Job 21

Dagbani Bible (Naawuni Kundi Kasi)

← Chapter 20 Jump to: Chapter 22 →

1Di saha ka Ayuba daa garigi yɛli,

2“Gbilisimiya tibili viɛnyɛliŋga n-wum n yɛtɔɣa ŋɔ, ka chɛ ka dimbɔŋɔ n-nyɛ yi ni yɛn zaŋ shɛli maai n suhu.

3Timiya ma soli ka n tɔɣisi yɛtɔɣa, ka n yi tɔɣisi yɛtɔɣa maa naai, di nyaaŋa, yin’ malimiya ma ansarisi.

4Pa ninsal’ ka n fabindi niŋdi maa, ka bɔzuɣu ka n yɛn niŋ suɣilo?

5Lihimiya ma ka chɛ ka di gari ya, ka yi zaŋ yi nuhi pɔb’ yi noya.

6N yi tɛhi di yɛla, di gariti ma mi, ka dabiɛm mali ma, ka n ni’ sɔhira.

7Bɔzuɣu ka ninvuɣ’ biɛri beni hal ti kurigi ka kul mali yiko pam?

8Bɛ bihi ʒiɛla bɛ tooni, ka bɛ nina nya bɛ yaansi.

9Dabiɛm ka bɛ yinsi puuni, ka Naawuni bi darigiri bɛ tibili.

10Bɛ naɣilahi kul durila viɛnyɛliŋga, ka bɛ naɣinyama kul dɔɣira, ka na ʒi n-zaŋ bahi.

11Bɛ mali bɛ bihi yiri chani kaman biŋkɔbbaligu la, ka bɛ bihi maa yiɣiri jamda.

12Bɛ yiinila yila saɣisiri guŋgombihi mini mɔɣilo, ka kalambua kumsi niŋdi ba nyaɣisim.

13Bɛ zaŋ bɛ dahima zaa niŋla buni nyaɣisim dibu ni, bɛ ni ti chaŋ kpiimba biɛhigu shee ni suhudoo.

14Bɛ yɛrila Naawuni, ‘Zom ka chɛ ti! Ti bi bɔri ni ti baŋ a soli.’

15Bɛ yɛra, ‘Kpiɔŋlan’ Naa mi lee nyɛ bɔ ka ti jɛmd’ o? Ka ti yi suhir’ o, nyo’ bɔ ka ti lee yɛn nya?’

16Nyama, pa bɛ buni ka bɛ gbibi bɛ nuhi ni maa? Man’ kul ku deei ninvuɣ’ biɛri yɛtɔɣa.

17Ninvuɣ’ biɛri firila na mi n-kpi? Bɛ na mi n-nya ashaara? Ka Naawuni suhu na mi n-yiɣisi ka o chɛ ka biɛrim paai ba?

18Bɛ na mi m-be kaman pɔhim ni ʒiɛri mɔ’ shɛŋa ka be kaman wurigu ka pɔhim ʒe n-chaŋ la?

19Yi yɛliya, ‘Naawuni zaŋla bɛ zaɣ’ biɛɣu maa sɔŋ gu bɛ bihi; chɛ ka o zaŋ li labisi yo ba ka bɛ baŋ li.’

20Chɛ ka bɛmaŋmaŋ’ nini nya bɛ bahigu, ka chɛ ka bɛ nyu Kpiɔŋlan’ Naa suhuyiɣisili.

21Dama bɛ chira tariga yi ti paai, bɛ baɣa bɔ n-lee lan be bɛ malibu ni, bɛ kalinsi nyaaŋa?

22So ni tooi wuhi Naawuni ŋun kariti wɔɣira saria ŋɔ yɛm?

23So mi n-nyɛ bundana, ka mali suhudoo ka binshɛli yɛla bi muɣis’ o, ka o ti kpi.

24O kum maa saha, o kul yɛn ŋmɛlimmi, ka o kɔba ni kpam kul maha.

25Ka so mi beni, o ka suhupiɛlli, ka ti kpi ni suhugarigu.

26Bɛ zaa mi yɛn dɔnila taŋkpaɣu ni, ka zunzuya di ba.

27M mi yi tɛha mini yi ni lo nia shɛli na ni yi ti birigi ma.

28Dama yi bɔhira, ‘Nabia maa yil’ la be ya? Ninvuɣ’ biɛɣu maa ni daa be yili shɛl’ ni la lee be ya?’

29Yi na bi bɔhi ninvuɣ’ shɛb’ bɛn nyɛ sochandiba? Yi bi saɣi bɛ ni yɛli shɛm

30ni ashaara dali ninvuɣ’ biɛri bɛn’ tiligirimi, ka nyari faako suhuyiɣisili dali?

31Ŋuni n-lee ni wuhiri ba bɛ galimi ni nyɛ shɛm bɛ ninni? Ka ŋuni n-lee yɔri ba bɛ tuma samli?

32Ka bɛ yi ti zaŋ ba sɔɣi gballi ni, bɛ gulila bɛ gballi maa.

33Vinvamli ni taŋkpaɣu niŋdi ba la nyaɣisim, ka sokam ni doli bɛ nyaaŋa. Ka ninvuɣ’ shɛb’ bɛn pun daŋ tooni ka kalinli.

34Ka wula ka yi ni tooi zaŋ binshɛŋa din ka buchi ŋɔ maai n suhu? Yi lan ka yi ni yɛn garigi ma shɛm naɣila ʒiri kɔŋko.”

← Chapter 20 Jump to: Chapter 22 →