Psalms 119 — Chin (Mara Bible RV (BSI))

1Hrozie phapakipa chyhsazy cha nohlao ei ta, Abeipa ryhpa a chhihtuhpazy cha ama nohlao na!

2A bieraopazy a zyhtuhpazy cha nohlao ei ta, Pathipalôh tlokhuh ta ano a tluapazy cha ama nohlao na.

3Âmo cha hmo doleipa tao leipa ei ta, A lâpizy amâ chhih lymâ!

4Na pachuna biezy papua chi ta, A phapa ta zyh awpa ta bie na pie.

5Na bieraopazy zyh awpa ta, Ei hroziezy a i sala ei tah kaw dia!

6Chatanachata na biepiepa zydua zyh aw na ta, Maophyuhpa ta y aw va na.

7Na ryhpa siazie a chu aw na ta, Palôh dopa phaopa ta ei cha reithai aw.

8Na bieraopazy ei zyh lymâ aw; Na siesai cheita khah y!

9Thyutliapa ta kheihta a hro a pathaihsa thei aw? Na bie hawhta a hro a vaih khiahta cha, A hro a pathaihsa thei aw.

10Ei palôh zydua ta cha tlua na ta, Na biepiepazy tleisai awpa na pasaih khah y!

11Na bie ei palôh liata a vao na ta, Chavâta na chô liata molei khao aw va na.

12Hy reithai tlâh Abeipa, Na bieraopazy na pachu mah y.

13Na pakah ta na phuahpa ryhpa bie zydua, Ei hmao ta ei phuah lymâ aw.

14Na bieraopazy ta na palysa ta, Hneirôna zydua liata a lypa hawhta ei ly tyh.

15Na pachuna biezy pachâ tyh aw na ta, Na lâpizy ei chhih lymâ aw.

16Na bieraopazy liata a ly aw na ta, Na bie my aw va na.

17Na bie zyhpa ta ei hroh thei nawpa ta, Châ chakaotuhpa chô liata a phapa ta tao mah y.

18Na ryhpa bie pha ngaitapazy ei hmô pasia thei nawpa ta, Ei mozy pavâsa mah y.

19Alei liana he khitlyhpa deita châ na ta, Na biepiepazy na nyu khâh khah y!

20Na pachiana dopazy ngiabâhpa ta, Ei thlahpa ta khâ a cha vâ tyh.

21Apalaipazy ra chi ta, Na biepiepazy a paviasaipa cha, Chhiesapa ta ama y tyh.

22Na bieraopazy a zyhtuhpa châ na ta, Pasipasawhna nata mohnaona zy Kei tawhta na lapa ha mah y.

23Ryureituhpazy a tyuhpakhypa ta, Keima teina bie pachia hra ei sala, Châ chakaotuhpa heta la, Na bieraopazy ei pachâ lymâ aw.

24Na bieraopazy cha ei lyna châ ta, Ryh nâ raokheituhpazy ama châ.

25Ei hro he dohlei liata khâchâ a bai ha ta, Na bie hawhta na pahro heih mah y!

26Ei lâpizy cha chho na ta, Eina chyhei ha chi; Na bieraopazy na pachu mah y!

27Na pachunazy pahno thai awpa ta na bao la, Na hmotao noâhpa kyhzy ei pachâ tyh aw.

28Pachârôhna vâta ei hro thachhâ ngaita ta, Na bie hawhta tha na patlô heih mah y!

29Kei tawhta hrozie do leipa pasie la, Zawh nâ ngiah la, Na ryhpa bie na pachu mah y!

30Ngâchhihna hro a tlyh ha na ta, Na ryhpazy ei vao thlâh haw.

31Hy Abeipa, na bieraopazy khâchâ a patu na ta, Maophyuhpa ta na paysa khah y!

32Ei palôh na pahy kawh tita, Na biepiepazy lâpi a chhipa ta ei râ aw.

33Hy Abeipa, na bieraopazy lâpi na pachu la, Achhâna taihta ei chhih aw.

34Novâhna na pie mah y; Chatanachata na ryhpa zyh aw na ta, Ei palôh tlokhuh ta ei zyh aw.

35Na biepiepapazy lâpi liata nâ chhi mah y, Cha cha ei lyna châ tlôh ta.

36Ei palôh he keimasasyh athôhna lâta paheisa leipa la, Na biepiepazy lâta tlao paheisa mah y.

