Psalms 132

Chin (Mara Bible RV (BSI))

← Chapter 131 Jump to: Chapter 133 →

1Hy Abeipa, Dâvi khokhei awpa a thei la, A riethei taona zydua a thei mah y;

2Abeipa lâ bie a taih ta, Zakaw Thatlôpa lâta bie a taihpa ta,

3“Ei o lâ a ngia leipa aw na ta, Ei rakhô lâ kiah hra leipa aw na ta,

4Ei mozy paso pasaih leipa aw na ta, Ei mo vozy pabieh pasaih hra aw va na,

5Abeipa châta su ei hmô hlâlei, Zakaw Thatlôpa pahrâ nawpa su ei hmô hlâlei cha,” A tahpa kha a thei thlâh ha mah y.

6Cha bie cha Ephrâthâ liata thei pi ta, Ziari lyuzy liata eima hmô.

7“A pahrâna su lâ vawh sih la, A pheitlyna thaby liata a bôh ei suh u!” eima tah.

8Hy Abeipa, thyu la, Nâ pahâna su lâ vawh la, Na thatlôna Byh chhaota vawh mah y.

9Na theihthaipazy siana ta a tobi ei sala, Na mopathaihpazy thaphapa ta rahao mawh ei sy.

10Châ chakaotuhpa Dâvi zawhzi ta, Na sathawthupa hmia pakuasa khah y.

11Abeipa ta Dâvi hnohta hetana heta bie a taih ha ta, A bietai pathleih aw vei: “Na sathei pakha na beidyuchhai liata patyu aw na ta,

12Na sawzy ta ei biehrai zyhpa ta, Âmo ei pachu awpa ei bieraopazy ama zyh khiahta cha, Ama sawzy chhâzaw ta na beidyuchhai liata amâ tyuh lymâ aw.”

13Abeipa ta Zaio a tlyh ta, A pahrâ nawpa su châta a khoh.

14Abeipa ta hetana heta a tah: “He he chhâzaw ta ei pahâ nawpa su châ ta, He su he ei khopa a châpa vâta, He liata ei pahrâ aw.

15A nie awpa byhnâ hluhpi pie aw na ta, Dyhchhiepazy cha viahchhâ ta ama lôhrâ ei patlô aw.

16A theihthaipazy pachhana ta tobi aw ei na ta, A mopathaihpazy thaphapa ta ama rahao aw.

17Cha liata Dâvi châta ki pathaosa aw na ta, Ei sathawthupa châta meiôh ei chhuanoh haw.

18A chariahpazy nozana ta tobi aw ei na ta, Ano lakho deikua cha a khaih lymâ aw.”

← Chapter 131 Jump to: Chapter 133 →