Job 22

Dagbani Bible (Naawuni Kundi Kasi)

← Chapter 21 Jump to: Chapter 23 →

1Di saha ka Ɛlifaz ŋun daa nyɛ Tɛman nir’ la garigi yɛli,

2“Ninsal’ ni tooi mali buchi Naawuni sani? Ka hal ŋun mali yɛm ni tooi mali buchi o sani?

3A yi nyɛla wuntizɔra, nyaɣisim bɔ ka di lee tiri Kpiɔŋlan’ Naa? Bee a yi nyɛla ŋun ka galimi, nyo bɔ ka o yɛn nya di zuɣu?

4A tɛhiya ni a ni zɔr’ o zuɣu n-chɛ ka o kpahir’ a zuɣu ni, ka kariti a saria ŋɔ?

5Pa a ninvuɣ’ biɛtali ni galisi zuɣu? A tuumbiɛri ka tariga.

6Dama a deei talima a mabihi sani ka di ka daliri, ka deei bɛ situra sɔŋ ka chɛ ba bɛ zaɣim.

7A bi tiri di ni wum ninvuɣ’ shɛb’ la kom ka bɛ nyura, ka mɔŋdi kum ni mali shɛb’ bindirigu.

8Ninvuɣ’ shɛb’ bɛn mali kpiɔŋ n-su tiŋgbani, ka bɛ ni tiri ninvuɣ’ shɛb’ jilima be di ni.

9A kari pakoya bahi ni nuzaŋa, ka kabisi kpibisi bɔɣiri.

10Dinzuɣu ka tɔna do n-gil’ a, ka dabiɛm lu a zuɣu libig’ a,

11ka zibisim din ni chɛ ka a ku tooi nya mini kɔgbana lim a maa.

12Naawuni bi bela zuɣusaa ha? Nyam’ saŋmarisi bɛn be zuɣusaa ŋɔ ha ni be zuɣusaa ha shɛm!

13Dinzuɣu ka a bɔhira, ‘Bɔ ka Naawuni lee mi? O ni tooi kari saria zibisim titali puuni?

14Sagban’ tibisa lim o n-chɛ ka o bi nyara, ka be zuɣusaa kpaakpanyom ni chana.’

15A yɛn gbibila so’ kur’ shɛli ninvuɣ’ biɛri ni daa doli la?

16Bɛ daa kpiya ka bɛ saha na bi paai kaman kom ni ʒiri tanzaa chani shɛm la.

17Bɛ daa yɛlila Naawuni, ‘Wara ka chɛ ti.’ Bɔ ka Kpiɔŋlan’ Naa yɛn tooi niŋ ti?

18Di zaa yoli, ka o zaŋ bin’ suma pali bɛ yinsi. Amaa ninvuɣ’ biɛri ni lo shɛli ka n je.

19Wuntizɔriba nya li, ka bɛ suhuri paligi, ka bɛn ka taali lara, ka maani ba ansarisi yɛra,

20‘Ti dimnim’ maa kpiya, ka buɣim di bɛ ni kani ka chɛ shɛli.’

21Saɣimi ti Naawuni, ka tim sandaani niŋ o, ka bin’ viɛla lan ka a sanna.

22Deem’ o wuhibu din yir’ o nol’ ni na, ka zaŋ o yɛligu niŋ a suhu ni.

23A yi ŋmaligi labi Kpiɔŋlan’ Naa sani, o ni labis’ a zali a zaashe’ kurili ni. A yi yihi ninvuɣ’ biɛtali zaa a yiŋa,

24a yi zaŋ a salima bahi taŋkpaɣu ni, ka zaŋ salima din yi Ofiri na ti bahi kulibɔŋ kuŋ ni kuɣa zuɣu,

25ka zaŋ Kpiɔŋlan’ Naa leeg’ a salima min’ a daanzinfa din viɛli pam,

26dindina a ni lan nya suhupiɛlli Kpiɔŋlan’ Naa sani, ka kpuɣ’ a zuɣu lihi ŋun’ Naawuni.

27A ni suh’ o, ka o deeg’ a suhigu, ka a niŋ a ni daa po pɔri ni a ni niŋ binshɛŋa la.

28A yi lo ni a niŋ shɛli, di ni niŋ; ka neesim lan neei a soya zuɣu.

29Dama ninvuɣ’ shɛb’ yi nya filiŋ, a yɛrimi ni bɛ malila karimbaani, dama o tiligiri tarimba.

30Hal o ni fa bɛn mali taali bahi. Dinzuɣu yihim’ daɣiri a kɔbili ni ka o tilig’ a.”

← Chapter 21 Jump to: Chapter 23 →