Job 30

Dagbani Bible (Naawuni Kundi Kasi)

← Chapter 29 Jump to: Chapter 31 →

1Amaa pumpɔŋɔ n ni kpɛm ninvuɣ’ shɛba m-maani ma ansarisi la; n ni daa yuli ʒiɛm shɛb’ banima, ka ku saɣi zaŋ ba pahi m bahi zuɣu ka bɛ doli m piɛri la.

2Nyo’ bɔ ka n daa naan tooi nya bɛ nuhi tuma ni? Bɛ yaa zaa daa naaya.

3Bɛ ni daa nyɛ faranima ka ka bindirigu diri zuɣu, bɛ daa nyirila taŋkpa’ kuma tiŋgbani nɛli ni.

4Bɛ daa wɔbirila giŋgaɣiri mini tuturi vari ni sɔɣu jila ŋ-ŋubira.

5Bɛ kari ba niriba ni bahi; niriba yɔhiri ba mi kaman tayiɣ’ la.

6Kulibɔn shɛŋa din kom nyuui mini tiŋgbani voya ni ni tampima voya ni n-nyɛ bɛ biɛhigu shee.

7Bɛ daa bela mɔɣu ni kuhiri kaman bunsi la, ka laɣim do gɔhi tihi gbinni.

8Ninvuɣ’ shɛb’ bɛn ka buchi, ka so bi mi bɛ yɛla, ka bɛ nyɛ bɛ ni daa fiɛbi ninvuɣ’ shɛb’ yihi tiŋgbɔŋ maa ni.

9Ka pumpɔŋɔ bɛ yiinila yila maani ma ansarisi, ka n leei bɛ ni maani so ansarisi.

10Bɛ zaɣisi ma, ka kaɣi ʒe kpaŋa ka chɛ ma. Bɛ bi zɔri dabiɛm ni bɛ tuhi nintɔri n tooni.

11Naawuni gbaɣisi n tɔbu ka filim ma, lala zuɣu ka bɛ liri ma ka binshɛli bi gu ba soli.

12Salo daa yiɣisi zani n nudirigu polo, bɛ daa kari ma bahi, ka ŋma n kubu pala sɔŋ.

13Bɛ ŋari n soli, ka luhi ma, ka bi bɔri so sɔŋsim.

14Bɛ kabi kana kaman tɔbbihi n-doli gooni voli ni kpɛna la; binshɛɣukam ni daa luri saha shɛl’ la, ka bɛ daa kul kabirina.

15Dabiɛm gbaai ma, n jilima zoya kaman pɔhim n-ʒe li chaŋ la, ka n tɔŋsim zo kaman sagbani n-fuɣi gari la.

16Ka pumpɔŋɔ n shia yɛn siɣi; ka wahala dabisa gbaai ma gbibi.

17Yuŋ nyoorila n kɔb’ tuɣa ni; ka biɛrim shɛli din dimdi ma bi naara.

18O darigi deei m binyɛrigu, o ʒe n-dila m binyɛrigu nyiŋgoli mali.

19O zaŋ ma luhi baɣiri ni, ka m be kaman taŋkpaɣu mini tampiligim la.

20N kuhi niŋ a m-bɔri sɔŋsim ka a bi garigi ma, ka n ʒiɛya ka a baɣa ka n ni.

21A leela ninkuunsilana zaŋ chaŋ n sani, ka niŋ ma alaka ni a yaa zaa.

22A chɛ ka pɔhim kpuɣi ma, ka chɛ ka m ba pɔhim maa, ka a tɔri ma gindi sanʒiɛɣu ni.

23M mi ni a ni chɛ ka n kpi n-kuli yili shɛli a ni zaŋ zali nyɛvililan’ kam la ni.

24Biɛhiŋ kani, n na ʒi n-zaɣisi nandaamba sɔŋbu, bɛ yi ti be muɣisigu ni n-kuhiri bɔri sɔŋsim.

25N daa fabindi ninvuɣ’ shɛb’ bɛn be muɣisigu ni zuɣu, ka m puu biɛri nandaamba zuɣu.

26Amaa n ni daa yuuni bɔri zaɣ’ viɛlli saha shɛli, zaɣ’ biɛɣu n-daa paai ma; ka n ni daa guhiri neesim saha shɛli, zibisim n-daa ti kana.

27N suhu dammi, ka bi lan doya; ka wahala dabisa kul paari ma.

28N kul bela zibisim ni chana ka wuntaŋ’ kani; ka n ʒe kpamba laɣiŋgu ni n-kuhiri bɔri sɔŋsim.

29N kpalimla yɔbahi mabia, ka nyɛ taatahi dolinikpee.

30N niŋgbuŋ gbaŋ leela zaɣ’ sabinli ŋ-ŋmaari lura, ka tulim diri n kɔba.

31N goonje kumsi leela fabila, ka n yua kumsi be kaman ninvuɣ’ shɛb’ bɛn kumdi kukoya.

← Chapter 29 Jump to: Chapter 31 →