2 Kings 23

Gussi (EBIBILIA ENCHENU) 2020

← Chapter 22 Jump to: Chapter 24 →

1Omoruoti agatoma abanto barangerie abagaaka bonsi b’Abayuda na aba Yerusalemu, bagasangererekana asare.

2Na omoruoti agatiira gochia ase enyomba y’Omonene amo n’Abayuda bonsi na abanto bonsi bamenyete Yerusalemu, na abakuani, na ababani, abanto bonsi, abake na abanene. Erio akabasomera amang’ana onsi aria arikire ase Ebuku eria y’Okobwatana kw’Ogotianania yanyorekanete ime ase enyomba y’Omonene.

3Omoruoti agatenena ang’e nesiiro, agakora okobwatana kw’ogotianania ase obosio bw’Omonene, ng’a mbabwatie Omonene na kobwata amachiko aye, na oborori bwaye, na emeroberio yaye echikire, bayakore ne chinkoro chiabo chionsi na emioyo yabo yonsi, mbakore amang’ana onsi aganeirie nokobwatana oko kw’ogotianania, ayarikire ase ebuku eye. Erio abanto bonsi bakaria eira ng’a mbabwate okobwatana koria kw’ogotianania.

4Erio omoruoti agachika Hilikia, omokuani omonene, na abakuani, abakonyi baye, na abarendi b’egesieri, barusie korwa ase Hekalu y’Omonene ebikorero bionsi biaroisetwe ase ogosasimera Baali na Asera, na erioba, na omotienyi, ne ching’enang’eni chionsi chia igoro. Nyuma y’ayio akabisambera isiko ya Yerusalemu, agwo ase egetii gia Kidironi, akaira ribu riabo Beteli.

5Naende akarusia abakuani barenge gosasima emegwekano, baria abaruoti b’Abayuda babegete gosambera ubani agwo aase aimokererete igoro ase emechie y’Abayuda na goetanana Yerusalemu; naboigo nabaria barenge gosamba ubani ase Baali, na erioba, na omotienyi, ne ching’enang’eni chionsi chia igoro.

6Boigo akarenta omote oria bw’Asera korwa ase enyomba y’Omonene, akayosokia isiko ya Yerusalemu, akayoira gochia ase Rikura ria Kidironi, akayosamunyorera aroro, akayosia okaba orotu; erio akaruta orotu orwo igoro ase chimbeera agwo ase abanto baare gotindekwa.

7Agatagora na koiyeria inse chinyomba chi’abasacha abanyaka baare korigania ase obosooku, echio chiarenge ase enyomba y’Omonene. (Ime ase chinyomba chiria abakungu barenge koroiseria Asera, enyasae eria enkungu, chiema.)

8Akarenta abakuani bonsi korwa ase emechie y’Abayuda, na ase ense yonsi korwa Geba goika Beeri‐Seba agakora aase onsi aimokererete igoro agwo ase abakuani barenge gosambera ubani akaba aatachenegeti. Na ebisasimero bi’aase aimokererete igoro arenge agwo ase ebiita bi’omochie, keria kiarenge ase egesoero ki’Egeita kia Yoshua, omotang’ani bw’omochie, na keria kiarenge ensemo y’okobee y’oyo ogosoera omochie, omoruoti akabitagora akabiyeria inse.

9Korende nonya abakuani b’aase aimokererete igoro agosasimerwa tibarenge ne ribaga gocha ase egesasimero ki’Omonene agwo Yerusalemu, bakaba bakoria emegati etabekiri memera amo nabamwabo.

10Boigo omoruoti agasaria Tofeti, aase agosasimerwa agwo ase Rikura ria mosinto o Hinomu, agaakora aatachenegeti ng’a onde tasambera omwana oye, omomura gose omoiseke, aroro abe ekeng’wanso ase enyasae eria Moleki.

