Job 29

Dagbani Bible (Naawuni Kundi Kasi)

← Chapter 28 Jump to: Chapter 30 →

1Ka Ayuba daa lan gbaai yɛtɔɣa tɔɣisibu yɛli,

2“M bi zaɣisi ka m biɛhigu di be kaman di ni daa pun be shɛm la, kaman saha shɛli Naawuni ni daa yuuni ma la;

3saha shɛl’ o firila ni daa ne n zuɣusaa, ka n dol’ o firila maa neesim gari zibisim ni la,

4n ni daa na mali yaa, ka Naawuni zɔtali na be n yiŋ’ la,

5Kpiɔŋlan’ Naa ni daa na be n sani, ka m bihi na be n san’ la,

6n ni daa mali bihim paɣiri n naba, ka doori kpam tampima zuɣu la.

7N daa yi chaŋ tiŋ’ puuni dunɔdali gbini nti zaŋ n kuɣ’ zali laɣiŋgu ni,

8Nachimba daa yi nya ma, bɛ labiri la nyaaŋa, ka ninkura yiɣisi ti ma jilima.

9Ka ninvuɣ’ zuɣuri chɛ yɛtɔɣa tɔɣisibu, ka zaŋ bɛ nuhi pɔbi bɛ noya.

10Ka nabihi kukoya daa fo, ka bɛ kɔŋ yɛtɔɣa tɔɣisibu.

11Ka ninvuɣ’ shɛb’ bɛn daa wum n yɛla, bɛ daa paɣi ma mi, ka bɛn nina daa nya ma mi di ma shɛhira.

12Dama n daa fa nandaamba bɛn kuhiri bahi, ka fa kpibisi bɛn ka ŋun ni sɔŋ ba bahi.

13Ninvuɣ’ so ŋun daa yɛn kpi daa suhi alibarika niŋ n ni, ka n daa chɛ ka pakoya yili yila ni suhupiɛlli.

14N daa zaŋ wuntitali niŋ mmaŋa, ka di pili ma. N yɛlimaŋli tuma daa ŋmanila zabba mini baŋtabiga.

15Mani n-daa nyɛ zoomba nina, ka nyɛ gbariti napɔna.

16N daa nyɛla nandaamba ba; ka daa zaani saamba nyaaŋa bɛ yɛla ni.

17N daa kabisi ninvuɣ’ biɛri nyina ka chɛ ka bɛ ni daa ŋubiri shɛb’ la yi n-luna.

18Di saha ka n daa tɛhi, ‘N ni ti kpila n tiɛɣu ni, ka ni ti chɛ ka n dabisa galisi kaman bihigu la.’

19N nyaɣa daa chaŋmi ti gbaai kom, ka maligim kul luri n wula zuɣu yuŋ zaa.

20N daa kul nyarila jilima, ka n kpiɔŋ kul be kaman tɔb’ palli la.

21Niriba daa chɛla vuri ka gbilisiri tibili guhiri n ni yɛn di ba kpamli alizam’ shɛli.

22N daa yi tɔɣisi yɛtɔɣa, so ku lan tɔɣisi yɛtɔɣa di nyaaŋa, dama n yɛtɔɣa daa yi kpɛri ba pam.

23Bɛ daa guhiri ma mi kaman bɛ ni guhiri saa shɛm la. Bɛ suhuri daa kul yɛla n zuɣu kaman niriba suhuri ni ye siɣili saa zuɣu shɛm la.

24N daa lari niŋdi ba saha shɛli bɛ daa yi ti lan ka yɛda, ka n suhupiɛlli lihigu kpaŋsiri bɛ suhuri.

25Mani n-daa yi piiri bɛ ni bɔri shɛli tiri ba. Mani n-daa nyɛ bɛ zuɣulana. N daa bemi kaman naa m-be o tɔbbihi san’ la, ka be kaman ninvuɣ’ so ŋun maari bɛn fabindi suhuri la.

← Chapter 28 Jump to: Chapter 30 →