2 Kings 20

Gussi (EBIBILIA ENCHENU) 2020

← Chapter 19 Jump to: Chapter 21 →

1Ase amatuko aria Hezekia akarwara, akaba ang’e nogokwa. Isaya omobani mosinto bw’Amosi, agacha asare, akamotebia, “Aya naro Omonene agoteba: Ebeke ang’e amo nenyomba yao, ekiagera aye goika okwe, tokogwena.”

2Hezekia akaonchora obosio bwaye gochia ase enyasi, erio agasaba Omonene, akabora,

3“Bono Omonene nagosoroire, inyora buna nabeire ngokobwatia ase obwegenwa na ase enkoro yane yonsi, naende buna nakorire ayare amaronge ase obosio bwao.” Erio Hezekia akarera nobororo.

4Na ekero Isaya atarasoka korwa ase eraaro ya gati, ring’ana ri’Omonene rigacha asare, rikamotebia,

5“Irana otebie Hezekia, omoraai bw’abanto baane, ng’a inche Omonene, Nyasae o Daudi, sokoro yaye, nigo ngoteba iga: Naigure ogosaba kwao, narorire amariga ao. Rora, ninkogwenie. Rituko ria gatato notiire ogende ase enyomba yane, inche Omonene.

6Nimente emiaka ikomi na etano ase obogima bwao. Ningotoorie aye, amo nomochie oyo, korwa ase okoboko kw’omoruoti bw’Abaasuri; ning’egere omochie oyo ase engencho yane inche omonyene, na ase engencho ya Daudi, omosomba one.”

7Isaya agateba, “Renta ribomba ri’amako.” Na ekero riarentetwe rikabekwa igoro ase rigumba, na Hezekia akagwena.

8Hezekia akaboria Isaya, “Nkemanyererio ki ndaegwe ng’a Omonene nangwenie, naende ng’a nintiire ngende ase enyomba yaye rituko ria gatato?”

9Isaya akamoiraneria, “Omonene nakoe ekemanyererio, erinde omanye ng’a nakore egento keria arire eira akore. Inee! Nigo oganetie omorengari bw’okorengera chinsa otambee ebitambokero ikomi gochia bosio gose gochia nyuma.”

10Hezekia akairaneria, “Ne ring’ana rigusu omorengari otambee bosio ebitambokero ikomi, korende tiga omorengari oirane gochia nyuma ebitambokero ikomi.”

11Isaya omobani akarera ase Omonene, na Omonene akairania omorengari bw’ekerengo gie chinsa ki’Ahasi ebitambokero ikomi, ebio konya biatambeire gochia bosio.

12Ase engaki eria omoruoti o Babeli, Merodaki‐Baladani, mosinto o Baladani, agatoma abanto bakaira ekeegwa ase Hezekia, ekiagera aigwete ng’a Hezekia nabete omorwaire.

13Hezekia akabaroisia buya, erio akaboorokia ebinto bionsi biarenge ase chikungo chiaye chionsi: Chifeta, ne chitahabu, na ebinsari, na amaguta e rigori rinene, na ebirwanero biaye, na ebinto bionsi biagachire ase chinyomba chiaye. Tatigete gento kende gionsi ase enyomba yaye gose ase chimonga chi’oboruoti ataborogetie.

14Erio Isaya omobani agacha ase Hezekia omoruoti, akamoboria, “Ngento ki abanto aba bakwana? Ng’ai barwa bagacha asore?” Hezekia akamoiraneria, “Barabwo nigo barure ense y’aare, ense ya Babeli.”

15Akamoboria, “Ngento ki barora nyomba mwao?” Hezekia akairaneria, “Nigo barora ebinto bionsi bire nyomba mwane; tikeri nonya negento ekemo ase amagachero aane ntaborokia.”

16Erio Isaya agatebia Hezekia, “Igwa buna Omonene atebire:

17Naama! Amatuko ngocha are, ekero ebinto bionsi bire ase enyomba yao, na ebinto bionsi chisokoro chiao chiagachete goika rero iga nabiimokigwe biirwe Babeli; nonya negento ekemo tikegotigara. Aya naro Omonene agoteba.

18Na abana bande bao abamura baria kwaiboreirwe nabairwe, babe abakoreri ase enyomba y’omoruotio Babeli.”

19Hezekia agatebia Isaya, “Ring’ana ri’Omonene aye gwakwanire nerigiya”. Nigo arengereretie ng’a onye rioka omorembe na oborendi obuya biare gochia konyorekana ase obogima bwaye.

20Bono amang’ana ande onsi igoro ya Hezekia, na okobua kwaye gwonsi, na buna aroisetie ritibo na omotaro ase okorenta amache ase omochie ime, nigo arikire ase Ebuku y’ogokora kw’Abaruoti b’Abayuda.

21Hezekia akarara ase chisokoro chiaye chiararete, na Manase, omwana oye omomura, akaba okogamba ase ribaga riaye.

← Chapter 19 Jump to: Chapter 21 →