Job 24

Dagbani Bible (Naawuni Kundi Kasi)

← Chapter 23 Jump to: Chapter 25 →

1Bɔzuɣu ka Kpiɔŋlan’ Naa bi zali saria karibu saha? Ka bɔzuɣu ka bɛn mi o na ʒi n-nya o ni zali saha dabisa shɛŋa ni?

2Ninvuɣ’ biɛri nahiri tintarisi vulɔnima, ka fari biŋkɔbbaligu n-zaŋdi ba chani ka bɛ ti ŋubiri mɔri bɛmaŋmaŋ’ biŋkɔbiri mɔri ŋubbu shee.

3Bɛ taɣi kpibiga buŋ’ chaŋ, ka deei pakoli nahu talima.

4Bɛ daai nandaamba baɣili palli kpaŋa, ka nandaamba zaa zo n-sɔɣi.

5Bɛ yirimi chani bɛ tuma ni kaman mɔɣu ni bunsi m-be tiŋgban’ nɛli ni la m-bɔri bindirigu tiŋgban’ shɛli din chaɣisi puuni ni bɛ ti ti bɛ bihi.

6Bɛ gahindila bindira pu’ shɛŋa din pa bɛ dina ni, ka yihiri wain tiwal’ yiha ninvuɣ’ biɛɣu wain tihi puu ni.

7Bɛ doonila bɛ zaɣim yuŋ kam, ka ka situra. Bɛ ka binshɛli din ni pili wari saha.

8Ka zoya ni saa buri ba, ka bɛ ka bɛ ni yɛn kpe shɛli yi saa bubu ni, ka baɣila tampima.

9Bɛna n-nyɛ bɛn darigiri gbabigiri kpibisi bɛ manim’ biha ni, ka deeri nandaamba biliɛri talima.

10Bɛ chanila bɛ zaɣim, ka ka situra, ka ʒiri kabɔba, ka kum mali ba.

11Bɛ bela bɛ olivi tihi folinsi ni n-kahindi kpam, ka kahindi wain, amaa ka kɔnyuri kuri ba.

12Ninvuɣ’ shɛb’ bɛn yɛn kpi bela fɔŋ ni ŋuhira, ka bɛn mali dansi kuhiri bɔri sɔŋsim, amaa ka Naawuni baɣa ka bɛ suhigu ni.

13Bɛna n-nyɛ ninvuɣ’ shɛb’ bɛn zaɣisiri neesim la, bɛna n-nyɛ bɛn bi mili di soya ka bi ʒe di soya zuɣu la.

14Ŋun kur’ niriba yiɣisirila zaawuni n-chana ni o ku nandaamba mini faranima. Yuŋ yi paai, o ŋmanila tayiɣa.

15Zinaniŋda gba kul guhirila wuntaŋ’ lubu ka yɛra, ‘N je ni so nya ma.’ Ka zaŋ bini pili limsi o ninni.

16Yuŋ yi paai, bɛ chani kabirila yiya kpɛra, ka biɛɣu neei, ka bɛ kpari bɛmaŋ’ niŋ duri; bɛ bi mi neesim.

17Bumbɔni nyɛla asiba bɛ zaa sani, dama bɛ nyɛla bumbɔni mini dabiɛm zɔnima.

18‘Kopaliga zaŋ ba guui yomyom, ka noli di bɛ ni su tiŋgban’ shɛli, ka so napɔŋ bi lan no bɛ wain tihi puri ni yaha.’

19Sanzali mini biisim ni chɛ ka maligim kuuri shɛm, lala ka kpiimba biɛhigu shee gba darigiri deeri alahichinima.

20Bidɔɣirisurigu tam bɛ yɛla, ka zunzuya di ba ka bɛ nyaɣisa; ka so bi lan teeri bɛ yɛla; dinzuɣu ninvuɣ’ biɛtali lurimi kaman tia la.

21Bɛ nahindila paɣ’ so ŋun bi dɔɣi bihi, ka bi niŋdi pakoli zaɣi viɛlli.

22Amaa Naawuni yiko puuni o kuri wɔɣira. O yi tum o tuma, ninvuɣ’ biɛri kpirimi.

23Ŋuna n-chɛ ka bɛ be ni alaafee, amaa ka o lee pa nina lihiri bɛ tuma.

24Bɛ nyarila tibiginsim saha biɛla, di nyaaŋa ka bɛ chaŋ. Bɛ ni suui lu n-kuui kaman vari la; ka bɛ ŋmahi bɛ zuɣuri kaman ka’ zuɣuri la.

25Di yi pa lala ŋuni n-lee ni wuhi ni n nyɛla ʒirilana, ka wuhi ni n ni yɛli shɛm maa kani?”

← Chapter 23 Jump to: Chapter 25 →