37Ei mo he hraoleipa hmozy mona tawhta paheisaisa la, Na lâpizy achhihna liata hrona na pie mah y.

38Chipa ta na y thei nawpa ta, Châ chakaotuhpa hnohta na bietai patlô mah y.

39Na ryhpazy cha pha tlôh ta, Reipachhiena ei chi kawpa he na pahleipa mah y.

40Na pachunazy ei vâ ngaita; Na siana vâta na pahro heih mah y!

41Hy Abeipa, na kyhpachâna tleih beih leipa cha kei lâ a vy sala, Na pachhana cha na bietai hawhta kei lâ a vy mawh sy!

42Na bie ei ngâpa vâta, Nâ pasipasawhtuhpazy a chhy nawpa ei hnei aw.

43Ei hnabeiseihna cha na ryhpa liata y ta, Chavâta biedopa ei pakah tawhta la pathlah khah y.

44Na ryhpa zyh lymâ aw na ta, Chhâzaw nata tlyzaw ta khâ ei zyh lymâ aw.

45Na pachunazy ei tluapa vâta, Khotalaipa ta ei charei aw.

46Beizy hmiakô liata na bieraopazy reih aw na ta, Hmia pachhiepa châ aw va na;

47Na biepiepazy liata a ly na ta, Na biepiepazy ei pasô ngaita.

48Na biepiepa ei pasôpazy lâta ei ku pazawh aw na ta, Na bieraopazy ei pachâ tyh aw.

49Na bie liata hnabeiseihna na pahneisa ha tlôh chi ta, Châ chakaotuhpa hnohta na bie kha a thei mah y.

50Na bietai ta eina pahro heih tyhpa kyh cha, Pasa ei tao daihti liata ei thlalôhna a châ tyh.

51Apalaipazy ta thata na pahneisao ei ta, Châhrasala na ryhpa tleisai va na.

52Hy Abeipa, ryhpa hlôpazy ei thei châh ta, Cha ryhpazy chata thlah eina palôh tyh.

53Na ryhpa a heihsaituhpa moleipazy vâta, Ei hie thata a hâh tyh.

54Ei khitlyna o liana heta, Na bieraopazy cha ei hlazy ama châ tyh.

55Hy Abeipa, zâ ta na moh a thei tyh na ta, Na pachuna bie ei zyh tyh.

56Na pachunazy zyhpa cha, Ei châta byhnâ a châ tyh.

57Hy Abeipa, nâ cha ei tovyuh châ chi ta, Na bie zyh awpa ta bie ei châ vaw taih haw.

58Ei palôh tlokhuh ta na khokheina cha hiah na ta, Na bietai hawhta na ngiachhie mah y.

59Ei hroziezy pachâ sualuah na ta, Na bieraopazy lâta ei pheizy chakâ na ta,

60Na biepiepazy zyh awpa ta, Hawh leipa ta ei para tyh.

61Hmoparaopazy chaori ta na chazei hra sala, Na ryhpa bie my beih va na.

62Na pachiana siapazy vâta, Zâcho ta thyu na ta ei cha reithai tyh.

63Kei cha nâma châ chituhpa zydua viasa châ na ta, Na pachuna bie a zyhpazy viasa ei châ.

64Hy Abeipa, alei he na kyhpachâna ta a bie; Na bieraopazy na pachu mah y!

65Hy Abeipa, na bie hawhta, Châ chakaotuhpa chô liata a phapa ta na tao haw.

66Na biepiepazy a ngiapâpa châ na ta, Pahnona nata pachiana phapa na pachu mah y.

67Pasa pataosapa ei châ hlâ tawh chhao ta, Cha tleisai ha na ta; Tahmâ deikua cha na bie ei zyh lymâ.

68Nâ cha Khazoh phapa nata hmo pha a taopa châ chi ta, Na bieraopazy na pachu mah y.

69Apalaipazy ta haipa ta na pachhie ei ta, Châhrasala ei palôh tlokhuh ta na pachunazy ei zyh lymâ.

70Ama palôh cha sa thaw kuapa hawhta a kuhchha ta, Kei deikua na ryhpa liata ei ly.

71Na bieraopazy ei chu thei nawpa ta, Riepatheipa ta ei vaw ypa kha kei châta a pha na.

72Ngôh nata tâkâ sâh hluhpi hlâta, Ei châta na pakah ryhpa bie pha via syulyu tlôh ta.

