Job 8

Dagbani Bible (Naawuni Kundi Kasi)

← Chapter 7 Jump to: Chapter 9 →

1Di saha ka Bilidad ŋun daa nyɛ Shua nir’ la daa garigi yɛli,

2“Bɔ saha ka a lee yɛn chɛ yɛtɔɣa tɔɣisibu? A noli ni yɛtɔɣa maa ŋmanila pɔhim.

3Naawuni nyɛla ŋun bi doli din tuhi? Bee Kpiɔŋlan’ Naa nyɛla ŋun bi doli din tuhi?

4A bihi maa daa tumla alahichi o sani, bɛ daalahichi maa tibidarigibo ni nyɛ shɛm ka o niŋ ba maa.

5A yi ni jɛm Naawuni, ka suhi Kpiɔŋlan’ Naa,

6a yi be kasi ka a biɛhigu be tibi zaa, biɛhiŋ kani, o ni ka a sanna nti labisi din simd’ a ti a.

7Hal a ni daa mali shɛm piligu ni la, a ni ti mali gari lala dahin’ shɛli.

8Dama bɔhimi ninkura nya bɛ yaannim’ ni daa mi shɛli.

9Dama ti kul nyɛla sɔhila niriba, ka bi mi shɛli; ti biɛhigu dunia ŋɔ ni ŋmanila mahim din vuura.

10Bɛ ni wuh’ a, ka yɛl’ a bɛ ni mi shɛlikam zaa.

11Kaɣili ni tooi zooi luɣ’ shɛli ka pa ni baa ni? Kaɣili ni tooi zooi viɛnyɛliŋga ka pa ni kom ni be luɣ’ shɛli?

12Ka di yi na mali puma ka bɛ bi chɛ li sɔŋ, di daŋdila mɔɣu kam kuubu.

13Ninvuɣ’ shɛb’ bɛn zaa tam Naawuni yɛla ŋmanila lala. Ninvuɣ’ shɛb’ bɛn baɣa ka Naawuni ni tahima ni zani tariga.

14Bɛ ni niŋ shɛli naani ka yaa, di ŋmanila kpatinariga yili.

15Ka so yi zaŋ omaŋ’ dalim kpatinariga yili di ni lu, ka so yi gbaa’ li di ku tooi zani.

16Ninvuɣ’ biɛri ŋmanila mɔri din zoori wuntaŋ’ nyeebu ni, ka bɛ nyaɣa teei ʒiɛvari puu ni.

17Bɛ nyaɣa vilivilila kuɣ’ duli, ka bɛ be tampima ni.

18Ka nira yi vuɣi ba bɛ biɛhigu maa shee, di nyaaŋa bɛ biɛhigu shee maa ni zaɣisi ba ka yɛli, ‘Man’ na ʒi n-nyan ya.’

19Nyama, ninvuɣ’ biɛri suhupiɛlli soya m-bala, ka bɛ yi yi dunia yili, shɛb’ ni kana ti zani bɛ zaani.

20Nyama, Naawuni ku zaɣisi ninvuɣ’ so ŋun ka galimi bee n-deei tuumbiɛrilana.

21O ni lan chɛ ka a lara, ka yɔri vuri ni suhupiɛlli.

22O ni dihi bɛn je a vi, ka ninvuɣ’ biɛri yiŋ’ ti ku lan beni.”

← Chapter 7 Jump to: Chapter 9 →