Psalms 37

Chin (Mara Bible RV (BSI))

← Chapter 36 Jump to: Chapter 38 →

1Hmoparaopazy vâta na pachâ chhie leipa sala, Hmo doleipa a taotuhpazy uahva khah y!

2Sibiepa hawhta thlai raoh aw ei ta, Si hrohpa hawhta thlai ama uah aw.

3Abeipa cha ngâ la, Hmo pha tao mah y; He râh liata pahrâ la, Ngâchhihna zi lymâ mah y.

4Abeipa liata a ly la, Na palôh khopazy a cha pie aw.

5Na yzie awpa cha Abeipa liata pahnieh la, Ano ngâ la, Ano ta a tao aw.

6Na siana cha khaihna hawhta papua aw ta, Nâ dona chhao nohchhô hawhta a châ aw.

7Abeipa hmiakô liata a chalih la, Ano cha hâ hualua mah y. Moleipa a dyhpha tita na pachâ chhie leipa sala, Chhiena a patlôsatuhpa chyhsa vâta na pachâ chhie hra khah sy!

8Hiehâh lei awpa ta maoh oh la, Pathiiana a heihsai mah y! Na ru a pachhô khah y, Ruchhôna cha hmo pha leipa deita a tlôkhei tyh.

9Hmoparaopazy cha chhawh pathlahpa châ aw ei ta, Abeipa a hâtuhpazy deikua cha, râh he ryu ta ama to aw.

10Bohpi leipa liata, Moleipa cha y khao aw vei; A yna su a phapa ta moh hra la, Cha liata y khao aw vei.

11Areisipazy deikua cha râh he ryu ta to aw ei ta, Thlalôhpa ta y aw ei ta, Amâ ly ngaita aw.

12Moleipa ta mosiapa tei ta, A hâh a charieh chie tyh;

13Châhrasala a chhâna noh a vaw tlô haipa a hmôpa vâta, Abeipa ta moleipa cha a pahneisao tyh.

14Dyhchhiepa nata phahlapa zy papao ta, Hrozie dopa thie awpa ta, Moleipa ta a zaozi phia ta, a libaw â kei tyh.

15Ama zaozi ta âmo palôh chhô aw ta, Ama libaw thliepa a châ aw.

16Mosiapa hmo chyhta hneipa cha, Moleipa hmo hluhpi hneipa hlâta a pha via.

17Moleipa bâhzy cha thliepa châ aw ta, Mosiapa deikua cha Abeipa ta khâchâ a patu aw.

18Abeipa ta phapakipa nohzy cha pahno ta, Ama ryu chhâzaw ta a y thlâh ha aw.

19Daihti pha leipa liata maophyuh leipa aw ei ta, Chakâh nohzy liata rihbiepa ta ama nie aw.

20Moleipazy deikua cha leidia aw ei ta, Abeipa chariahpazy chhao sibiepa hawh dei ama châ aw; Leidia aw ei ta, Meikhuh hawhta ama pai aw.

21Moleipa cha dyuchei ta, Châhrasala thô khao tyh vei; Mosiapa deikua cha a riapha ta, A saipa ta a pie tyh.

22Abeipa ta byhnâ a piepazy ta, Râh ryu to aw ei ta, Abeipa ta chhie a sa hapazy deikua cha, Chhawh pathlahpa ama châ aw.

23Chyhsa phapa phei chakâna cha Abeipa ta a chhi ta, A lâpi liata â ly kaw tyh.

24Abeipa ta a ku liahsa a patu hapa vâta, Pao hra sala, Pao pathlah aw vei.

25Hawti vaw châ na ta, Tahmâ cha ei machâ haw; Mosiapa pathluapa ta a ypa hmô beih leipa na ta, A pathlazy nie hnei leipa ta kudaopa hmô beih va na.

26Riapha kawpa ta a sôh dyu pacheisa tyh ta, A pathlazy byhnâ ama to lymâ.

27Moleina siesai la, Hmo pha tao mah y; Chatanachata he râh liata khâ na pahrâ aw.

28Abeipa cha ryureina dopa khoh ta, A mopathaihpazy a heihsai beih leipa ta, Chhâzaw ta a hrôbieh ei. Moleipa pathlazy deikua cha, Chhawh pathlahpa ama châ aw.

29Mosiapazy cha râh ryu to aw ei ta, Cha liata chhâzaw ta ama pahrâ aw.

30Mosiapa pakah ta sona bie reih ta, A paleih ta adona bie a reih tyh.

31A Khazohpa ryhpa cha a palôh liata y ta, A siena liata a tai aw vei.

32Moleipa ta mosiapa mohparu ta, Thie â chhuah tyh.

33Abeipa ta mosiapa cha, Moleipa ku liata siesai leipa aw ta; Pachiana lâ a chhipa a châ tita, Thailei a châ awpa pasaih aw vei.

34Abeipa cha hâ la, A lâpi a chhih mah y; Cha cheihchalopa ta, Râh ryu cha patosa aw ta, Moleipazy chhawh pathlahpa ama châ nota na hmô aw ei.

35Chyhsa chhiepa moleipa hmô na ta, Thobuh hrohpa hawhta â zawhpa ei hmô.

36Châhrasala thi ta, Moh tua u, y khao vei; Tlua hra aw sah la, Hmô theipa châ khao vei.

37Chyhsa phapakipa ngia la, Chyhsa dopa moh tua; A chhâ nawpa cha thlalôhna a châ.

38Hmoparaopazy deikua cha, Tlokhuh pahleipadiapa châ aw ei ta; Moleipa hmialâ daihti awpa chhao, Chhawh pathlahpa a châ aw.

39Mosiapazy pachhana cha Abeipa tawhta châ ta, Nôpona daihti liata ama thokhy a châ.

40Mosiapazy cha ano amâ chhaipa vâta, Abeipa ta âmo cha baopa ta, Pachha tyh ta, Moleipazy tawhta pachha ta, A pabohsa tyh ei.

← Chapter 36 Jump to: Chapter 38 →