73Na ku ta na tao chi ta, Eina padua chi; Na biepiepazy ei chu thei nawpa ta, Novâhna na pie mah y.

74Na bie liata hnabeiseihna ei hneipa vâta, Nâma châ chituhpazy ta na hmô aw ei ta amâ ly aw.

75Hy Abeipa, na pachianazy â do tahpa pahno na ta, Pasa eina pataosapa chhao chi he â dopa a châ.

76Châ chakaotuhpa hnohta na bietai hawhta, Na kyhpachâna tleih beih leipa ta thlah na palôh mawh sy.

77Na ryhpa cha ei lyna châ tlôh ta, Ei hro thei nawpa ta, Na zawngiahna cha kei lâ a vy mawh sy.

78Apalaipazy cha haipa ta eina teipa vâ ei ta, Maophyuhpa ta y ei sala; Kei deikua cha, Na pachuna biezy ei pachâ tyh aw.

79Châ chituhpazy kei lâ a vaw heih ei sala, Na bieraopazy a pahnopa maih a vaw heih mawh ei sy.

80Maophyuhpa ta ei y lei nawpa ta, Ei palôh he na bieraopazy liata phapakipa ta y mawh sy!

81Ei thlahpa ta na pachhana vâ ta, Na bie liata ei hnabeiseihna a y.

82Na bietai mokhâhpa ta ei mo bâ ta, “Khati ta ma thlah eina palôh aw chi?” ei tah tyh.

83Meikhuh liata savo titheih hawhta ei châpa chhao ta, Na bieraopazy my beih va na.

84Châ chakaotuhpa he khachâ ma pasa ei tao chy aw tly? Nâ taolatuhpazy he khati ta ma na pachia aw ei tly?

85Apalaipazy ta khaohtlô na chao khâh ei ta, Na ryhpa bie hawhta hroh veih ei.

86Na biepiepa zydua ngâ a chhih ta, Âmo deikua cha haipa bie hmâpa ta eina taola ei; Na bao mah y!

87Alei tawhna heta na pahleipadia daihmâ ei ta, Châhrasala na pachuna biezy a heihsai beih va na.

88Na pakah bieraopazy ei zyh lymâ thei nawpa ta, Na kyhpachâna ta na pabohsa mah y.

89Hy Abeipa, na bie cha chhâzaw ta y ta, Vârâh liata â i ngaitapa ta â duah thlâh haw.

90Na ngâchhihna chhâ zydua châta a daih ta, Leilô he tao chi ta, Â ipa ta â duah lymâ.

91Na raozie lymâ hawhta tanoh taihta a duah ei ta, Hmo to zydua nâma châ chakaotuhpa sai ama châ.

92Na ryhpa he ei lyna châ vei mawh sala, Ei pasataona liata ei leidia ha aw.

93Na pachunazy hmâpa ta na pahro ha chi ta, Chavâta na pachunazy my beih aw va na.

94Na eih châ na ta, Na pachuna a tluapa ei châpa vâta, Na pachha mah y.

95Hmoparaopazy ta thie nâ chhuahpa ta na hâ ei ta, Kei deikua cha na bieraopazy ei pachâ tyh.

96Phapakina zydua chhâna hmô ha na ta, Nâma biepiepa deikua cha chhâna hnei vei.

97Na ryhpa cha ei pasô kaw dia! Noh y ta ei pachâ tyh.

98Na biepiepazy ei hnohta khâ a ypa vâta, Ei chariahpazy hlâta so viapa ta eina tao.

99Na bieraopazy ei pachâ tyhpa vâta, Nâ pachutuhpa zydua hlâta novâhna ei hnei via.

100Na pachuna biezy ei zyhpa vâta, Machâpazy hlâta ei no a vâh via.

101Na bie ei zyh thei nawpa ta, Moleina lâpi to tawhta ei phei â sysai haw.

102Eina pachu hapa vâ chi ta, Na ryhpa tleisai beih va na.

103Na biezy cha ei pakah châta a thlôh kaw dia! Kheihti hlâta ei pakah liata a thlôh via.

104Na pachunazy tawhta novâhna hnei na ta, Chavâta hrozie doleipa to ei hao.

105Na bie cha ei phei châta meiôh châ ta, Ei lâpi châta khaihna a châ.

106Na ryhpa siapazy zyh awpa ta, Bietai taopa ta ei pa-i haw.

107Hy Abeipa, thata pasa pataosapa ei châ hih; Na bie hawhta na pahro mah y!

