Psalms 73

Chin (Mara Bible RV (BSI))

← Chapter 72 Jump to: Chapter 74 →

1Khazohpa cha Izarei chô liata pha ta, Palôh pathaihpazy chô liata a vaw pha tlai na.

2Kei deikua cha ei phei chakânazy a chapia daihmâ ta, Ei pheizy â chakhao daihmâ.

3Moleipazy vâphana ei hmô nahta, Apalaipazy ei uahva kaw tyh ei.

4Ama thi noh taihta pasana rai tao leipa ei ta, Thawh kaw ei ta ama mitlaoh ngaita.

5Mohropazy hawhta a tymâ leipa ei ta, Chyhsa hropazy hawhta pasa tao veih ei.

6Chavâta apalaina cha ama pachhih châ ta, Nôchhiena chysia amâ tobi.

7Ama pachâna cha moleina ta bie ta, Ama palôh saduthliena ta a bie.

8Chyhsa pahneisaopa ta bie chhiepa reih ei ta, A palai ngaitapa ta tlybaina bie ama reih tyh.

9Ama pakah ta avâzy taih reipachhie ta, Ama paleih ta alei zydua a chahryh.

10Chavâta a phopi cha âmo lâ kua ei ta, Âmo liata adoleina hmô veih ei.

11“Khazohpa ta kheihta ma a pahno thei aw? Chônôchaipa ta pahnona a hnei ma?” ama tah.

12Moh teh, hezy he moleipazy châ ei ta, Phasapa ta ypa ta, Ama hneirôna a papôhsapazy ama châ hih.

13Hraoleipa ta ei palôh pathaisa na ta, Seina hnei lei awpa ta hraoleipa ta ei ku ei si tyh.

14Noh y ta rie patheipa châ na ta, My chareih ta chhoreipa ta ei y.

15“Cha hawhta ei reih aw,” tah aw sah la, Na sawzy chhâ he a paphasaipa ei châ aw.

16Cha hmo cha pahno ei chhuah nahta, Kei châta pahno ru ngaitapa châ ha tyh ta;

17Khazohpa supathaihpa liata ei ngia nahta, Ama chhâna awpa cha ei pahno thai haw.

18Âmo cha su pahniapazy liata soh chi ta, Raokei awpa ta na papaosa ei.

19Kheihtazie ta ma sôkha ta pahleipadiapa châ ei ta, Hmo chichhihpazy ta a phaoh pathlah thlâh ha ei tly!

20Chyhsa a kaw hra ta, A mâsapa khâpasaw ta a rei leipa hawhta; Hy Abeipa, nâ hra tita, Âmo cha nothlahpa hawhta hmô aw chi ta, Khâpasaw ta reih aw va chi.

21Ei hro a pachârôh ta, Ei palôh ahloh chhôpa hawhta a y nota,

22Ahrupa nata hmo a pahno leipa châ na ta, Na hmiakô liata râhsa hawhta ei ypa kha.

23Chatahrasala na hnohta y lymâ na ta, Ei ku chachâh lâ khâ eina patu chi.

24Na ryhraona ta na chhihtha chi ta, Cha khai tawhta rônahna liata einâ ly aw chi.

25Avâ liana khi ta, Nâ leipa ta ahy hropa ma ei hnei tly? Alei liana chhao heta, Nâ leipa ta khopa hro hnei va na.

26Ei sapa nata ei palôh he a tleih thei, Châhrasala Khazohpa cha ei palôh thatlôna châ ta, Tlyzaw châta ei tovyuh a châ.

27Pachâ teh, nâma châ hlapazy cha leidia aw ei ta, Na châta ngâchhih leipazy cha ama chhâna na patlôsa tyh.

28Kei châta deikua cha, Khazohpa a hniapa he a pha na; Abeipa Zehôvâh cha ei chhaina ta hmâh na ta, Na raihria kyh zydua ei chho lymâ aw.

← Chapter 72 Jump to: Chapter 74 →