Job 5

Dagbani Bible (Naawuni Kundi Kasi)

← Chapter 4 Jump to: Chapter 6 →

1Bolimi pumpɔŋɔ, so beni ŋun ni garig’ a? Ka malaika ŋuni sani ka a lee yɛn ŋmaligi chaŋ?

2Yɛlimaŋli, sujee kuri jɛrigu, ka nyuli zabbu mi kuri ŋun ka yɛm.

3M pun nya jɛra ni maani bɛ biɛhigu shee, amaa ka n yɛli noli niŋ bɛ biɛhigu shee maa libigi ba.

4Bɛ bihi kul bela barina ni, ka bɛ mɔŋ’ ba nasara dunɔdali shee, ka so kani ŋun ni fa ba bahi.

5Ka kum ni mali ninvuɣ’ shɛb’ diri bɛ puri bindira, hal ka kpɛri gɔhi ni ti yihiri li; ka kɔnyuri ni mali ninvuɣ’ shɛb’ suhuri ye bɛ buni zuɣu.

6Dama zaɣ’ biɛɣu bi yirila taŋkpaɣu ni na, ka yɛlimuɣisira gba bi puhiri yiri tiŋgban’ ni na.

7Amaa bɛ dɔɣila ninsalinim’ niŋ yɛlimuɣisira ni, kaman buɣim ni yi tahi yiɣi zuɣusaa shɛm la.

8Man’ ŋuna, Naawuni ka n yɛn jɛmda, ka zaŋ n yɛla niŋ Naawuni nuu ni.

9Ŋuna n-tumdi tuun’ kara ka so ku tooi baŋ di ni nyɛ shɛm, ka tumdi alahiziba tuma din ka kalinli.

10Ŋuna n-chɛ ka saa luri tiŋgban’ ni, ka chɛ ka kom zɔri teeni puri.

11Ŋuna n-duhiri tarimba, ka tiri bɛn be nandahima ni nasara.

12Ŋuna n-saɣindi yɛmbimbiɛrinim’ ni lo nia ni bɛ tum tuun’ shɛli, ka di zuɣu chɛ ka bɛ nuhi bi diri nasara.

13Ŋuna n-gbaari yɛnnim’ bɛ yɛŋkiŋkabina ni, ka yɛŋkiŋkabinanim’ ni lo nia shɛŋa zaani tariga yomyom.

14Bɛ bela zibisim ni wuntaŋ’ ni, ka bɔbindi gindi wuntaŋ’ ni kaman yuŋ la.

15Amaa o fari nandaamba bɛ noya ni bahira, ka fara ba kpiɔŋlaannim’ nuu ni bahira.

16Ka di zuɣu chɛ ka tarimba mali tahima, ka putɔɣunim’ fo bɛ noya.

17Naawuni ni saɣisi ninvuɣ’ so mali suhupiɛlli. Dinzuɣu miri ka a ʒiɛm Kpiɔŋlan’ Naa saɣisigu.

18Ŋuna n-tiri dansi, ŋuna n-lan lɔri dansi maa yuma. Ŋuna n-ŋmɛri tiri dansi, amaa ka o nuu tibiri dansi maa.

19O ni yih’ a muɣisigu ni, ka barina shɛli ku shih’ a saha shɛlikam.

20Kum yi ti lu, o ni tilig’ a ka a ku kpi; tɔb’ tuhibu ni, o ni tilig’ a takɔbi kum ni.

21Bɛ ni zaŋ a sɔɣi ka zilinli fiɛbiga ku paag’ a, ka saɣiŋgu yi ti paag’ a, a ku zɔri li.

22A ni lari saɣiŋgu mini kum, ka ti ku zɔri dunia ŋɔ ni mɔɣu ni biŋkɔbiri dabiɛm.

23Dama a mini mɔɣu ni kuɣa ni ti lo tab’ alikauli. Ka a mini mɔɣu ni biŋkɔbiri ti be ni suhudoo.

24Ka a ti baŋ ni barina shɛli ka a yiŋa. Ka a yi ti kaag’ a piɛri, a ni nya ka bɛ zaa beni.

25Ka a ni ti lan nya ka a zuliya galisi. Ka a bihi ti galisi kaman mɔri ni galisi shɛm ŋɔ.

26A ni ti kurigi zaa ka naanyi dɔn’ a gballi ni kaman bɛ ni yi chɛ siŋkaafa ti sɔŋ siŋkaafabɔɣili ni shɛm la.

27Nyama, ti vihi dimbɔŋɔ nya, di nyɛla yɛlimaŋli. Wummi li, ka baŋ li amaŋmaŋa.”

← Chapter 4 Jump to: Chapter 6 →