108Hy Abeipa, ei châ haw na, Lôhthai ta reithaina ei chaw hlâpazy he a pyh la, Na ryhpazy na pachu mah y.

109Ei hrona he ei ku liata a y tyhpa chhao ta, Na ryhpa deikua cha my beih va na.

110Hmoparaopazy ta khoheih na chôkhâh ei ta, Châhrasala na pachuna biezy paviasai va na.

111Na bieraopazy cha kei châta ei chhâzaw ryuto châ ta, Ei palôh alyna a châ.

112Na bieraopazy tao awpa ta ei palôh pahei na ta, Chhâzaw ta, achhâna taihta ei tao lymâ aw.

113Lôh no a phaohpa chyhsa cha a hao na ta, Kei deikua cha na ryhpa ei pasô.

114Nâ cha ei nyuna su nata ei vyhphao châ chi ta, Na bie liata ei hnabei a seih tyh.

115Nâmo, moleina hmo a taopazy saih u, Ei Khazohpa biepiepazy ei zyh thei nawpa ta, Na siesai syulyu ha teh u.

116Ei hro thei nawpa ta, Na bietai hawhta na hrôbieh la, Ei hnabeiseihna liata maophyuhpa ta na paysa khah y!

117Na cha-ao mah y; Chatanachata a boh aw na ta, Na bieraopazy cha ei pachâ lymâ aw.

118Na bieraopazy a tleisaipa zydua cha, Chyhsa doleipa nata piehpiepa ama châpa vâta, Na dytha ha ei.

119Lei chyhsa moleipa zydua cha, Thua saiiepa hawhta na thy ha ei; Chavâta kei cha na bieraopazy ei pasô.

120Ei pôhpa he nâma chipa ta a chalyu ta, Na pachianazy ei ngiaroh kaw tyh.

121Âdopa nata asiapa ta tao tyh na ta, Nâ tlybaituhpazy liata na siesai khah y.

122Châ chakaotuhpa pha nawpa bie a taih la, Akhotlâhpazy ta eina tlybai awpa ei pasaih khah y.

123Na pachhana mokhâhpa ta ei mo bâ ha ta, Na bietai siapa mokhâhpa ta ei mo a bâ khai haw.

124Na kyhpachâna tleih beih leipa hawhta, Châ chakaotuhpa chô liata tao la, Na bieraopazy na pachu mah y.

125Châ chakaotuhpa châ na ta, Na bieraopazy ei pahno thei nawpa ta, Novâhna na pie mah y!

126Na ryhpa parao ha ei ta, Hy Abeipa, rai na hria daihti a tlô haw.

127Chavâta na biepiepazy cha, Ngôh hlâta pasô via na ta, Ngôh suapa hlâta ei pasô via.

128Chavâta na pachunazy â do khai tah na ta, Hrozie doleipa ei hao.

129Na bieraopazy cha noâh a chhih ta, Chavâta ei hro ta a zyh lymâ.

130Na biezy chhopasiana ta khaihna pie ta, Nomaohpazy hnohta novâhna a pie tyh.

131Na biepiepazy ei vâ kawpa vâta, Ei pakah â na ta ei hu a hiah kaw tyh.

132Na moh a pasôpazy na ngiachhie tyhpa hawhta, Kei lâ a vaw heih la, Na ngiachhie mah y.

133Na bie hawhta ei keih chakânazy vaih la, Moleina ta ei chô liata bie a hnei awpa pasaih khah y.

134Na pachunazy ei zyh thei nawpa ta, Chyhsazy tlybaina tawhta na chatlai mah y.

135Châ chakaotuhpa chô liana he na hmia pakhaihsa la, Na bieraopazy na pachu mah y.

136Na ryhpa bie ama zyh leipa vâta, Ei mozy tawhta mothlih chavah a loh tyh.

137Hy Abeipa, nâ cha asiapa châ chi ta, Na ryhpazy chhao â do.

138Bieraopa na taopazy sia ta, Tlokhuh ngâ tlâhpazy ama châ.

139Ei khakhaipazy ta na biezy ama my hapa vâta, Ei phahnai ngiahna ta eina nie khai haw.

140Na bietai cha a phapa ta pasia hapa châ ta, Châ chakaotuhpa heta a pasô ngaita.

141Chyhsa nawhpa nata mohnaopa châ na ta, Chatahrasala na pachunazy my va na.

