Psalms 55

Chin (Mara Bible RV (BSI))

← Chapter 54 Jump to: Chapter 56 →

1Hy Khazohpa, ei thlahchhâna lâ na nah pachôh la, Ei châ hawna he a nyusai khah y!

2Na nathlie la, nâ chhy mah y; Ei palôh a tymâ ta ei pachâ a rôh ngaita,

3Chariahpa pyu thei na ta, Moleipa ta eina moaipa vâta. Chhiena na thy thlu ei ta, Hiehâhpa ta eina taochhie ei.

4Ei chhôhso palôh pasa ngaita ta, Thina chichhihpazy ta eina vi.

5China nata achalyuna ta na patu ta, Thlazohna ta eina chanaoh.

6“Aw, vachhuh hawhta mathlaw hnei aw sah la, A zaw aw na ta, ei pahâ ha awpa tlai!

7A châ na, lâhlapi lâ a zaw syulyu ha aw na ta, Râhchawhpa liata ei y ha awpa tlai!

8Abohna su lâ a râ para aw na ta, Thlihpipa nata thlihrâhpa tawhta ei boh ha awpa tlai!” tah na ta.

9Hy Abeipa, khihpi liata atudaina nata ahryuna zy hmô na ta; Âmo cha pahleipadia la, Ama paleih hriechheih khai ha mah y.

10Chhô nah zâ ta khihpi cha a thokhy chô liata chahlô ei ta, Khihpi chhôh cha moleina nata tymâna ta a bie.

11Khihpi chhôh cha paraona ta bie ta, Tlybaina nata dôveina zy ta a lâlaizy puasai beih vei.

12Nâ reipachhietuhpa cha chariahpa a châ khiahta cha, Maoh oh thei thlâh ha aw na ta; Nâ palai thlupa cha khakhaipa a châ khiahta cha, Ei nyusai thei thlâh ha aw.

13Châhrasala nâ, ei chiheihpa chyhsa, Ei kaolâhpa nata ei viasa phapa cheingei ta, Cha hawhta eina tao chi.

14Nâ nata kei cha reikah thlôhpa ta bie reih khoh tyh pi ta, Khazohpa o liata a kao tyhpa mah eima châ tâh.

15Ei chariahpazy chô liata thina vaw tlô sala, Ama hrohpa ta Athihkhih lâ sie mawh ei sy; Ama pahrâna su liata hmo pha leipa y ta, Ama palôh hmo pha leipa ta a bie.

16Kei deikua cha Khazohpa pado aw na ta, Abeipa ta eina pachha aw.

17Zâlâ ta zy, my ta zy, nohchhô ta zy, Ei nôpona bie reipa ta a rôh na ta, Abeipa ta ei ao eina thei.

18Nâ dyuhpa hluh ngaita hra ei sala, Ei hro he chatlaipa ta abohna su liata paysa ta, Chariah ei dyuhpa tawhta eina pachha haw.

19Âmo cha hro a thla awpa khoh leipa ei ta, Khazohpa ama chi leipa vâta, Beidyuchhai liata tlyzaw ta a tyuhpa Khazohpa ta, Ei hiana thei aw ta âmo cha a panawh aw.

20Ei kaolâhpa ta a viasazy a dyuh ta, A biehrai a parao haw.

21A pakah cha sâhpiti kuapa hawhta pahnia ta, A palôh lia deikua adyuhna ta a bie. A biezy sathaw hlâta nai via ta, Châhrasala zaozi phia hapa a châ.

22Na phaohri Abeipa liata pachhô la, Ano ta tha a cha patlô aw; Mosiapa cha pao pasaih beih aw vei.

23Châhrasala Hy Khazohpa, Moleipazy cha leidiana khaohtlô liata pathla aw chi ta, Thisaih a palopa nata chyhsa a dôveipazy cha, Ama chhâ khophie chhao hroh aw veih ei. Kei deikua cha, nâ ei cha ngâ aw.

← Chapter 54 Jump to: Chapter 56 →