Psalms 31

Chin (Mara Bible RV (BSI))

← Chapter 30 Jump to: Chapter 32 →

1Hy Abeipa, nâ châ chhai na ta, Maophyuhpa ta na paysa leipa la, Na siana vâta na pachha mah y!

2Kei lâta na nah pachôh la, Thlai na pachha mah y! Ei chhaipa lôpanô na châpa la, Ei pachhana thokhy thatlôpa na châpa mah y!

3Ei lôpanô nata ei thokhy châ chi ta, Na moh vâta na chhihtha la, Na cha-ao mah y.

4Ei chhaipa châ chi ta, Sao eina chôkhâhpa tawh ei ta na thaoh mah y.

5Na ku liata ei thlahpa cha pavaosa na ta, Hy Abeipa, Khazoh ngâchhihpa y, Nâ ta eina chatlai ha chi.

6Khazoh nothlah hraoleipa a ngâpazy a hao ei na ta, Kei deikua la Abeipa ei ngâ.

7Ei pasataona hmô chi ta, Ei hro pachârôhna chhao na hmôpa vâta, Na ngâchhihna liata thaphapa ta ei ly aw.

8Ei chariahpa ku liata na hlâ leipa chi ta, Ei pheizy su kawhpa liata na paduasa.

9Hy Abeipa, na ngiachhie mah y, Nôpopa ta ei y hih; Pachârôhna vâta ei mo thachhâ ta, Ei thlahpa nata ei pôhpa chhao a tha a chhâ.

10Vâsâhpa ta ei hro hmâh na ta, Ei kôzy ahrôna ta khô ta; Ei paraona vâta ei tha chhâ ta, Ei ruzy pua a hmy khai haw.

11Ei khakhaipazy vâta mohnaopa vaw châ ha na ta, Ei vaihzy liata mohnaopa ta y pachaipa ta, Ei hmia pahnopazy châta chhao chichhihpa châ bâ na ta, Khiliah liata nâ hmôpazy ta einâ râsai ei.

12Athipa hawhta mypa ta y na ta, Beih keipa hawhta ei châ haw.

13Chyhsa hluhpi bieparu thei na ta, Su to chichhihna ta a bie; A paraohpa ta na tei ei ta, Ei hrona la amâ chhuah.

14Châhrasala Hy Abeipa, nâma cha ngâ na ta, “Ei Khazohpa na châ,” ei tah.

15Ei daihtizy na ku liata y ta, Ei chariahpazy ku tawhta na pachha la, Nâ taolatuhpazy ku tawhta na pachha mah y!

16Châ chakaotuhpa chô liata na hmia pakhaihsa la, Na ngâchhihna vâta na pachha mah y!

17Hy Abeipa, nâ ei cha pado hih, Maophyuhpa ta na paysa khah y; Moleipazy cha maophyuhpa ta soh la, Sidiapa ta Athihkhih lâ sie mawh ei sy.

18Hmao haiphiahpazy reihpathlie thei leipa ta y mawh ei sy; Haiphiahpazy cha apalaina nata mohnaona ta bie ei ta, Mosiapazy a reipachhie tyhpa ama châ.

19Chyhsa sawzy mohmô ta, Châ chituhpazy châta phana na pachôpa hluh ngaita ta, Châ chhaituhpazy châta na raihria a hluh ngaita!

20Chyhsazy teina tawhta amâ boh thei nawpa ta, Âmo cha na yna liata nyu chi ta; Bie ei chahrapazy paleih tawhta amâ boh thei nawpa ta, Na byureih liata na nyu ei.

21Khihpi liata dôhpa ta ei y nota, A ngâchhihna noâhchhihpa ei chô liata a palâsapa vâta, Abeipa cha reithaipa ta y maw sy.

22Kei hra ta ei rawrôhpa ta, “Na mohmô tawhta chhawh pathlahpa ta ei y haw,” tah na ta; Châhrasala baona hiapa ta ei cha aw tita, Zawngiah awpa ta ei châ hawna ao na thei heih.

23Hy a mopathaihpa zydua saih u, Abeipa cha kyhpachâ muh vy! Abeipa ta ngâchhihpa pabohsa ta, Apalaipa deikua cha thata viari a thô tyh.

24Abeipa a hâtuhpa zydua saih u, Thatlôpa ta y u la, Nama palôh riahphapa ta y mawh sy.

← Chapter 30 Jump to: Chapter 32 →