11Naende akarusia chibarasi chiria abaruoti b’Abayuda babegete ase egesoero ki’enyomba y’Omonene, echio baruete ase ogosasima erioba. Nigo chiarenge ang’e nakanyomba ka Nathani‐Meleki, omoteneneri bw’enyomba y’omoruoti, ime ase enyomba gete ensemo ya bosongo; agasamba chigari chiria chiatananetwe ase erioba.

12Agatagora na akaiyeria inse ebisasimero biarenge igoro ase ekerama ang’e nakanyomba ka igoro k’Ahasi, biria abaruoti b’Abayuda baagachete, na biria Manase aagachete ase chiraaro ibere chi’enyomba y’Omonene. Akabinachana ebing’ese, erio akaruta orotu rwabo ase akarooche ga Kidironi.

13Na aase aimokerete igoro agosasimerwa arenge moocha ya Yerusalemu, irianyi y’Egetunwa ki’Obosareku, aria Sulemani, omoruoti bw’Abaisraeli, aagacherete Asitaroti, okogechia kw’Abasidoni, na Kemosi, okogechia kw’Abamoabu, na Milikomu, okogechia kw’Abaamoni, omoruoti agaakora akaba aatachenegeti.

14Akanachana chisiiro chi’ogosasimerwa chikaba ebing’ese, na akanacha emete y’Asera, enyasae yabo enkungu, agaichoria aase abo namauga ’abanto.

15Boigo agatagora egesasimero kiarenge agwo Beteli igoro y’aase aria aimokererete igoro agosasimerwa aria aroisetigwe na Yeroboamu, mosinto o Nebati, oria ogerete Abaisraeli bagakora ebibe. Agasaria aase aria aimokererete igoro na agatagora egesasimero keria akagesenyenta gekaba orotu; agasamba omote bw’Asera.

16Ekero Yosia aonchogete, akarora chimbeera chiarenge ase ekegoro igoro, agatoma abanto bakarenta amauga korwa ase chimbeera chiria ime, erio akayasambera ase egesasimero, na ekio gekaba egetachenegeti, koreng’ana ne ring’ana ri’Omonene riararetigwe nomonto o Nyasae, oria obanete igoro ase ebinto ebio.

17Erio akabora, “Nkeinyorio ki keria narorire aaria ng’umbu?” Abanto b’omochie bakamoiraneria, “Eyio nembeera y’omonto o Nyasae oria orwete ense y’Abayuda na akabana igoro y’amang’ana aya gwakorire ase ogosaria egesasimero agwo Beteli.”

18Akabatebia, “Tiga ere abeere aroro; onde tabaisa korusia amauga aye.” Ase ayio bagatiga amauga aye, amo nay’omobani oria onde orwete ase ense ya Samaria.

19Yosia agatagora ne chinyomba chionsi chi’aase aimokererete igoro agosasimerwa, echiarenge ase emechie ya Samaria, chiria abaruoti b’Abaisraeli baagachete bakagechia Omonene goika akaba nendamwamu. Agachikora buna akorete agwo Beteli.

20Agaitera abakuani bonsi b’aase aimokererete igoro, ase ebisasimero biarenge, na agasambera amauga ’abanto igoro yabo. Erio akairana gochia Yerusalemu.

21Erio Yosia omoruoti agachika abanto bonsi, akabatebia, “Mobe ne Rituko Rinene ri’Epasaka ase Omonene, Nyasae oino, buna arikire ase Ebuku eye y’Okobwatana kw’Ogotianania.”

22Rituko ri’Epasaka buna eri konya tiriana koinyorwa korwa ase amatuko ’abagambi, baria bagamberete Abaisraeli, gose ase amatuko onsi ay’abaruoti b’Abaisraeli, gose ay’abaruoti b’Abayuda.

23Korende ase omwaka o ikomi na gatano na gatato bw’okogamba kwa Yosia, Rituko erio Rinene ri’Epasaka rikainyorwa na korendwa ase Omonene, agwo Yerusalemu.

