2 Kings 13

Gussi (EBIBILIA ENCHENU) 2020

← Chapter 12 Jump to: Chapter 14 →

1Ase omwaka bw’emerongo ebere na gatato bw’okogamba kwa Yoashi, mosinto bw’Ahasia, omoruoti bw’Abayuda, Yehoahasi, mosinto o Yehu, agachaka kogambera Abaisraeli agwo Samaria, na akagamba emiaka ikomi na etano na ebere.

2Ere agakora ayare amabe ase obosio bw’Omonene; akabwatia chingencho chia Yeroboamu, mosinto o Nebati, ase ogokora ebibe biria ere akorete akagera Abaisraeli bagakora ebibe; teatananete korwa ase birobio.

3Omonene akaba nendamwamu enene ase Abaisraeli, na ekero ase ekero akaba okobabeka ase okoboko kwa Hasaeli, omoruoti bw’Abasiiria, na ase okwa Beni‐Hadadi, mosinto o Hasaeli.

4Erio Yehoahasi agasaba Omonene, na Omonene akamoigwa, ekiagera aroche ogochandwa kw’Abaisraeli, buna omoruoti bw’Abasiiria abachandete.

5Ase ayio Omonene akaa Abaisraeli omotooria, obatooretie korwa ase amaboko ’Abasiiria. Nyuma y’ayio Abaisraeli bakagenderera komenya ase chinka chiabo buna agwo ritang’ani.

6Korende nonya naboigo, tibeatananete korwa ase ebibe bi’enyomba ya Yeroboamu, biria ere akorete akagera Abaisraeli bagakora ebibe, korende bakaba bakogenderera kobikora. Boigo omote bw’Asera, enyasae eria enkungu, ogatigara agwo Samaria.

7Yehoahasi tatigareretigwe abarwani esegi otatiga abariini chibarasi emerongo etano, ne chigari ikomi, na abanto barenge gotaara namagoro chilifu ikomi, ekiagera omoruoti bw’Abasiiria aitete abanto bonsi bakaba buna orotu rw’ekeooreri rogotiringwa.

8Bono amang’ana ande onsi igoro ya Yehoahasi, na aya onsi akorete, na okobua kwaye, nigo arikire ase Ebuku y’ogokora kw’Abaruoti b’Abaisraeli.

9Yehoahasi akarara ase chisokoro chiaye chiararete, agatindekwa agwo Samaria, na Yehoasi, omwana oye omomura, akaba okogamba ase ribaga riaye.

10Ase omwaka bw’emerongo etato, na gatano na kabere, bw’okogamba kwa Yoashi, omoruoti bw’Abayuda, Yehoasi, mosinto o Yehoahasi, agachaka kogambera Abaisraeli agwo Samaria, na akagamba emiaka ikomi na etano nomo.

11Nere agakora amabe ase obosio bw’Omonene, teatananete korwa ase ekemo ki’ebibe biria Yeroboamu, mosinto o Nebati, akorete akagera Abaisraeli bagakora ebibe, korende akagenderera kobikora.

12Bono amang’ana ande onsi igoro ya Yehoasi, na aya onsi akorete, na okobua kwaye gw’okorwania Amasia, omoruoti bw’Abayuda, nigo arikire ase Ebuku y’ogokora kw’Abaruoti b’Abaisraeli.

13Yehoasi akarara ase chisokoro chiaye chiararete, agatindekwa agwo Samaria aase abaruoti b’Abaisraeli batindegetwe. Yeroboamu agaikaransa ase ekerogo ki’oboruoti kia Yehoasi.

14Ekero Elisha arenge noborwaire bw’amakweri Yehoasi, omoruoti bw’Abaisraeli, akagenda komorora. Gaikireo agachaka korera, “Tata ominto! Tata ominto! Aye nigo ore ase Abaisraeli buna chigari na abariini chibarasi.”

15Elisha akamotebia, “Imokia obota na emegwe!” Ase ayio akaimokia ebinto ebio.

16Naende akamotebia, “Ng’usa obota bwao!” Nere akabong’usa. Na Elisha akabeka amaboko aye ase amaboko ’omoruoti oria,

17akamotebia, “Igora ekebao kerochie moocha!” Yehoasi agakeigora. Erio Elisha akamotebia, “Rasa!” Nere akarasa. Elisha agakwana, “Omogwe bw’obobui bw’Omonene. Omogwe bw’obobui igoro y’Abasiiria. Aye norwanie Abasiiria agwo Afeki goika obasirie kegima.”

18Erio Elisha agatebia omoruoti bw’Abaisraeli, “Imokia emegwe!” Nere akayeimokia. Naende akamotebia, “Rasa inse ase riroba!” Nere akarasa inse ase riroba ara gatato, agatiga.

19Omonto oria o Nyasae akaba nendamwamu asare, akamotebia, “Nigo yagwenerete orase inse ara gatano, gose ara gatano na rimo; kware gokora igo nanga nigo kwabua Abasiiria na kobasiria kegima, korende bono nigo orabaake ara gatato rioka”.

20Na Elisha agakwa, agatindekwa. Bono ebiombe bi’Abamoabu bikaba bigocha ase ense eria ase omochakano bwa kera omwaka.

21Ekaba ekero omonto oyomo akwete arenge gotindekwa, ekeombe ekemo kia biria kegacha, na abanto babogoretie omobere oria, bakayoruta ase oboina bw’Elisha. Ekero ogweteo ogakuna amauga ’Elisha, okaboka na koba moyo, agatenena namagoro aye.

22Hasaeli, omoruoti bw’Abasiiria, akaba ogochanda Abaisraeli ase amatuko onsi ay’okogamba kwa Yehoahasi.

23Korende Omonene nigo arenge nobwanchani asebare, na abarorerete amabera, akabairanera ase engencho y’okobwatana kw’ogotianania akorete na Ibrahimu, na Isaka, na Yakobo, na igo tabasiretie. Tabatugutete korwa ase obosio bwaye nonya ngoika rero iga.

24Ekero Hasaeli, omoruoti bw’Abasiiria, akwete, Beni‐Hadadi, omwana oye omomura, akaba okogamba ase ribaga riaye.

25Erio Yehoasi, mosinto o Yehoahasi, akaira naende korwa ase Beni‐Hadadi, mosinto o Hasaeli, emechie eyio ere konya airire korwa ase Yehoahasi ise ekero gi’esegi. Yehoasi akabua Beni‐Hadadi ara gatato, akairania emechie y’Abaisraeli.

← Chapter 12 Jump to: Chapter 14 →