Job 36

Dagbani Bible (Naawuni Kundi Kasi)

← Chapter 35 Jump to: Chapter 37 →

1Ka Ɛlihu daa lan yɛli,

2“Niŋmiya suɣilo biɛla ka n wuhi ya, dama n na malila yɛtɔɣ’ shɛli ni n zani Naawuni zaani yɛli.

3N yɛm maa yɛn yila katiŋ’ na, ka di wuhi ni ŋun nam ma nyɛla yɛlimaŋlilana.

4Dama yɛlimaŋli, m bi ŋmarila ʒiri, ŋun mi viɛnyɛliŋga be n sani.

5Yɛlimaŋli Naawuni nyɛla ŋun galisi ka mi bi ʒiɛm so, o yɛm galisiya pam.

6O bi chɛ ka ninvuɣ’ biɛri mali nyɛvili, amaa o zaŋdi bɛn diri wahala yɛlimaŋli tiri ba.

7O bi labir’ o nini kpaŋ’ ka chɛri wuntizɔriba, amaa o zaŋdi ba mi ʒiini bɛ nanim’ sani bɛ nam ʒiishɛhi, ka niriba duhiri ba sahakam.

8Ka bɛ yi ba ba bandi, ka bɛ be wahala mia ni,

9di saha ka o wuhiri ba bɛ tuma mini bɛ biriginsim ni nyɛ shɛm ni bɛ karimbaani ni nyɛ shɛm.

10O luɣi bɛ tiba, ka wuhi ba, ka zali ba ni bɛ zom’ yi alahichi ni labi o sanna.

11Bɛ yi wum ka jɛmd’ o, bɛ ni mali buni ni suhudoo hal ni bɛ nyɛvili tariga.

12Amaa bɛ yi zaɣisi, bɛ ni zaŋ takɔbi ku ba, ka bɛ kpi bɛmaŋmaŋ’ ʒilinsi zuɣu.

13Bɛn pa wuntizɔriba bɛn’ kul malila suhuyiɣisili; hal o yi lo ba mihi gba, bɛ bi suhir’ o bɔri sɔŋsim.

14Bɛ kpirila ninvuɣ’ kaha, ka bɛ nyɛviya bahigu nyɛla vi bahigu.

15O zaŋdi wahala n-fari bɛn be wahala ni bahira, ka zaŋdi nandahima n-yoori bɛ tiba.

16Ŋuna n-daa lan yih’ a wahala ni n-zaŋ a tahi palo ni be luɣ’ shɛli ka muɣisigu kani, ka nim’ kpaba daa pali a ŋman’ ni.

17Amaa bɛ ni kariti ninvuɣ’ biɛri saria shɛm m-pal’ a kɔbili ni, ka saria karibu mini yɛlimaŋli gbaag’ a.

18Miri ka a chɛ ka liɣiri yɔhim’ a, a mi di chɛ ka birapu pam dibu kpɛh’ a yɔɣu.

19A kuhigu maa nyɛla din ni sɔŋ yih’ a muɣisigu ni bee a yaa zaa n-ni ti a sɔŋsim?

20Miri ka a bɔri ni yuŋ zibi din nyɛ din ʒiri niriba chani la.

21Mira! Di lan tum tuumbiɛri; di zuɣu ka bɛ zaŋ wahala zahim’ a maa.

22Nyama, Naawuni nyari tibigibu o yiko puuni. Karimba ŋuni n-lee paag’ o?

23Ŋuni n-daa lee wuhi Naawuni o soli ni nyɛ shɛm, bee ŋuni n-lee ni tooi yɛli Naawuni, ‘A tum gala’?

24Miri ka a tam ka bi paɣi Naawuni o tuma zuɣu, dama niriba pun yiinila wumpaɣibo yila zaŋ chaŋ di polo.

25Sokam daa yul’ o tuma maa, sokam daa ʒiɛla katiŋa ka yuuni li.

26Yɛlimaŋli, Naawuni galisiya, ka ti ku tooi baŋ o yuma tariga.

27Dama ŋuna n-zaŋdi kom duri zuɣusaa, ka chɛ ka di leeri sakom

28din nyɛ sagbana ni kpaari shɛli bahira, ka di luri ninsalinim’ zuɣu na pampam.

29So ni tooi baŋ saa ni kuri shɛm bee saa tahigu din yiri Yawɛ biɛhigu shee suɣili ni na?

30Nyama, ŋuna n-chɛ ka saa nyaɣisiri gind’ o, ka chɛ ka teeku puuni nyaɣa limsi.

31Dama dimbɔŋɔ ka o zaŋ su niriba; o tiri ba bindirigu pam.

32O zaŋ saa nyaɣisibu gbib’ o nuu ni n-chɛ ka di nyaɣisir’ o ni zal’ li luɣ’ shɛli polo.

33Di tahigu maa nyɛla din yɛr’ o yɛla, ka niɣi gba mi ni saa kanna.

← Chapter 35 Jump to: Chapter 37 →