Psalms 145

Chin (Mara Bible RV (BSI))

← Chapter 144 Jump to: Chapter 146 →

1Hy ei Khazohpa nata ei Beipa, Cha palyupali aw na ta, Chhâzaw nata tlyzaw ta na moh ei reithai aw.

2Noh to ta cha reithai aw na ta, Chhâzaw nata tlyzaw ta na moh ei reithai aw.

3Abeipa cha rônah ta, Rônahpa ta reithai awpa a châ; A rônahzie cha, A laichadai khai thei rimâ awpa châ vei.

4Chhâ kha tawhta chhâ hropa lâta, Na hmotaopazy reithai pachhuah lymâ aw ei ta, Na hmotao rônahpazy ama phuah lymâ aw.

5Nâ beina rônahzie nata ngiazie reih aw na ta, Na hmotao noâhpazy ei reih tyh aw.

6Na hmotaopa thatlôzie nata rarôh yzie reih aw ei ta, Kei chhao ta na rônahzie ei phuah aw.

7Na phana hluhzie reih aw ei ta, Na siana kyh hla ta ama sa aw.

8Abeipa cha ngiachhiena nata zawngiahna a hneipa châ ta, Hiehâhna kyh liata nainô sôpa châ ta, Kyhpachâna tleih beih leipa ta a biepa a châ.

9Abeipa cha mo to chô liata pha ta, A zawngiahna cha a hmotaopa zydua chô liata a y.

10Hy Abeipa, na hmotaopa zydua ta alyna bie cha hlâ aw ei ta, Na mopathaihpa zydua ta ama cha reithai aw.

11Na khinarâh rônahzie reih aw ei ta, Na hmotaotheina kyh ama chho aw.

12Chyhsa sawzy hnohta na hmotao rônahpazy pahnosa aw ei ta, Na khinarâh rônahzie nata ngiazie ama pahnosa aw.

13Na khinarâh cha tlyzaw khinarâh châ ta, Na ryureina chhâ zydua ta â duah aw. Abeipa cha a bie zydua liata ngâ a chhih ta, A hmotaopa zydua liata a phapa a châ.

14Abeipa cha a pao awpa zydua patu ta, A bôhpa zydua a pathyu tyh.

15Mokhaoh to ta cha mokhâh ei ta, A daihti ta nie awpa na pie tyh ei.

16Na ku pakai chi ta, Hmohrohneipa to khopa lôhrâ na patlô tyh.

17Abeipa cha a yzie zydua liata sia ta, A hmotaopa zydua liata ngâchhihpa a châ.

18Abeipa cha a padotuhpa zydua a hnia ta, Hmeiseihpa ta a padotuhpa zydua a hniapa a châ.

19Ano a chituhpazy khopa hlao patloh tyh ta, Ama awna ao thei ta a pachha tyh ei.

20Abeipa cha ano kyh a pachâtuhpa zydua pabohsa ta, Hmoparaopazy deikua cha, A pahleipadia aw ei.

21Ei pakah ta Abeipa reithaina bie a reih tyh aw; Chyhsa zydua ta a moh pathaihpa cha, Chhâzaw nata tlyzaw ta reithai mawh ei sy.

← Chapter 144 Jump to: Chapter 146 →