Job 32

Dagbani Bible (Naawuni Kundi Kasi)

← Chapter 31 Jump to: Chapter 33 →

1Niriba ata maa daa bi lan garigi Ayuba o ni daa wuhi ni o ka taali maa zuɣu.

2Di saha ka Barakɛl bia Ɛlihu suhu daa yiɣisi. O daa nyɛla Buz daŋ ni nira, ka yi Ram malibu ni na. O suhu daa yiɣisimi bahi Ayuba zuɣu, o ni daa wuhi ni o ka taali, amaa ni Naawuni m-mali taali la zuɣu.

3O suhu daa lan yiɣisi bahi Ayuba zɔnim’ ata la gba zuɣu bɛ ni daa bi tooi garigi Ayuba maa zuɣu; hal bɛ ni daa yɛli ni Ayuba mali galimi maa zaa yoli.

4Ɛlihu daa guhirimi ni bɛ naai pɔi ka o naanyi tɔɣisi Ayuba yɛtɔɣa, dama bɛna n-daa nyɛ ninkura.

5Amaa Ɛlihu ni daa nya ka niriba ata maa ni so bi yaag’ o noli garigi maa zuɣu ka o suhu daa yiɣisi.

6Ka Barakɛl ŋun daa nyɛ Buz daŋ ni nir’ la bia Ɛlihu maa daa garigi yɛli, “Man’ nyɛla bia, ka yi mi nyɛ ninkura, dinzuɣu ka n di zɔri dabiɛm ka shini, ka bi yɛli ya din be n suhu ni maa.

7N di yɛlimi, ‘Chɛ ka ninkura tɔɣisi yɛtɔɣa, ka chɛ ka bɛn yuma galisi pam mi wuhi yɛm.’

8Amaa yɛlimaŋli shia din be daadam ni, ka nyɛ Kpiɔŋlan’ Naa vuhim ŋɔ n-chɛ ka daadam baŋdi binyara.

9Di pala ninkura kɔŋko m-mali yɛm bee bɛn gbaai kpamli kɔŋko m-mi din tuhi.

10Dinzuɣu n yɛriya mi, ‘Wummiya; chɛliya ka n gba yɛli din be n suhu ni.’

11Nyamiya, n di kul guhirila yi ni yɛn yɛli shɛm, ka gbilisiri tibili ni n wum yi yɛtɔɣa, saha shɛli yi ni di na tɛhiri yi ni yɛn yɛli shɛm la.

12N di kul gbilisirila tibili, amaa yɛlimaŋli, yi ni so bi wuhi ni Ayuba mali taali bee n-garig’ o yɛtɔɣa maa shɛli.

13Amaa miriya ka yi ti yɛli, ‘Ti mali yɛm, Naawuni n-ni nyaŋ o, pa daadam.’

14Pa mani ka o di tɔɣisiri yɛtɔɣa maa jɛndira, ka n ku zaŋ yi yɛtɔɣa maa garig’ o.

15Bɛ kɔba ni chɔɣisiya, bɛ bi lan garigi shɛli. Bɛ lan ka yɛtɔɣ’ shɛli din ni yɛli.

16N kul guhima, bɛ ni ka yɛtɔɣ’ shɛli din ni yɛli maa zuɣu? Bee bɛ ni ʒiɛya ka bi lan garigi n-yɛli shɛli zuɣu?

17Man’ gba ni garigi, Man’ gba ni yɛli din be n suhu ni.

18Dama m mali yɛtɔɣa pam, ka n ku chɛ li tɔɣisibu.

19N suhu ŋmanila wain koligu din pali wain, ka n yi bi tɔɣisi yɛtɔɣa, di ni tahi.

20Di simdi ka n tɔɣisi yɛtɔɣa ka nya faako. Di simdi ni n yaai n noli garigi.

21M bi yɛn pahi so zuɣu bee n-niŋ so naŋgban’ malisim.

22Dama n ʒi naŋgban’ malisim niŋbu, di yi nyɛ lala ŋun nam ma ŋɔ ŋun’ chɛ ka m bahi pumpɔŋɔ.

← Chapter 31 Jump to: Chapter 33 →