2 Kings 1

Gussi (EBIBILIA ENCHENU) 2020

Jump to: Chapter 2 →

1Nyuma y’ogokwa kw’Ahabu abanto ba Moabu bakaanga koigwera Abaisraeli.

2Ahasia omoruoti akagwa goetera ase etirisa korwa ase akanyomba ka irongo k’enyomba yaye agwo Samaria, na akaba orwarete. Ase ayio agatoma abanto, akabatebia, “Genda ase Baali‐Sebubu, enyasae y’Ekironi, moyeborie gose ningwene korwa ase oborwaire obo.”

3Korende omomalaika bw’Omonene agatebia Elija Omotisibi, “Imoka ogende, oumerane nabanto baria omoruoti o Samaria atomire, obaborie: Inee! Nase ki mokogenda koboria Baali‐Sebubu, enyasae y’Ekironi? Nekiagera mokagete ng’a Nyasae tari ase Abaisraeli?

4Ase ayio aya naro Omonene atebire: Aye togoika korwa ase oborere obwo kwariina korende ekeene, goika okwe.” Bono Elija akagenda,

5na abanto baria batometwe bakairana gochia ase omoruoti, nere akababoria, “Ninki kiagera mwairana?”

6Barabwo bakairaneria, bakamotebia, “Omonto nachicha oumerana naintwe, ototebia ng’a toirane gocha asore, aye omoruoti gwatotomete, na kogotebia ng’a aya naro Omonene atebire: Nase ki ogotoma koboria Baali‐Sebubu, enyasae y’Ekironi? Nekiagera okagete ng’a Nyasae tari ase Abaisraeli? Ase ayio togoika korwa ase oborere obwo kwariina, korende ekeene, goika okwe.”

7Omoruoti akababoria, “Naki omonto oyio arenge, oyio ochicha oumerana nainwe, na obatebia amang’ana ayio?”

8Bakamoiraneria, “Igo abegete eganchwa eroisirie korwa ase amarionya, na bweboeretie orokini rwe riiyo kenema kiaye.” Omoruoti akabatebia, “Ekeene, oyio n’Elija Omotisibi.”

9Erio omoruoti agatomera Elija omotang’ani bw’abarwani esegi emerongo etano, amo nabarwani baye emerongo etano. Omotang’ani oria akanyora Elija oikaransete ase egechuria ki’egetunwa, akamotebia, “Aye omonto o Nyasae, omoruoti otebire ng’a otirimboke ogende asare.”

10Elija akairaneria omotang’ani oria bw’abarwani esegi emerongo etano, “Onye inche inde omonto o Nyasae, tiga omorero orwe igoro ogosambe na kogosiria, aye amo nabarwani bao emerongo etano.” Erio kegima omorero okarwa igoro, ogasamba omotang’ani oria amo nabarwani baye emerongo etano, okabasiria.

11Naende omoruoti agatoma omotang’ani onde bw’abarwani esegi emerongo etano, amo nabarwani baye emerongo etano. Nere agatiira, agatebia Elija, “Aye omonto o Nyasae, omoruoti ochikire ng’a otirimboke bwango, ogende asare.”

12Korende Elija akabairaneria, “Onye inche inde omonto o Nyasae, tiga omorero orwe igoro ogosambe na kogosiria, aye amo nabarwani bao emerongo etano.” Erio omorero okarwa igoro, ogasamba omotang’ani oria amo nabarwani baye emerongo etano, okabasiria.

13Naende omoruoti agatoma omotang’ani onde bw’abarwani esegi emerongo etano amo nabarwani baye emerongo etano; nere agatiira, na gaikire aroro agatung’ama inse akaumama ase obosio bw’Elija, akamosorora, akamotebia, “Aye omonto o Nyasae, nagosabire, tiga obogima bwane na obw’abasomba bao aba emerongo etano bobe obw’engencho enene asore.

14Rora omorero okarwa igoro ogasamba abatang’ani baria babere b’abarwani emerongo etano, amo nabarwani babo bonsi, korende koranche, tiga obogima bwane bobe obw’engencho enene asore.”

15Erio omomalaika bw’Omonene agatebia Elija, “Tirimboka, ogende amo nere; tobaisa komwoboa.” Erio Elija akaimoka, agatirimboka, akagenda amo nere ase omoruoti.

16Elija agatebia omoruoti, “Aya naro Omonene agoteba: Ekiagera aye gwatomire abanto koboria korwa ase Baali‐Sebubu, enyasae y’Ekironi, okarengereria ng’a Nyasae tari ase Abaisraeli okoboria amang’ana, aye togoika korwa ase oborere obwo kwariina, korende ekeene, goika okwe.”

17Ase igo Ahasia agakwa buna Omonene akwanete goetera ase Elija. Ahasia tabwate omwana omomura; ase igo Yoramu akaba omoruoti ase ribaga riaye, ase omwaka o kabere bw’okogamba kwa Yehoramu mosinto o Yehosafati, omoruoti bw’Abayuda.

18Bono amang’ana ande onsi igoro y’Ahasia, na aya akorete, nigo arikire ase Ebuku y’ogokora kw’Abaruoti b’Abaisraeli.

Jump to: Chapter 2 →