu khoh vei.

39Chyhsapa deita ama châ tahpa a thei thlâh ha ta, Thlih khô ta a vaw kua khao leipa hawhta ama châpa â thei thlâh haw.

40Râhchawhpa liata ei hluhpi chakhia ei ta, Râraohpa liata ei hluhpi a pachâ ama parôh.

41Khazohpa pasia chanei ngâ thlâh ha ei ta, Izarei Mo Pathaihpa ru ama pachhô chanei heih tyh.

42A hmotaotheina a thei khao leipa ei ta, Khakhaipa tawhta âmo a pachha noh a thei khao veih ei.

43Izi liata ngiana a taopazy a thei khao leipa ei ta, Zônâ lyuzy liata a hmonoâh taopazy a thei khao hra veih ei.

44Ama vahpi tizy thisaih lâta palie ta, Chavâta ama vahtie tizy doh thei khao veih ei.

45Ama hry liata mathyupa hri hluhpi tuah ta, Chazy chata âmo cha nie khai ei ta; Cha-uzy chhao tuah ta, Chazy chata âmo cha a pahleipadia khai ha ei.

46Ama chicheipazy chângyu pie ta, Ama hriapasana thei khawsu a pie haw.

47Ama kre zôhzy cha pareih hmâpa ta parao ta, Ama theiku kôzy chhao dâhaw hmâpa ta a parao haw.

48Ama viahchaozy pareih lâ hlâ ta, Ama mietakuzy pachie lâ a hlâ haw.

49A hiehâhna ru ngaitapa ama chô liata pathla thlu ta, Vâlyuhchâpa sahlaozy ta, Pathiiana, ruchhôna nata nôpona zy ama vaw tlôkhei.

50A hiehâhna châta lâpi taopa ta, Thina tawhta ama thlahpa pahlôh leipa ta, Potlana lâta ama hrona a hlâ ha ei.

51Izi râh liata sawchapaw uhtheipa zydua thie ta, Hamâ poh ozy liata ama thatlôna thei hmiatuapazy a thie ha ei.

52A phopi deikua cha mietaku hawhta puakhei ta, Mietaku zaw hawhta râhchawhpa liata a chhihtha ei.

53Â bohpa ta âmo cha chhihtha ta, Khâpa hmah chi veih ei; Ama chariahpazy deikua cha, Tilaipi ta a vao khai ha ei.

54Âmo cha a râh pathaihpa lâ a chhi ta, A ku chachâh lâta a pahniepa tlâhpi lâ â chhi ei.

55Ama hmiakô liata phopizy papua ta, Ama râhzy cha Izarei chizy ryuto châta pachhaih ta, Izarei chizy cha phopizy poh ozy liata a pahrâsa ei.

56Chatanachôta Chônôchai Khazohpa cha pasiapa ta chakhia ei ta, A bieraopazy zyh veih ei.

57Kua ei ta âmo pathlatuhpazy hawhta, Piehpie ngaitapa ta hmotao ei ta; Libaw doleipa hawhta, A pahnieh tlâh châ veih ei.

58Ama su sâhpazy vâta a hie pahâh ei ta, Ama khazoh nothlahpazy vâta hiatliapa ta ama paysa.

59Cha kyh cha Khazohpa ta a thei nahta, A hiehâh ngaita ta; Izarei cha a dytha pathlah haw.

60Silô liata a byureih siesai ta, Chyhsapa hry liata a pahrâna poh o a siesai haw.

61A thatlôna cha sei châ awpa ta hlâ ta, A rônahna chhao a khakhaipa ku liata a hlâ haw.

62A phopi cha zaozi liata hlâ ta, A ryuto chô liata a hiehâhna a papua thlu.

63Mei ta ama satliazy kâ khai ha ta, Ama laihsazy ahneina hla sa thei khao veih ei.

64Ama theihthaipazy zaozi ta pao ei ta, Ama nôhmeizy chaphôhtu khao veih ei.

65Abeipa cha â môpa tawhta a kaw hra ta, Chyhsa thatlôpa ta kresawhti vâta a awhpa hawhta awh ta.

66A khakhaipazy hnôh pasysa ta, Chhâzaw ta nozapa ta a tao ha ei.

67Zawsi poh o dytha ta, Epharai chi a tlyh vei.

68Zudâh chi tlao a tlyh ta, A kyhpachâpa Zaio Tlâh tlao â tlyh haw.

69A supathaihpa cha avâzy hawhta sa ta, Tlyzaw châta a paduapa alei hawhta a sa.

70A chakaotuhpa Dâvi cha a tlyh ta, Mietaku sadôzy tawhta a aw papua.

71A phopi Zakaw vaih ta, A ryuto Izarei vaih awpa ta, Mietakuzy vaina tawhta a aw papua.

72Chatanachata Dâvi cha palôh dopa ta Izarei sawzy vaih ta, Ku zôthaina ta âmo a chhihtha ei.

← Chapter 77 Jump to: Chapter 79 →