24Boigo Yosia akarusia abanto bonsi barenge koboria ogosemigwa korwa ase emeika y’abanto bakwete, na abarogi, na ebinyasae, na emegwekano ende y’ogosasimwa, na okogechia gwonsi kwarorekanete ase ense y’Abayuda na ase Yerusalemu. Nigo akorete ayio, erinde akore amang’ana onsi ay’amachiko aria arikire ase ebuku eria Hilikia omokuani anyorete agwo ase enyomba y’Omonene.

25Moruoti onde tabete agwo ritang’ani orenge buna Yosia, oria omobwatetie Omonene nenkoro yaye yonsi, na omoyo oye bwonsi, ne chinguru chiaye chionsi, koreng’ana namachiko onsi a Musa; gose moruoti onde tanyorekanete buna ere ase abwo bamobwatetie korwa nyuma.

26Korende nonya naboigo, Omonene taonchogete atige obotindi obonene bw’endamwamu yaye yogete igoro ase Abayuda ase engencho y’okogechia gwonsi Manase konya akorire amogechirie.

27Na Omonene akabora, “Nindusie Abayuda korwa ase obosio bwane, buna narusetie Abaisraeli; nintugute Yerusalemu, omochie oyio nachorete, na enyomba eria natebete ng’a nimbeke erieta riane aroro.”

28Bono amang’ana ande onsi igoro ya Yosia, na aya onsi akorete, nigo arikire ase Ebuku y’ogokora kw’Abaruoti b’Abayuda.

29Ase amatuko ’okogamba kwa Yosia, Farao Neko, omoruoti o Misiri, akagenda korwana nomoruoti bw’Abaasuri agwo ase orooche rw’Eufarati. Yosia omoruoti akagenda agwo korwana nere, na ekero Farao Neko amoroche, akamoitera agwo Megido.

30Abasomba baye bakamorusia Megido, bakabogoria omobere oye okwete ore ase egari ime, bakayoira Yerusalemu. Erio bakamotindeka ase embeera yaye omonyene. Abanto b’ense eria bakarenta Yehoahasi, omwana omomura o Yosia, bakamoaka amaguta, akaba omoruoti ase ribaga ria ise.

31Yehoahasi nigo arenge nemiaka emerongo etato, ekero achagete kogamba, na akagamba emetienyi etato agwo Yerusalemu. Ng’ina nigo arenge korokwa Hamutali, mosubati o Yeremia korwa Libuna.

32Yehoahasi agakora ayare amabe ase obosio bw’Omonene, koreng’ana buna aya onsi chisokoro chiaye chiakorete.

33Farao Neko akamobwata, akamosiba agwo Ribula ase ense ya Hamati, erinde tabaisa kogamba agwo Yerusalemu, naende akabekera abanto b’ense eria ebango ye chitalanta rigana erimo chie chifeta na etalanta eyemo y’etahabu.

34Farao Neko akabeka Eliakimu, omwana omomura o Yosia, akamobeka akaba omoruoti ase ribaga ria ise, na akaonchora erieta riaye, akamoroka Yehoyakimu. Akarusia Yehoahasi agwo, akamoira Misiri, nere agakwera aroro.

35Yehoyakimu akaa Farao chifeta ne chitahabu chiria, korende eyio nigo yamobetereretie kobekera ense eria ebango ase ogochinyora na goakana Farao echi achigete. Akarusia ebango ye chifeta ne chitahabu korwa ase abanto b’ense eria; kera omonto akarua ekerengo abekeretwe.

36Yehoyakimu nigo arenge nemiaka emerongo ebere, na etano, ekero achagete kogamba; akagamba emiaka ikomi nomo agwo Yerusalemu. Ng’ina nigo arenge korokwa Sebida, mosubati o Pedaya korwa Ruma.

37Yehoyakimu agakora ayare amabe ase obosio bw’Omonene, buna koreng’ana chisokoro chiaye chiakorete.

← Chapter 22 Jump to: Chapter 24 →