Psalms 22

Chin (Mara Bible RV (BSI))

← Chapter 21 Jump to: Chapter 23 →

1Ei Khazohpa, ei Khazohpa, khazia eina pathlua chi? Khazia na pachha leipa ta nâ hla chi ta, Ei hrôna biezy thei leipa ta einâ hla chi tly?

2Hy ei Khazohpa, nohchhô ta awh na ta, Châhrasala nâ chhy va chi; Zâ ta chhao awh na ta, Apahâna hmô va na.

3Chatahrasala nâ cha Pathaihpa châ chi ta, Izarei reithaina liata a hlao tyhpa na châ.

4Miah pathlatuhzy ta cha ngâ ei ta, Cha ngâ ei ta, na pachha ei.

5Cha aw ei ta, pachhapa ta y ei ta, Cha ngâ ei ta, ama hnabeidy vei.

6Kei deikua cha chyhsapa châ leipa na ta, Châkariepa dei châ na ta; Chyhsazy mohnaopa nata pasipasawhpa ei châ.

7Nâ hmôpa maihta na pahneisao ei ta, Ama hmao na pabyuh chiepa ta, Ama luh eina chahuah chie ei.

8“Ano cha Abeipa ngâ tlôh ta, Ano ta pachha sala; Ano liata a ly tlôh ta, Ano ta bao mawh sy,” ama tah.

9Nâ deikua cha chhi tawhta nâ thaohtuhpa châ chi ta, Ei nô sâhpi ei bâh no chhao ta, Nâma ngâ awpa ta nâ taotuhpa na châ.

10Ei pi noh tawhta ei pahniena châ chi ta, Ei nô chhi liata ei y no tawhta ei Khazohpa na châ.

11Nâ hla cheita khah y, Nôpona a vaw hnia ta, Baotuhpa rai y veih ei.

12Viahchao tôhpa hluhpi ta na chadô ei ta, Bâsanâ viahchao tôhpa thatlôpazy ta eina dôh ei.

13Chakeibarôhneipa pahâpahaohpa a rôh ngâpa hawhta, Ama pakah kawhpa eina â chie ei.

14Ti hawhta leithapa ta y na ta, Ei ruzy â suhlie khai haw; Ei palôh kheilôh hawh châ ta, Ei chachôhna liata a ti khai haw.

15Ei thatlôna beihkao hawhta hi karâpa ta, Ei paleih ei dâh lâta a bai ta, Thina dohlei liata eina soh chi.

16Izy ta na chadô ei ta, Hmoparaopa pyzy ta na dôhpa ta, Ei kupheizy ama papyu haw.

17Ei rupa zydua reih thei na ta, Na moh ei ta eina tawpâ ei.

18Ei pohzy a rai ei ta, Ei chysia to awpa ta nuby amâ dao.

19Hy Abeipa, nâ deikua cha a hla leipa la, Hy nâ baotuhpa y, na bao awpa ta a vy para mah y!

20Ei hrona he zaozi tawhta pachha la, Ei hrona sôhpa he i hmotaotheina tawhta pabohsa mah y!

21Chakeibarôhneipa pakah tawhta na pachha la, Chaoliah ahrâhpa ki tawhta na pabohsa mah y!

22Ei unawhzy hnohta na moh phuah aw na ta, Apakhypazy hry liata ei cha reithai aw.

23Abeipa a chipazy saih u, ano cha reithai teh u! Zakaw pathla zydua saih u, ano palyupalih u la, Izarei pathla zydua saih u, ano cha chi teh u!

24Ano cha pasa a taopa pasataona mohnao leipa ta, Pasi hra vei; A hmia nyusai leipa ta, A aw tita a nathlie tyh.

25Pakhypi rônahpa liata cha reithai aw na ta, Nâma châ chituhpazy hmiakô liata ei bietai ei patlô aw.

26Pasataopazy lôhrâtlôpa ta nie aw ei ta, Ano a tluatuhpazy ta Abeipa cha ama reithai aw! Nama palôhzy chhâzaw ta hroh thlâh ha mawh sy!

27Khizaw kaokih zydua ta a thei aw ei ta, Abeipa lâ amâ heih aw; Râh to liata chi tozy a hmiakô liata amâ bôh aw.

28Abeina cha Abeipa eih châ ta, Ano cha phopizy chô liata ryureituhpa a châ.

29Lei hneirôhpa zydua ta kyhchhipa ta ano cha a chhy aw ei ta, Dohlei lâta a zu awpa zydua ta a hmiakô liata amâ bôh aw; Anosasyh â pahro thei leipa chhao ta Abeipa cha â chhy aw.

30A chipathla ta ano cha chakao aw ta, Chhâ vaw y awpa hnohta Abeipa thâtih chhopa a châ aw.

31A vy aw ei ta, Phopi a pih mâh leipa hnohta A siana thâtih phuah aw ei ta, A patlô haw tahpa ta ama chho aw.

← Chapter 21 Jump to: Chapter 23 →