Psalms 69

Chin (Mara Bible RV (BSI))

← Chapter 68 Jump to: Chapter 70 →

1Hy Khazohpa, na pachha mah y! Tizy ta ei rao taih eina vao ha hih.

2Chiatlao athupa liata a pamôh na ta, Tly nawpa rai y vei; Ti athupa tlô na ta, Tisaih ta eina vao.

3Ei awna ta ei thachhâ ta, Ei rao chhao hi khai ha ta, Ei Khazohpa ei hâna ta ei mo a zoh khai haw.

4A chhâpa y leipa ta nâ haotuhpazy cha, Ei luh liata ei sâzy hlâta hluh via ei ta, Parao awpa ta haipa ta nâ teituhpazy chhao, Ama thatlô ngaita. Khâpa hmo ma ei paru tly, Tahmâ ei thô heih awpa cha?

5Hy Khazohpa, ei hruzie pahno chi ta, Ei moleinazy nâ tawhta nyupa châ vei.

6Hy Pheisaihzy Abeipa Zehôvâh, Nâma châ hâtuhpazy cha, Keima vâta nozapa ta y leipa ei sala; Hy Izarei Khazohpa, Nâma châ tluatuhpazy chhao, Keima vâta hmiachhiepa ta y khah ei sy.

7Nâma vâta reipachhiena tao na ta, Nohzaona ta ei hmia a khu.

8Ei unawhzy liata khichhaipa hawhta châ na ta, Ei nô sawzy liata chihropa hawhta ei châ haw.

9Na o châta phahnai ei ngiahna ta na nie khai ha ta, Châ reipachhietuhpazy reipachhiena ei chô liata a tla.

10Chana nata kâhvileipa ta ei hro ei panawh châh ta, Reipachhiena tlao ei hlao.

11Ei chysia châta latho poh ei hmâ nahta, Ama reih khoh kawpa tlao ei châ ha tyh.

12Thokhy chhikao liata a tyuhpazy ta ei kyh reih ei ta, Sahma paripazy ta hla eina phi ei.

13Kei deikua la, Hy Abeipa y, Nâ lâta thlah ei chhâ. Hy Khazohpa, na kyhpachâna tleih beih leipa vâta, Daihti rypaohpa liata nâ chhy la, Na pachhana ngâchhihna ta nâ chhy mah y.

14Chiatlao lia tla awpa tawhta na pachha la, Ei chariahpazy tawhta na pachhapa ta, Ti athupa tawhta na pachha mah y.

15Tisaih ta na phaoh leipa sala, Ti athupa ta na palâ hra leipa sala, Khaohtlô ta a pakah na pabieh khâh khah sy.

16Hy Abeipa, nâma kyhpachâna cha pha tlôh ta, Nâ chhy mah y; Na zawngiahna a chhâ thai leipa vâta, Kei lâ a vaw heih mah y.

17Châ chakaotuhpa he na hmia nyusai leipa la, Ei nôpo ngaita ta, Thlai nâ chhy mah y.

18Nâ vaw hniapa ta ei thlahpa chatlai la, Ei chariahpazy vâta na pachha mah y!

19Reipachhiena ei tyhpazy pahno chi ta, Ei nozana nata ei nohzaona zy na pahno; Ei khakhaipazy chhao na pahno khai.

20Reipachhienazy ta ei palôh pasasa ei ta, Pachârôhpa ta ei y. Nâ ngiachhie awpa tlua na ta, Châhrasala ahy hmah y veih ei; Thlah nâ palôh awpa tlua na ta, Châhrasala pakha hmah hmô veih ei na.

21Pati vyuhpa ta châmaih na pie ei ta, Ei dâhphi nota kresawhti thaopa eina padosa ei.

22Ama hmiakô liata ama tlâhkhai cha, Khoheih vaw châ sala; Thlalôhpa ta ama y hai nota, Âmo châta aphyh châ mawh sy.

23Ama hmô thei lei nawpa ta ama mozy zoh sala, Ama chaizy khâ a chalyu mawh sy.

24Na ruchhôna ama chô liata lei thlu la, Na pathiiana ta âmo cha patu mawh sy.

25Ama riehmo roryhrapa ta y sala, Ama poh ozy liata ahy hmahta pahrâ khah ei sy.

26Na tupa chyhsa chô liata taolana baichha ei ta, Hmah na paphaopazy pasana ama reih chanei tyh.

27Ama chô liata hriena baichha lymâ la, Âmo cha na siana liata pangiasa khah y.

28Ahrohpazy châbu tawhta ama moh phiepa châ sala, Mosiapazy hry liata ama moh roh khah y.

29Kei deikua cha pasataopa nata pachârôhpa ta y na ta, Hy Khazohpa, na pachhana ta chô lâ na soh mawh sy.

30Khazohpa moh cha hla ta reithai aw na ta, Alyna bie reipa ta ano cha ei palyupalih aw.

31Cha chata viahchao tôhpa hlâpa hlâta, Abeipa palysa via aw ta; Ki nata chakiezy a hneipa viahchao tôhpa hlâpa hlâta, Abeipa a palysa via aw.

32Areisipazy ta cha cha hmô aw ei ta, Amâ ly aw; Nâmo, Khazohpa a tluatuhpazy saih u, Nama palôh a hra mawh sy.

33Abeipa ta phahlapazy ao thei ta, A phopi atâhpazy mohnao vei.

34Avâ nata alei ta ano cha reithai sala, Tilaipizy nata a chhôh liata a pie theipa zydua ta, Ano cha reithai mawh ei sy.

35Khazohpa ta Zaio cha pachha aw ta, Zudâh khihpizy a padua aw; Cha liata a chyhsazy pahrâ aw ei ta, Râh cha ama hnei aw.

36A chakaotuhpa chipathlazy ta râh ryu to aw ei ta, A moh a pasôtuhpazy cha liata ama pahrâ aw.

← Chapter 68 Jump to: Chapter 70 →