Job 34

Dagbani Bible (Naawuni Kundi Kasi)

← Chapter 33 Jump to: Chapter 35 →

1Di saha ka Ɛlihu daa lan yɛli,

2“Yinim’ yɛnnim’ ŋɔ, wummiya n ni yɛn yɛli shɛm ŋɔ. Yinim’ baŋdiba ŋɔ, gbilisimiya tibili,

3dama tibili zahindi yɛtɔɣa kaman zilinli ni zahindi bindira shɛm la.

4Chɛliya ka ti pii din nyɛ yɛlimaŋli, chɛliya ka ti maŋmaŋ’ lihi n-nya din viɛla.

5Dama Ayuba yɛliya, ‘N ka taali, ka Naawuni mɔŋ ma yɛlimaŋli.

6Hal n ni kul mali yɛlimaŋli maa zaa yoli, bɛ boli ma ʒirilana. Hal n ni bi tum alahichi maa yoli, n dɔro maa ka tibi kpaŋ.’

7Ŋuni n-lee ŋmani Ayuba n-nyuri ansarisi malibo kaman kom la?

8Ŋuni mini tuumbiɛtumdiba n-lee laɣim be, ka o mini ninvuɣ’ biɛri doli?

9Dama o yɛliya, ‘Nir’ yi jɛmdi Naawuni, di ka anfaani.’

10Dinzuɣu yinim’ bɛn mali yɛm ŋɔ, wummiya: Din’ kariya ka Naawuni tum tuumbiɛri! Din’ kariya ka Kpiɔŋlan’ Naa tum taali!

11Dama bɛ tuma ni nyɛ shɛm, di laara ka Naawuni yɛn ti ba, ka darigi bɛ tibili kaman bɛ tuma ni nyɛ shɛm.

12Yɛlimaŋli, Naawuni ku tum tuumbiɛɣu; Kpiɔŋlan’ Naa ku ti nimmira yɛlimaŋli.

13Ŋuni n-lee zaŋ dunia ŋɔ niŋ o nuu ni? Ka ŋuni n-lee zaŋ dunia zaa fukumsi ti o?

14O yi di deeg’ o shia, ka deeg’ o vuhim,

15binnɛɔŋ kam naan laɣim kpi, ka daadam di labi taŋkpaɣu ni.

16Yi yi mali yɛm, yin’ wummiya dimbɔŋɔ. Wummiya n ni yɛn yɛli ya shɛm ŋɔ.

17Nira yi je yɛlimaŋli, o ni tooi su niriba? A ni galim ŋun nyɛ Wuntialana ka nyɛ Kpiɔŋlana?

18Ŋuna n-ni tooi yɛli naa, ‘A nyɛla ninvuɣ’ yoli’ ka yɛli kpambaliba, ‘Yi nyɛla ninvuɣ’ biɛri.’

19O nyɛla ŋun bi ʒe na’ so nyaaŋa ka chɛ so, bee n-lihi nya bundaamba ka chɛ nandaamba, dama bɛ zaa nyɛla o nuhi tuma.

20Bɛ kpibu bi to, yuntisuɣu ka niriba maa tabitabi kpi, ka bɛ zaŋ wɔɣira maa chaŋ ka di pala daadam nuu n-niŋ li.

21Dama o kul pala nina lihiri ninsalinim’ biɛhigu, ka nyari bɛ napɔna yaabu zaa.

22Zibisim shɛli kani bee bumbɔni, ka alahichinim’ ni tooi sɔɣi di ni.

23Dama Naawuni n-zaani saha shɛl’ o ni bɔri ni daadamnim’ kan’ o sanna ka o ti kariti ba saria.

24O wurindi wɔɣira ka bi vihiri ba, ka zaŋdi shɛb’ zaani bɛ zaani.

25O ni mi bɛ tuma zuɣu, yuŋ ka o ŋmɛri paari ba, ka ŋmɛri kabisiri ba.

26O darigiri bɛ tibili ka niriba nyara bɛ ninvuɣ’ biɛtali zuɣu;

27dama bɛ ŋmaligiya ka chɛ o dolibu, ka bɛ baɣa lan ka o soya ni.

28Bɛ chɛ ka nandaamba kumdi niŋd’ o, ka o wum bɛ ni niŋdi shɛb’ alaka kuhigu.

29Ka o yi shini, ŋuni n-lee ni tooi galim’ o? Ka o yi zaŋ o nini sɔɣi, ninvuɣ’ so beni ŋun ni tooi nya o? Amaa ŋuna n-su daadamnim’ mini zuliya kam zaa,

30ka di zuɣu chɛ ka ninvuɣ’ biɛɣu ku tooi su niriba, bee m-bariti niriba zana.

31Dama so na mi n-yɛli Naawuni, ‘N nyɛla alahichilana, amaa n ku lan tum lala yaha.

32Wuhim’ ma n ni bi nyari shɛli, di yi nyɛla n tumla tuumbiɛri, n ku lan tum lala yaha’?

33Dindina a ni bi saɣi Naawuni ni niŋ shɛli zuɣu, a tɛhiya ni a ni tooi chɛ ka o niŋ a ni bɔri shɛli? Nyini n-ni pii, pa mani, dinzuɣu yɛlim’ a ni mi shɛli.

34Ninvuɣ’ shɛb’ bɛn mali yɛm mini ninvuɣ’ shɛb’ bɛn mali baŋsim yi wum n ni yɛli shɛm ŋɔ, bɛ ni yɛli ma,

35‘Yɛm ka Ayuba ni tɔɣisiri yɛtɔɣ’ shɛŋa maa ni, o yɛtɔɣa maa ka gbinni.’

36M bi zaɣisi ka bɛ di kari Ayuba saria hal ti naai, dama o garigibu maa ŋmanila ninvuɣ’ biɛɣu ni garigiri yɛtɔɣa shɛm.

37Dama o zaɣisila Naawuni m-pah’ o ni tum alahichi shɛli maa zuɣu. O bela ti sani m-maani Naawuni ansarisi, ka yɛr’ o zilima pahira.”

← Chapter 33 Jump to: Chapter 35 →