Job 13

Dagbani Bible (Naawuni Kundi Kasi)

← Chapter 12 Jump to: Chapter 14 →

1Nyama, n nini nya dimbɔŋɔ zaa, ka n tiba wum, ka m baŋ di gbinni.

2A ni mi shɛli, n gba mi li. M pala ŋun pooi daadam a sani.

3Amaa n ni tɔɣisila Kpiɔŋlan’ Naa yɛtɔɣa, n yuya ni n yɛtɔɣa maa tɔɣisila Naawuni sani.

4Yinim’ bɛna, yi zaŋla ʒiri leei situra ye; yi zaa nyɛla timalaannim’ bɛn ka buchi.

5Yi yi di fo yi noya, di naan leei yi baŋsim.

6Pumpɔŋɔ wummiya n ni mali yɛtɔɣ’ shɛli, ka gbilisiya tibili wum fabila shɛŋa din yɛn yi n noli ni na.

7Yi ni tooi zani Naawuni zaani n-tɔɣisi ʒiri yɛtɔɣa, bee n-zan’ o zaani tɔɣisi yɔhiŋ yɛtɔɣa?

8Yi ni tooi gaŋ niriba ti o? Yi ni tooi zabi Naawuni zuɣu?

9O yi vihi ya, di ni viɛl’ yi zuɣu? Bee yi ni tooi yɔhim o kaman niriba ni yɔhindi tab’ shɛm la?

10Biɛhiŋ kani, yi yi tum niriba gaŋbu tuun’ shɛli ashilɔni, o ni darigi yi tibili.

11O nam dariza bi mali ya dabiɛm, ka dabiɛm gbahi ya o zuɣu?

12Yi yɛlimaŋli yɛtɔɣa nyɛla tampiligim ŋaha, ka yi ni zaŋ shɛli taɣi yimaŋ’ nyɛla yaɣiri.

13Chɛliya ma vuri ka n yɛli, ka chɛ ka din yɛn niŋ ma niŋ ma.

14N ni zaŋ n nyɛvili niŋ barina shee, ka zaŋ n nyɛvili niŋ mmaŋmaŋ’ nuu ni.

15Nyamiya, o ni ku ma; n lan ka tahima yaha. Amaa n ni zabi n soli zuɣu hal ni o tooni.

16Dimbɔŋɔ n-yɛn nyɛ n tiliginsim; dina n-nyɛ ni ninvuɣ’ biɛɣu ku paag’ o sanna.

17Gbilisimiya tibili viɛnyɛliŋga n-wum n yɛtɔɣa, ka chɛliya ka n ni tɔɣisiri yɛtɔɣ’ shɛŋa ŋɔ kpe yi tiba ni.

18M mali n yɛtɔɣa shili, m mi ni bɛ ni wuhi ni n ka galimi.

19So beni n-ni tooi ŋme ma naŋgbankpeeni? Dindina n ni fo n noli, ka kpi.

20N Naawuni, n suhir’ a ni a kul tim ma bini diba ayi kɔŋko, di nyaaŋa n ku lan sɔɣi mmaŋa a sani.

21Zaŋm’ a nuu chaŋ katiŋ’ ka chɛ ma, ka di lan chɛ ka a yɛla mali ma dabiɛm.

22Di saha a yi tɔɣisi ma yɛtɔɣa, n ni garig’ a, bee chɛ ka n tɔɣis’ a yɛtɔɣa, ka a garigi ma.

23N tuumbiɛri mini n daalahichi lee nyɛla diba ala? Chɛ ka m baŋ m biriginsim mini n daalahichi.

24Bɔ n-niŋ ka a zaŋ a nini sɔɣi, ka zaŋ ma leeg’ a dima?

25A ni varisi pɔhim ni ʒe n-tɔhigi va’ shɛli bahi, ka kari doli wurigu din kuui?

26Dama a sabi yɛl’ shɛŋa din to pam jɛndi ma, ka chɛ ka n di wahala n ni daa tum tuumbiɛ’ shɛŋa m bilim ni la zuɣu.

27Nyini n-zaŋ bandi ba n naba, ka lihiri n ni doli so’ shɛŋa zaa; ka zahindi n napɔna bɔba.

28Daadam bahirila yoli kaman bin’ pɔŋ la, ka ŋmani lɛla ni yi ŋubi chahi situra shɛli.

← Chapter 12 Jump to: Chapter 14 →