Job 16

Dagbani Bible (Naawuni Kundi Kasi)

← Chapter 15 Jump to: Chapter 17 →

1Di saha ka Ayuba daa garigi yɛli,

2“N pun wum dimbɔŋɔnim’ pam; yi zaa bɛn di yɛn maai n suhu ŋɔ nyɛla bɛn lan saɣindi n suhu pam.

3Yɛtɔɣ’ shɛŋa din ka buchi ka naabu? Bee bɔ n-lee muɣisi ya ka yi na kul tɔɣisiri yɛtɔɣa?

4Yi yi di be n ni be shɛm ŋɔ, n gba naan tooi yɛli kaman yi ni yɛri shɛm ŋɔ. N naan tooi yɛli ya yɛtɔɣa pam, ka vili n zuɣu niŋ ya.

5N naan tooi zaŋ n nol’ ni yɛtɔɣa kpaŋsi yi suhuri, ka n suhumaabo yɛtɔɣa naan ku yi biɛrim maa.

6N yi tɔɣisiri yɛtɔɣa, di bi maari biɛrim n niŋgbuŋ ni, ka n yi fo, di sɔŋsim lee nyɛ ma dini?

7Yɛlimaŋli, pumpɔŋɔ Naawuni naai ma zaa, o ku m mini bɛn be zaa.

8O gurim ma ʒili, ka di leei shɛhira jɛndi ma; ka n kɔɣisibu nyɛ din di shɛhira jɛndi ma.

9O suhu daa yiɣisiya, ka o lan je ma, ka dari tɔhi ma. O daa dim o nyina ni niŋ ma. O mirig’ o nina niŋ ma kaman o dima n-nyɛ ma la.

10Niriba yɛla bɛ noya gu ma, bɛ lab’ ma tapaɣisi din ku dɔni, ka laɣim tab’ liri ma.

11Naawuni zaŋ ma tila ninvuɣ’ biɛri, ka zaŋ ma niŋ putɔɣunim’ nuu ni.

12N daa malila suhudoo, ka o pirigi ma buyi, o daa gbaala n nyiŋgol’ ni n-zaŋ ma ŋme n-chɛrisichɛrisi, ka kul liriti ma.

13O peentɔriba tari gili ma, ka o bɔɣibɔɣi n yaannina, ka bi zo ma nambɔɣu. O puhigi m binsom bahi tiŋa.

14O kul tiri ma la dansi, o karitimi doli ma kaman tɔbbia la.

15N shɛla buɣu m-pɔbi mmaŋa, ka zaŋ n yaa sɔŋ taŋkpaɣu ni.

16N kuhimi ka n nina mɔhi, ka zibisim titali limsi n niŋkari,

17hal n ni bi tum taali, ka kul suhiri Naawuni viɛnyɛliŋga maa zaa yoli.

18Yaa tiŋgbani, miri ka a pi n ʒim; di chɛ ka n kuhigu zani soli.

19Hal pumpɔŋɔ n shɛhiralana bela alizanda ni, ka ŋun ʒe n nyaaŋa nyɛla ŋun be zuɣusaa.

20N zɔnim’ maani ma la ansarisi, ka n kuhi ni nintam niŋ Naawuni,

21ni o chɛ ka binshɛɣukam mali zani dɛde daadam mini Naawuni sani kaman nir’ min’ o ʒiʒiinikpee la.

22Dama di yi niŋ daba ayi n ni doli soli chaŋ ka ku lan labina.

← Chapter 15 Jump to: Chapter 17 →