2 Kings 16

Gussi (EBIBILIA ENCHENU) 2020

← Chapter 15 Jump to: Chapter 17 →

1Ase omwaka o ikomi na gatano na kabere bw’okogamba gwa Peka, mosinto o Remalia, Ahasi mosinto o Yotamu, omoruoti bw’Abayuda, agachaka kogamba.

2Ahasi nigo arenge nemiaka emerongo ebere, ekero achagete kogamba, na akagamba emiaka etano nomo agwo Yerusalemu. Ere takorete ayare amaronge ase amaiso ’Omonene, Nyasae oye, buna Daudi sokoro yaye akorete,

3korende akabwatia chinchera chi’abaruoti b’Abaisraeli. Boigo agasamba omwana oye omomura akaba ekeng’wanso, koreng’ana nogokora gw’okogechia okwo abanto b’ebisaku banarete gokora, baria Omonene aseretie korwa ase Abaisraeli.

4Boigo akarua ebing’wanso na agasambera ubani agwo aase aimokererete igoro, na igoro ase ebigoro, na inse ya kera omote omobese.

5Resini, omoruoti bw’Abasiiria, na Peka, mosinto o Remalia, omoruoti bw’Abaisraeli, bakagenda korwania Yerusalemu, bakanaaria Ahasi, korende tibabua omochie.

6Ase engaki eria Resini, omoruoti bw’Abasiiria akairania omochie o Elati ase Abasiiria ase ogoseria Abayuda korwa Elati. Nyuma y’ayio Abasiiria bagacha komenya Elati; nao bamenyete goika rero iga.

7Ahasi agatoma abanto ase Tigilati‐Pileseri, omoruoti bw’Abaasuri, agateba, “Inche nomosomba oo, naende omwana oo. Inchuo ontoorie korwa ase okoboko kw’omoruoti bw’Abasiiria, na okw’omoruoti bw’Abaisraeli, aba bachire kondwania.”

8Boigo Ahasi akaimokia chifeta ne chitahabu, echio chianyorekanete ase enyomba y’Omonene, na ase chikungo chi’enyomba y’omoruoti, agachitoma chikaba ekeegwa ase omoruoti bw’Abaasuri.

9Omoruoti bw’Abaasuri akamwanchera, akagenda Damesiki, akayobua agoosa abanto b’aroro, akabaira gochia Kiri, agaita Resini.

10Ahasi omoruoti akagenda Damesiki koumerana na Tigilati‐Pileseri, omoruoti bw’Abaasuri, na ekero aroche egesasimero kiarenge aroro, agatoma omogwekano bw’egesasimero keria ase Uria omokuani, akaorokia boronge kegima buna kiaroisetigwe.

11Uria omokuani akaagacha egesasimero koreng’ana nomogwekano oria Ahasi omoruoti amotomerete korwa Damesiki, agakeroisia ritang’ani Ahasi ataraika aroro korwa Damesiki.

12Ekero omoruoti achete korwa Damesiki agakerora, akageika ang’e, akarua ekeng’wanso igoro yaye.

13Akarua ekeng’wanso kiaye ki’ogosambwa, na okoruegwa kwaye kw’endagera, naende akaumora okoruegwa kwaye gw’ekenyugwa, na akanyororokeria amanyinga ’ebing’wanso bi’omorembe igoro ase egesasimero.

14Na egesasimero gi’etaai kiarenge ase egati y’egesasimero keria ekeyia na ase enyomba y’Omonene, agakebeka ensemo ya sugusu y’egesasimero keria.

15Ahasi omoruoti agachika Uria omokuani, akamotebia, “Igoro ase egesasimero keria ekenene asambere ekeng’wanso ki’ogosambwa kia mambia, na okoruegwa kw’endagera kwa mogoroba, na ekeng’wanso ki’ogosambwa ki’omoruoti, na okoruegwa kwaye kw’endagera, amo nebing’wanso bi’ogosambwa bi’abanto bonsi b’ense eye, na okoruegwa kwabo kw’endagera amo nokw’ebinyugwa. Naende onyororokerie amanyinga onsi ay’ebing’wanso bi’ogosambwa na ay’ebing’wanso binde igoro yaye. Korende egesasimero keria gi’etaai ogentigere indore inki ndagekorere.”

16Uria omokuani agakora ayio onsi buna Ahasi omoruoti amochigete.

17Ahasi omoruoti akabutora emetobwa y’ebibekerero bi’ebituba, akarusia ebituba korwa aroro, akarusia negetuba keria ekenene giaterekereretwe igoro ase emegwekano ye chiombe yaroisirie korwa ase etaai akageterekerera inse aase atichire namagena.

18Oboeto bw’Egesona gi’Esabato bwatubire nekerama, obwo bwaagachire ase enyomba eria, na egesoero gia isiko ki’omoruoti, akabirusia korwa ase enyomba y’Omonene, ase engencho y’omoruoti bw’Abaasuri.

19Bono amang’ana ande onsi Ahasi akorete nigo arikire ase Ebuku y’ogokora kw’Abaruoti b’Abayuda.

20Ahasi akarara ase chisokoro chiaye chiararete, agatindekwa aase chiatindegetwe, ase Omochie o Daudi; na Hezekia, omwana oye omomura, akaba okogamba ase ribaga riaye.

← Chapter 15 Jump to: Chapter 17 →