Psalms 68

Chin (Mara Bible RV (BSI))

← Chapter 67 Jump to: Chapter 69 →

1Khazohpa cha thyu aw ta, A chariahpazy papaipa ta y aw ei ta, Ano ahaotuhpazy a hmiakô liata amâ râpai aw.

2Meikhuh phaoh pathlahpa ta a ypa hawhta, Âmo cha papua aw chi ta; Mei liata kheilôh a zaopa hawhta, Moleipazy cha Khazohpa hmiakô liata ama leidia aw.

3Mosiapazy deikua cha thaphapa ta, Khazohpa hmiakô liata palôhtlâhpa ta y aw ei ta, A ly ngaitapa ta ama rahao aw.

4Khazohpa lâ hla sa u la, A moh reithaipa ta sa teh u; Meihdo chô liata a kiahpa châta hla sa u la, A moh cha Abeipa châ ta, A hmiakô liata a lypa ta y teh u!

5Ano cha a pahrâna su pathaihpa liata a ypa Khazohpa châ ta, Paw hnei leipazy châta paw châ ta, Nôhmeizy a duakheituhpa a châ.

6Khazohpa ta matlupa châta chhôhkha taopa ta, Atâhpazy papuapa ta thlao pachhisa ta; Dyuhtuhpazy deikua cha râh raohpa liata ama pahrâ.

7Hy Khazohpa, na phopi hmia lâta sie chi ta, Râhchawhpa liata na sie laih nona kha,

8Khazohpa, Sinai Khazohpa hmiakô liata, Khazohpa, Izarei Khazohpa hmiakô liata, Alo a sih ta, Avâzy ta avâ a za pasuasa.

9Hy Khazohpa, khihti phapa vaw tuah chi ta, Na ryuto a panao hapa na paduapathi heih.

10Na sahlaozy cha liata pahrâ ei ta, Hy Khazohpa, na phana ta dyhchhiepazy na pasa ei.

11Abeipa ta bie pie ta, Cha thâtih a phuahtuhpa chanôzy cha, Ama hluh ngaita dia!

12“Beizy nata ama pheisaihzy rawrôh ta a râ ei ta, Amâ râpai khai haw,” ama tah. O hâtuhpa chanôzy ta hraona sôh amâ rai.

13Mietaku sadôzy liata a ypa chanôzy cha, Tâkâ ta pahupa mathlaw a hneipa vachhuh lyu ei ta, A mathlaw pawhmaozy liata ngôh patliepa a ypa hawhta ama châ.

14Atotaotheipa ta cha liata beizy a papai nona kha la, Zalmaw tlâh liata dâhaw a tlapa na a lyu.

15Hy tlâh rônahpa, Bâsanâ tlâh, Hy tlâh lakizy, Bâsanâ tlâh!

16Hy tlâh laki saih u, Khazia Khazohpa ta a pahrâ nawpa ta a khopa tlâh cha, A haopa ta moh ei chi ta, Tlyzaw ta Abeipa pahrâ nawpa tlâh cha, A haopa ta nama moh tly?

17Khazohpa talailihzy cha thy hluhpi châ ta, Thy sâh hluhpi a châ; Abeipa cha Sinai liata a ypa hawhna khata, Pathaihna ta ama hry liata a pahrâ.

18Hy Zehôvâh Khazohpa, Chô lâ na kia nota, Patupazy cha sei ta a chhi chi ta; Cha liata na pahrâ thei nawpa ta, Chyhsazy tawhta hmopiepazy daopa ta, Dyuhtuhpazy tawhta chhao na daopa kha.

19Abeipa cha reithaipa ta y mawh sy, Ano cha noh chareih ta phaohri miah phaokheituhpa châ ta, Khazohpa cha eima pachhana a châ.

20Eima Khazohpa cha pachhana Khazohpa châ ta, Thina tawhta puana chhao, Abeipa, zibeipa liata a y.

21A chariahpazy deikua cha, Khazohpa ta ama luh chhawh pathlah aw ta, A thaileichâna lâpi a chhihpa hrôtô a chhawh pathlah aw.

22Abeipa ta hetana heta a tah: “Bâsanâ râh tawhta a chhi heih aw ei na ta, Tilaipi athupa tawhta ei chhi heih aw ei.

23Chatanachata ama thisaih liata na phei tly aw chi ta, Na izy paleih ta khakhaipazy liata tovyuh a hnei aw.”

24Hy Khazohpa, na sie haipa hmô ei ta, Ei Khazohpa, ei Beipa, Su pathaihpa lâ na siepa chhao ama hmô.

25Hlasathaipazy hmia a sahpa ta, Pyungia tô thaipazy a hnôh chai ta y ei ta, A likawh liata laihsa kôpazy paotlâ tôpa ta sie ei ta,

26“Khazohpa cha pakhypi rônahpa liata reithai u la, Izarei tihnawh saih u, Abeipa cha reithai teh u,” ama tah.

27Hawti chaipa Benzami ta âmo cha chhihtha ta, Zudâh chhituhpa hluhpi y ei ta, Zebulawna nata Nâthalai chhituhpazy amâ hlao hra.

28Hy Khazohpa, na hmotaotheina aw la, Hy Khazohpa, na tao tyhpa hawhta, Na thatlôna miah pahmô heih mah y.

29Zerusale liata nâma Achhyna o vâta, Beizy ta kuhriazy ama cha vaw cheipa aw.

30Lohthizy hry liata sahrâhpazy ra la, Phopizy viahchao tôhpa nata viahchaotawzy ra mah y. Râhpaw a tlaichhaipazy cha na phei ry liata tlypâ la, Adyuhna a pahâh kawpa phopizy hiepatla ha mah y.

31Izi râh tawhta lyuhchâpazy a khy aw ei ta, Kusi ta Khazohpa lâ a ku thlai a pazawh aw.

32Hy khizaw râhzy saih u, Abeipa lâ reithaina hla sa u la,

33Avâzy chô a kiahpa lâta, Avâ hlôpazy chô a kiahpa lâ tlai ta, Reithaina hla sa muh vy. Moh teh u, a ao papua ha ta, A ao rônahpa a papua haw.

34Khazohpa cha hmotaotheina patosa teh u; A rônahna Izarei chô liata y ta, A thatlôna avâ liata a ypa a châ.

35Hy Khazohpa, na supathaihpa liata chizapa châ chi ta, A phopi hnohta hmotaotheina nata thatlôna a piepa, Izarei Khazohpa na châ. Khazohpa cha reithaipa ta y mawh sy!

← Chapter 67 Jump to: Chapter 69 →