Job 9

Dagbani Bible (Naawuni Kundi Kasi)

← Chapter 8 Jump to: Chapter 10 →

1Di saha ka Ayuba daa garigi yɛli,

2“Yɛlimaŋli, m mi ni lala n-nyɛ li, Amaa wula ka ninsal’ lee yɛn tooi nyɛ ŋun ka taali Naawuni tooni?

3So yi bɔr’ ni o ŋme o naŋgbankpeeni, o ni bɔh’ o bɔhigunim’ tuhili, ka o ku tooi garigi bɔhigu yini gba.

4O mali yɛm o suhu ni, ka o kpiɔŋ galisi; ŋuni n-na mi m-mo o ka di nasara?

5Ŋuna ŋun yiɣisiri zoya ka zoya maa bi mi di yɛla ŋɔ, o suhuyiɣisili puuni ka o lɛbiri li pilina.

6Ŋuna n-damdi dunia ŋɔ di zaashee, ka di daantalisi sɔhira.

7Ŋuna n-zaani wuntaŋa ka o bi nyeera, ŋuna n-chɛ ka saŋmarisi bi peera.

8O kɔŋko n-daa yɛrigi sagbana, ka no teeku kɔgbana sɔŋ.

9Ŋuna n-daa nam saŋmar’ shɛb’ bɛn laɣim be ka bɛ booni ba ‘Gbuɣinli la’ mini saŋmar’ shɛb’ bɛn laɣim be ka bɛ booni ba ‘Jɛŋgbini’ la, ni saŋmaribihi shɛba bɛ ni booni ‘Gbiŋgbiŋ min’ o bihi bɛn nyɛ nudirigu polo saŋmarisi la.

10Ŋuna n-tumdi tuun’ kara din gari ninsal’ yɛm, ka tumdi alahiziba tuma din ka kalinli.

11Nyama, o garitila n sani, ka m bi nyar’ o; o chana, amaa ka m bi mi ni o beni.

12O darigiri deera, ka ŋuni n-lee ni tooi gu o soli? Ŋuni n-lee ni tooi bɔh’ o, ‘Bɔ ka a lee niŋdi maa?’

13Naawuni ku chɛ ka o suhuyiɣisili maai; o nyaŋ ninvuɣ’ shɛb’ bɛn sɔŋdi Reehab la.

14Ka wula ka n lee yɛn niŋ garig’ o, bee n nya yɛtɔɣa tɔɣis’ o?

15Hal n ni kul ka taali maa zaa yoli n ku tooi garig’ o. N naɣ’ ni suhila ŋun zaŋ ma taali maa, ka o zo ma nambɔɣu.

16N yi bol’ o ka o saɣi, m bi niŋ yɛda ni o ni gbilisi tibili wum n yɛtɔɣa maa.

17Dama o chɛ ka sanʒiɛɣu ʒe n-kabisi ma, ka kul chɛ ka n dansi pahira, ka di ka daliri.

18O ku chɛ ka n vuhi lu m puuni, ka chɛ ka naŋgbantom kul paari ma.

19Di yi nyɛla yaa, ŋuna n-nyɛ ŋun mali yaa. Di yi nyɛla din tuhi dolibu, ŋuni n-lee ni tooi tah’ o ʒiishee?

20Hal n ni kul nyɛ ŋun ka taali ŋɔ zaa yoli mmaŋmaŋ’ nol’ ni yɛtɔɣa n-yɛn wuhi ni m mali taali. Hal n kul ka galimi maa zaa yoli ŋuna n-ni wuhi ni n kul bela galimi ni.

21N ka galimi, m baɣa kani. M bi lan bɔri n nyɛvili.

22Di zaa nyɛla yim, dinzuɣu ka n yɛli, ‘O kurila ninvuɣ’ suma mini ninvuɣ’ biɛri zaa.’

23Mbusim yi tahi kum libigirili na, ka ninvuɣ’ shɛb’ bɛn ka taali la nya wahala, o maani ba la ansarisi.

24O zaŋla dunia ŋɔ niŋ ninvuɣ’ biɛri nuu ni; o pɔbila di sariakaritiba nina; di yi pala ŋuna, ka ŋuni?

25N dabisa zɔri yomyom gari tizɔra; di kul zɔrimi gariti ka zaɣ’ viɛlli ka di ni.

26N dabisa maa zɔrimi gariti kaman ŋariŋ shɛli din zɔri pam la, di chanimi kaman tɔrili ni yi silim na ni o ti to binnɛɔŋ shɛm la.

27N yi yɛli, ‘N ni tam n fabila maa yɛla, ka yihi suhugarigu ŋɔ n suhu ni, ka mali suhupiɛlli,’

28n wahala ŋɔ zaa lan chɛmi ka dabiɛm mali ma; dama m mi ni a ku yɛli ni n ka taali.

29Bɛ ni ti wuhi ni m mali taali; ka bɔzuɣu ka n lan tumdi tuma yoli?

30N yi zaŋ chibo paɣi mmaŋa, ka zaŋ bɔchaa paɣi n nuhi,

31di zaa yoli, a ni zaŋ ma bahi daɣiri ni, ka mmaŋmaŋ’ situra gba zaɣisi ma.

32Dama o pala ninsala kaman n ni nyɛ ninsal’ shɛm ŋɔ, ka n ni tooi garigi yɛl’ o shɛli, bee ka m min’ o ni ti chaŋ ʒiishee.

33So ka ti sunsuuni ŋun ni tooi gooi ti.

34O yi di milig’ o jaaŋgbee ka chɛ ma, ka bi chɛ ka o yɛla kpɛhiri ma dabiɛm,

35dindina n ni tɔɣisi yɛtɔɣa, ka ku lan zɔr’ o dabiɛm, dama m mi ni m pala bɛ ni tɛhi ni n nyɛ so maa.

← Chapter 8 Jump to: Chapter 10 →