Job 4

Dagbani Bible (Naawuni Kundi Kasi)

← Chapter 3 Jump to: Chapter 5 →

1Di saha ka Ɛlifaz ŋun daa nyɛ Tɛman nir’ la garigi bɔh’ o,

2“So yi buɣisi ni o yɛl’ a yɛtɔɣ’ shɛli a suhu ni miligi? Amaa ka ŋuni n-lee ni tooi chɛ yɛtɔɣa tɔɣisibu?

3Nyama, a wuhi niriba pam, ka kpaŋsi bɛn nuhi ka yaa.

4A yɛtɔɣa daa taɣiri bɛn tuuri zaana. A daa kpaŋsi bɛn duna ni ka yaa la.

5Amaa pumpɔŋɔ ka di ti paag’ a sanna, ka nyin’ ka suɣilo? Di shihir’ a mi, ka nyin’ yihi tahima.

6Pa a Naawuni zɔbo zuɣu n-chɛ ka a niŋ o naani? Pa a nimmaŋtali zuɣu n-chɛ ka a mali tahima?

7Pumpɔŋɔ tɛhima, ninvuɣ’ so ŋun ka taali na mi n-kpi? Bee ya polo ka bɛ mi n-zaɣisi ninvuɣ’ so ŋun biɛhigu tuhi?

8Kaman man’ ni nya shɛm, ninvuɣ’ shɛb’ bɛn kɔri zaɣ’ biɛɣu puu, ka biriti yɛlimuɣisira, dina ka bɛ ti yɛn chɛra.

9Naawuni vuhim ni ku ba, ka o suhuyiɣisili pɔhim di ba.

10Gbuɣinli chɛ ŋumbu, gbuɣindaa kukoli foya, ka gbuɣimpola nyina kabisi.

11Kum ku gbuɣinli ŋun mali yaa, ka gbuɣinnyaŋ bihi wurim.

12Ka n daa wum yɛtɔɣa kukolibil’ ni, ka n tibili daa wum di ni sɔɣiri yɛra.

13Yuŋ zahima yɛla tɛhibu puuni, saha shɛli niriba ni gbihi maai la,

14ka dabiɛm mini niŋgbuŋ sɔhibu daa paai ma din daa dam n kɔba ni zaa.

15Ka shi’ so daa gari n ninni baalim, ka n niŋgbuŋ ni kɔbiri yirigi.

16Ka shia maa daa kpalim zani, amaa n daa bi tooi baŋ di ŋmahiŋgbana ni nyɛ shɛm. Kɔtomsi shɛli n-daa ʒe n tooni, ka vuri daa fo, di saha ka n daa wum kukol’ shɛli ni yɛli,

17‘Daadam ŋun mali bahigu ŋɔ ni tooi be tibi gari Naawuni? Daadamnim’ ni tooi be kasi gari ŋun nam ba?

18Hal o bi dih’ o tumtumdib’ tabili, o nyar’ o malaikanim’ chirimbu,

19bɛ ni ti yɛrila ninvuɣ’ shɛb’ bɛn be taŋkpaɣu yiya ni, ka bɛ piligu shee nyɛla taŋkpaɣu ni, ka bɛ ni tooi no n-ku ba kaman zunzuli ŋɔ?

20Asiba zaŋ chaŋ zaawuni bɛ pun kpi. Bɛ kul kpirimi zaa, ka bi mi di yɛla.

21Bɛ nyɛla bɛn ka yɛm hal ti kpi, ka shɛb’ di bɛ nɛma fali.’

← Chapter 3 Jump to: Chapter 5 →