142Na siana cha chhâzaw siana châ ta, Na ryhpa chhao biedopa a châ.

143Nôpona nata pachârôhna ta na tla thlu ta, Châhrasala na biepiepazy cha ei lyna a châ.

144Na bieraopazy cha chhâzaw ta a do ta, Ei hro thei nawpa ta, Novâhna na pie mah y.

145Hy Abeipa, ei palôh tlokhuh ta cha aw na ta, Na chyh-ei mah y! Na bieraopazy ei zyh aw.

146Cha pado na ta, Na pachha mah y; Na bieraopazy cha ei zyh lymâ aw.

147Khihdei hlâta thyupa ta, Baona hiapa ta awh na ta; Na biezy liata ei hnabei a seih tyh.

148Na bie ei pachâ thei nawpa ta, Zâ vaina chhâ hlâlei cha ei mo ei padeih thlâh ha tyh.

149Na kyhpachâna tleih beih leipa vâta ei ao thei la, Hy Abeipa, na ryhpa hawhta na pahro heih mah y.

150Ei chô liata hmo pha leipa tao a chhuahpazy ta nâ vaw hnia ei ta, Âmo cha na ryhpa tawhta a hla kawpazy ama châ.

151Nâ deikua cha Hy Abeipa, Lâhnia liata y chi ta, Na biepiepa zydua chhao adopa a châ.

152Na bieraopazy cha chhâzaw châta taopa a châzie, Hlâno tawhta ei vaw pahno haw.

153Na ryhpa ei my beih leipa vâta, Ei pasataona he moh la na pachha mah y.

154Ei bie a duakheipa ta na pachha la, Na bietai hawhta na pahro heih mah y.

155Na bieraopazy ama tlua leipa vâta, Pachhana cha hmoparaopazy tawhta â hla kaw.

156Hy Abeipa, na zawngiahna cha thata a châ kaw dia, Na ryhpa hawhta na pahro heih mah y.

157Nâ taolatuhpazy nata nâ khakhaipazy hluh kaw ei ta, Châhrasala na bieraopazy tleisai beih va na.

158Ngiapâleipazy moh ei na ta, Na biepiepazy ama zyh leipa vâta, Ei pasi kaw ei.

159Na pachunazy ei pasôzie he pachâ la, Hy Abeipa, na kyhpachâna tleih beih leipa vâta, Ei hrona he pabohsa mah y.

160Na bie zydua a do ta, Na pachiana siapa zydua chhâzaw ta a y thlâh ha aw.

161Ryureituhpazy ta a chhâpa y leipa ta na taola ei ta, Ei palôh deikua cha na biezy chipa ta tlao â chalyu.

162Hraona sôh hluhpi a hmôpa hawhta, Na bie liata ei ly ngaita.

163Haipa he a haopa ta pasi na ta, Na ryhpa deikua cha ei pasô ngaita.

164Na ryhpa siapazy vâta, Noh kha ta ei sari ei cha reithai tyh.

165Na ryhpa a pasôtuhpazy cha, Thlalôhna ipa hnei ei ta, Khâpa ta hmah papao thei aw veih ei.

166Hy Abeipa, na pachhana hnabeiseih na ta, Na biepiepazy ei tao lymâ.

167Na bieraopazy cha ei hro ta zyh ta, Ei pasô ngaita.

168Na pachunazy nata na bieraopazy zyh lymâ na ta, Ei hrozie zydua he na hmiakô liata â lâ khai.

169Hy Abeipa, ei awna he na kô vaw tlô sala, Na bie hawhta novâhna na pie mah y!

170Ei hiana he na kô vaw tlô sala, Na bie hawhta na pachha mah y.

171Na bieraopazy eina pachupa vâ chi ta, Ei hmaozy reithaina ta a khô pathlah.

172Na biepiepa zydua â do khaipa vâta, Ei paleih heta na bie reithaipa ta sa mawh sy.

173Na pachunazy ei tlyh hapa vâta, Na bao awpa ta na ku khâ a mâ thlâh ha mawh sy.

174Hy Abeipa, na pachhana vâ ngaita na ta, Na ryhpa cha ei lyna a châ.

175Ei cha reithai thei nawpa ta na pahro la, Na ryhpa biezy ta na hrôbieh mawh sy.

176Mietaku a leipa hawhta viavi na ta, Châhrasala na biepiepazy ei my leipa vâta, Châ chakaotuhpa he vaw tlua mah y.