Psalms 105

Chin (Mara Bible RV (BSI))

← Chapter 104 Jump to: Chapter 106 →

1Abeipa lâ alyna bie hlâpa ta a moh pado u la; Phopizy hry liata a hmotaopazy pahnosa teh u!

2Ano lâ hla sapa ta, Ano cha reithai u la; A hmotao noâhpa zydua phuah teh u!

3A moh pathaihpa parônahsa u la, Abeipa a tluatuhpazy palôh cha, Thaphapa ta y mawh sy!

4Abeipa nata a thatlôna tlua u la, A hmia khâ tlua muh vy!

5A hmotao noâhpazy a thei thlâh ha u la, A hmonoâhpazy a theipa ta, A pachiana biezy a thei thlâh ha teh u.

6Hy a chakaotuhpa Abarahâ pathla saih u, Hy â tlyhpa Zakaw sawzy saih u, Chazy cha a thei thlâh ha teh u.

7Ano cha Abeipa eima Khazohpa châ ta, A ryureina alei chô zydua liata a y.

8A biehrai khâ a thei ta, A bietai chhâ sâh hluhpi taihta â thei thlâh haw.

9Cha tlai cha Abarahâ hnohta a biehrai kha châ ta, Aisika hnohta a bietai châ hra ta;

10Zakaw hnohta bieraopa ta pa-i ta, Izarei hnohta chhâzaw biehrai ta taopa ta,

11“Kâna râh cha pie aw na ta, Cha cha na ryuto râh a châ aw,” a tah.

12Maluh chyhta dei châ ei ta, Rei khi chhao a tloh leipa, Khichhaipa dei ama châ nona kha,

13Phopi miakha tawhta miakha lâta viavi ei ta, Khinarâh miakha tawhta miakha lâta ama viavi laih.

14Ahy ta hmah ama tlybai awpa pasaih leipa ta, Âmo vâta beizy ra ta,

15“Ei sathawthupazy hria leipa u la, Ei hrohsopazy pasasa khuh vy,” a tah.

16Râh liata chakâhna patlôsa ta, Niepa hnawh zydua a chhie khai ha nota,

17Ama hmia lâta chyhsa pakha pasiesa ta, Cha cha sei ta zuapa Zawsi kha a châ.

18A pheizy keihrai ta pasasa ta, A rao liata thua raopaky pakypa a châ.

19A bie reipa a vaw tlô hlâlei cha, Abeipa bie ta ano cha a pasia lymâ.

20Abei ta chyhsa tuah ta ano cha pathlie ta, Phopizy ryureituhpa ta ano cha a tao haw.

21A o liata hyutuhpa ta tao ta, A hneipa zydua chô liata ryureituhpa ta a tao.

22Abeisawzy pha a tahzie hawhta chhorei ta, Beimachâzy sona pachu awpa ta, Ano cha ryureituhpa ta a tao.

23Izarei cha Izi râh lâ zu ta, Zakaw Hamâ râh liata a pahrâ.

24Abeipa ta a phopi cha ama chi thata papôh ta, Ama khakhaipazy hlâta thatlô viapa ta a tao ei.

25A phopi a hao awpa ta Izi mo palôh pakuasa ta, Ano a chakaotuhpazy chô liata piehpie ngaitapa ta a pataosa ei.

26A chakaotuhpa Mawsi tuah ta, Â tlyhpa Arawna chhao tuah ta.

27Âmo chata Izi mo hry liata ngianazy tao ei ta, Hamâ râh liata hmonoâhpazy ama tao.

28A biezy ama chakhiapa vâta, Zohna tuah ta, râh a pazohsa.

29Ama tizy thisaih lâta paliesa ta, Ama ngazy a pathisa.

30Ama râh cha cha-uzy ta bie ta, Ama beizy chhôhpadâhpa taihta â ngia.

31Abeipa ta bie reih ta, Mathyupa hluhpi vaw tlô ta, Ama râh cha thlohmia ta a bie.

32Ama râh liata vâsua vyuhpa ta pareih patlasa ta, Râh zydua liata mei pachiezy a patlasa.

33Ama kre zôhzy nata theiku kôzy chanaoh ta, Ama râh liata thozy a thlie khai haw.

34Abeipa ta bie reih ta, Khawsuzy vaw pua ei ta; Khawsu chi to rei tiah leizy ama vaw pua.

35Chazy chata ama râh liata chi hrohpa zydua nie khai ei ta, Chhaohlei thei zydua ama nie khai haw.

36Ama râh liata sawchapaw uhtheipa zydua Abeipa ta tusao ta, Ama chapaw thatlôna thei hmiatuapa zydua a tusao khai haw.

37Chatawhcha Izarei cha tâkâ nata ngôh chhaota a chhi papua ta, Ama chizy hry liata a paopa y veih ei.

38Âmo china ta Izi cha a tla thlu hapa vâta, Ama puapa cha Izi chhao ta â ly kaw.

39Abeipa ta Izarei sawzy khu awpa ta meihdo pazawhsa ta, Zâ ta khaih awpa ta mei a pie ei.

40Hiah ei ta, mamozy vaw patlasa ta, Avâ tawhta viahchhâ hluhpi a pie ei.

41Lôpanô pahy ta, Ti a vaw chathôh ta; Chavah hawhta râh raohpa liata a loh laih.

42A chakaotuhpa Abarahâ hnohta a bietai pathaihpa kha, Khâ a thei thlâh ha ta.

43Chavâta a phopi cha a ly ngaitapa ta a chhi papua ta, A chyhsa a tlyhpazy cha hla sana chôta â chhi papua ei.

44Phopi hropa râhzy cha âmo pie ta, Phopizy hria chiehpa ryu ta a patosa ei.

45Chatanachata a bieraopazy a vao aw ei ta, A ryhpazy ama zyh lymâ aw. Abeipa cha reithai teh u!

← Chapter 104 Jump to: Chapter 106 →