Job 1

Dagbani Bible (Naawuni Kundi Kasi)

Jump to: Chapter 2 →

1Do’ so daa be Uzi tiŋgbɔŋ ni, ka o yuli booni Ayuba. Doo maa daa nyɛla ŋun ka galimi, ka o biɛhigu be tibi zaa, ka o nyɛ ŋun zɔri Naawuni, ka bi tumdi zaɣ’ biɛɣu.

2O daa dɔɣila bidibis’ ayopɔin mini bipuɣins’ ata.

3O daa malila biŋkɔbbaligu tusaayopɔin mini laakumnim’ tusaata ni naɣilakɔra tuhili ni bunnyama kɔbisinu, ka mali tumtumdiba pam; ka lala zuɣu daa chɛ ka o nyɛ ninvuɣ’ titali gari wulimpuhili polɔnim’ zaa.

4O bidibisi maa daa yi chanila tab’ yinsi ti puhiri churi sokam dabisili dali, ka daa yi timdi booni bɛ tizɔpaɣiba maa na ka bɛ mini ba ti diri ka nyura.

5Bɛ daa yi puhi chuɣu maa naai, Ayuba timdimi ka bɛ chaŋ ti mali ba ka bɛ niŋ kasi. O daa yi daŋdila yibu asibaasi n-chaŋ ti mali sara o bihi maa zaa yino kam zuɣu; dama Ayuba daa yɛlimi, “Di pa shɛli ka m bihi maa ti tu Naawuni bɛ suhuri ni n-tum alahichi.” Lala ka Ayuba daa kul niŋda.

6Dahin shɛli ka malaikanim’ daa ti laɣimna ni bɛ ti zaŋ bɛmaŋ’ wuhi Yawɛ, ka Sintani gba daa kana ti pahi bɛ zuɣu.

7Ka Yawɛ daa bɔhi Sintani, “Ya polo ka a lee yina?” Ka Sintani garigi yɛli Yawɛ, “N yila dunia ni na, n chaŋmi ti gɔŋgo ka chaŋchaŋ gili di ni.”

8Ka Yawɛ daa lan bɔhi Sintani, “A tɛhi n dabili Ayuba yɛla? So bi ŋman’ o dunia ni. O nyɛla ŋun ka galimi ka o biɛhigu be tibi zaa, ka o nyɛ ŋun zɔri Naawuni, ka bi tumdi zaɣ’ biɛɣu.”

9Di saha ka Sintani daa garigi bɔhi Yawɛ, “Ayuba Naawuni zɔbo maa nyɛla yoli?

10Pa nyini n-sa gariche gili Ayuba min’ o malibu ni o ni su shɛlikam zaa luɣilikam? Nyini n-niŋ alibarika niŋ o tuma ni, ka chɛ ka o buni galisi pam tiŋgbɔŋ maa ni.

11Amaa a yi zaŋ a nuu shih’ o ni mali shɛlikam maa zaa pumpɔŋɔ, o ni tu a a ninni.”

12Ka Yawɛ yɛli Sintani, “Di viɛla, a mali o ni su binshɛlikam maa zaa yiko, amaa lee miri ka a zaŋ a nuu shih’ o.” Di saha ka Sintani daa yi Yawɛ sani chaŋ.

13Dahin shɛli ka Ayuba bidibisi maa min’ o bipuɣinsi maa daa ti be bɛ biɛlikpɛm’ yiŋa n-diri bindira ka nyuri wain;

14ka tumo daa ti kana ti yɛli Ayuba, “Ti di malila naɣilahi la kɔra, ka bunsi la ʒe m-baɣi ba ŋubiri mɔri,

15ka Sabinim’ kana ti lu bɛ zuɣu n-zaŋ takɔbi ku tumtumdiba maa ka taɣi ba chaŋ, n kɔŋko n-nyɛ ŋun zo n-tiligi kana ni n ti yɛl’ a.”

16O ni daa na kul yɛri maa, ka so lan kana ti yɛli, “Naawuni buɣim n-yi zuɣusaa na ti di n-ku piɛri la mini piɛguliba la zaa, n kɔŋko n-nyɛ ŋun zo n-tiligi kana ni n ti yɛl’ a.”

17O ni daa na kul yɛri maa, ka so lan paana ti yɛli, “Kalidianim’ laɣimla tab’ ʒiibuta zuɣu n-kana ti lu laakumnim’ la zuɣu n-zaŋ takɔbi ku bɛn guli ba maa, ka taɣi ba chaŋ, n kɔŋko n-nyɛ ŋun zo n-tiligi kana ni n ti yɛl’ a.”

18O ni daa na kul yɛri maa, ka so lan paana ti yɛli “A bidibisi la min’ a bipuɣinsi la bela bɛ biɛlikpɛm’ la yiŋ’ diri bindira, ka nyuri wain,

19ka pɔhim kpiɔŋ ti yi mɔɣu polo na yim nti ʒe n-daai yili maa zaa luhi bipola maa zuɣu, ka bɛ kpi. N kɔŋko n-nyɛ ŋun tiligi kana ni n ti yɛl’ a.”

20Di saha ka Ayuba daa yiɣisi zani n-darigi cheeg’ omaŋmaŋ’ binyɛrigu, ka pini o zuɣu, ka gbani tiŋa n-jɛm Naawuni,

21ka yɛli, “N zaɣim ka m ma daa dɔɣi ma, n zaɣim ka n ti lan yɛn zaŋ yi dunia ni. Yawɛ n-daa ti ma, Yawɛ n-lan deei. Yawɛ yuli simdi paɣibu.”

22Yɛla ŋɔ zaa puuni, Ayuba daa bi tum alahichi bee n-galim Naawuni ni o ni niŋ shɛm maa bi tuhi.

Jump to: Chapter 2 →