Psalms 71

Chin (Mara Bible RV (BSI))

← Chapter 70 Jump to: Chapter 72 →

1Hy Abeipa, nâ châ chhai na ta, Maophyuhpa ta na paysa khah y!

2Na siana vâta na pachha la, Na papua mah y; Kei lâ na nah vaw pachôh la, Na pachha mah y!

3Khâ ei pangai tyh awpa, Ei chhaina lôpanô na châpa la; Ei lôpanô nata ei thokhy châ chi ta, Na pachha awpa ta biepie mah y.

4Hy ei Khazohpa, moleipa ku tawhta na pachha la, Chyhsa chhiepa nata adoleipa ku tawhta na pachha mah y.

5Hy Abeipa, nâ cha ei hnabeiseihna châ chi ta, Hy Abeipa, ei hawti no tawhta ei ngâchhâpa na châ.

6Chhi tawhta nâ liata a pahnieh na ta, Ei nô py tawhta nâ latuhpa na châ. Khâ ei cha reithai aw.

7Chyhsa hluhpi châta ngiana châ na ta, Châhrasala nâ cha ei chhaina thatlôpa na châ.

8Ei pakah he nâma reithaina ta bie ta, Nâma palyupalihna ta noh y ta a bie.

9Ei machâ tita na thy leipa la, Ei tha â sy tita na siesai khah y.

10Ei chariahpazy ta ei kyh na reih ei ta, Ei hrona a byhtuhpazy a pachia ei ta,

11“Khazohpa ta a siesai haw, A chadai u la patu teh u; A pachha awpa y khao veih ei,” ama tah.

12Hy Khazohpa, nâ hla leipa la, Hy ei Khazohpa, na bao awpa ta a para mah y!

13Nâ leihtuhpazy maophyuhpa ta leidia ei sala, Pasasa nâ chhuahpazy cha, Mohnaona nata nohzaona ta khu mawh ei sy.

14Kei deikua cha hnabeiseihpa ta khâ y aw na ta, Ei cha reithai via rili aw.

15Ei pakah ta na siana bie chho aw ta, Na pachhana bie noh y ta a chho aw, A chhozie awpa ei pahno thai leipa chhao ta.

16Hy Abeipa Zehôvâh, Na hmotao rônahpa reithaipa ta a vy aw na ta, Na siana ei phuah aw, Nâma siana tlai cha ei phuah aw.

17Hy Khazohpa, ei hawti no tawhta na pachu chi ta, Tanoh taihta na hmotao noâhpazy ei phuah lymâ.

18Chavâta Hy Khazohpa, Machâpa nata sâ pawhpa ei châ tita, Na siesai khah y; Chhâ a vaw y awpa hnohta na thatlôna ei phuah hlâlei cha, Na siesai leipa la; Miah a vaw pazi awpazy hnohta Na hmotaotheina ei phuah hlâlei cha, Na siesai hra khah y.

19Hy Khazohpa, na siana nata na hmotaotheina ta avâ sâhpazy kaw daih ta, Nâ cha hmo rônahpazy a taotuhpa na châ; Hy Khazohpa, nâ hawhpa he ahy ma a y?

20Nôpona nata chhiena hluhpi nâ pahmôsatuhpa nâma tlai chata, Na pahro heih aw chi ta, Alei athupa tawhta eina thaoh heih aw chi.

21Ei rônahna papôhsa aw chi ta, Thlah eina palôh heih aw chi.

22Na ngâchhihna vâta, Hy Khazohpa, Totâ ta cha reithai aw na ta; Hy Izarei Mo Pathaihpa, Tlaipih ta cha reithaipa ta ei sa aw.

23Nâma reithaina hla ei sa tita, Ei hmaozy he thaphapa ta awh aw ta; Na chatlaipa ei hro chhao heta, Thaphapa ta a awh aw.

24Ei paleih he noh y ta na siana bie reih aw ta, Pasasa nâ chhuahpazy cha, Maophyuhpa nata hnabeidypa ta ama y.

← Chapter 70 Jump to: Chapter 72 →