bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Gussi
/
Gussi (EBIBILIA ENCHENU) 2020
/
2 Kings 4
2 Kings 4
Gussi (EBIBILIA ENCHENU) 2020
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 5 →
1
Omoboraka bw’omworokigwa oyomo bw’ababani akarera ase Elisha, akabora, “Omosacha one, omosomba oo, nakwete; aye nomanyete ng’a omosomba oo nigo amoirogete Omonene. Bono omoriegwa esira oye ochire koira abana abamura baane babere abakore babe abasomba baye.”
2
Elisha akamotebia, “Ninki nkogokorera? Ntebie ngento ki obwate nyomba mwao.” Omokungu oria agateba, “Inche omosomba oo omokungu timbwati gento kende gionsi nyomba mwane otatiga amaguta make ase rikondo.”
3
Elisha agatebia omokungu oria, “Genda ase emechie ase abagisangio bao, osabe oegwe ebibekerero ebinge bire bosa.
4
Erio osoe nyomba mwao amo nabana bao, osieke egesieri, oumore amaguta ase ebibekerero ebio. Kera ekemo kogiaichoire okebeke ensemo.”
5
Omokungu oria akarua asare akagenda, agasoa nyomba mwaye amo nabamura baye, agasieka egesieri. Abamura baye bakamorentera ebibekerero, ne ere akaba okoumora amaguta.
6
Ekero ebibekerero bionsi biaichorete, agatebia omwana oyomo, “Ndetere ekebekerero kende.” Omwana oye akamotebia, “Ekebekerero kende tikeiyo.” Erio amaguta agatiga gocha.
7
Omokungu oria akagenda, agatebia omonto oria o Nyasae amang’ana ayio. Nere agatebia omokungu oria. “Genda, oonie amaguta ayio, oakane esira yao, na echiratigare nchigoisane aye na abana bao.”
8
Rituko erimo Elisha akagenda Sunemu, agwo ase omokungu omonda amenyete. Nere omosororerete arie endagera. Ase ayio, kero kende gionsi Elisha arenge goeta ase enchera eria nigo arenge gosoa enyomba eria oria endagera.
9
Omokungu oria agatebia omosacha oye, “Narorire ng’a omonto oyo ogoeta aa botambe nomonto omochenu o Nyasae.
10
Tiga tomoroiserie akanyomba igoro ase ekerama, tomobekere oborere aroro, na emesa, na ekerogo, na etaya, erinde engaki ende yonsi agocha asetore, osoa orarao.”
11
Rituko erimo Elisha agacha aase aria, agasoa akanyomba karia, agatimokera aroro,
12
agatebia Gehasi, omosomba oye, “Rangeria omokungu oria Omosunemu.” Ekero amorangeretie, omokungu oria agacha, agatenena ase obosio bw’Elisha.
13
Elisha agatebia Gehasi, “Bono boria omokungu oyo inki aganetie imokorere ase emeremo eye yonsi akorete ase engencho yaito. Moborie ande gose naganetie ngende ase omoruoti, gose ase omochiki bw’abarwani esegi, nkwane obuya bwaye.” Omokungu oria akairaneria, “Inche nigo imenyete buya ase egati y’abanto baminto.”
14
Elisha akaboria, “Ngento ki omokungu oyo agwenerete akorerwe?” Gehasi akairaneria, “Naremeire egento ekemo, tabwati omwana, na omosacha oye ogotire.”
15
Elisha agatebia Gehasi, “Morangerie!” Na ekero arangeretie omokungu oria, nere agatenena gesieri.
16
Elisha akamotebia, “Ase engaki buna eye iga, ase omwaka ogocha, nobe kobwate omwana omoisia omoagate.” Omokungu oria akamoiraneria, “Yaya, omonene one, omonto o Nyasae, tobaisa kong’aina inche omosomba oo.”
17
Omokungu oria akaba morito na akaibora omwana omoisia, ase engaki eria eria Elisha konya amotebirie.
18
Omwana oria gakinire, ekaba rituko erimo akagenda ase ise ase abanto barenge kogesa,
19
akamotebia, “Omotwe nkonyatia ore! Oo, omotwe one!” Ise agatebia omosomba oye, “Mobogorie omoire ase ng’ina.”
20
Na ekero amoimogetie akamoira ase ng’ina, na omwana oria agaikaransa ase amaru a ng’ina goika mobaso gati, erio agakwa.
21
Akamoira akamwareria ase oborere bw’omonto oria o Nyasae, agasieka egesieri akamotiga aroro, agasoka isiko.
22
Omokungu oria akarangeria omosacha oye, akamotebia, “Toma omosomba oyomo gochia aaria amo netigere, ng’ayerere gochia ase omonto oria o Nyasae; naende ng’irane bwango.”
23
Omosacha oye akamoboria, “Nase ki okogenda asare rero? Rero tikori okooroka kw’omotienyi nonya n’Esabato.” Omokungu oria akamoiraneria, “Nabo erabe buya.”
24
Akabekera etigere egeikaransero, agatebia omosomba oye, “Tema etigere egende bwango, tobaisa koyeira ng’ora goika nagotebirie.”
25
Ase ayio agachaka orogendo, agaika ase omonto oria o Nyasae, agwo ase egetunwa gia Karimeli. Ekero omonto oria o Nyasae arochce omokungu oria ogocha, agatebia Gehasi, omosomba oye “Rigereria gochia aaria, Omosunemu oria ogocha!
26
Minyoka bwango omorotote na omoborie gose mbuya are, na omosacha oye na omwana gose mbuya bare.” Omokungu oria akairaneria Gehasi, “Ee, mbuya bare.”
27
Na ekero aigete ase egetunwa ase omonto oria o Nyasae, akabwata amagoro aye. Gehasi agacha komorusia aroro. Korende omonto oria o Nyasae akamotebia, “Motige, ekiagera nigo are nobororo obonge; na Omonene obisire amang’ana ayio korwa asende, tantebetie gento.”
28
Omokungu oria akaboria, “Inee! Nagosabete aye omonene one ong’e omwana? Tinakwanete: Tobaisa kong’aina inche.”
29
Elisha agatebia Gehasi, “Eboyie bwebeke ang’e, imokia enyimbo yane koboko kwao, ogende. Koraumerane na monto onde bwensi, tobaisa komokwania; na omonto onde bwensi karagokwanie, tobaisa goitaba; obeke enyimbo eye yane igoro ase obosio bw’omwana oria.”
30
Ng’ina omwana oria agateba, “Ekeene, buna Omonene are moyo, na buna aye ore moyo, tinkogotiga.” Ase ayio Elisha akaimoka akamotunyana.
31
Gehasi agatang’ana akagenda bosio, akabeka enyimbo eria igoro ase obosio bw’omwana oria, korende nonya neriogi gose ekemanyererio kende tikiarengeo ng’a omwana nabe moyo. Ase ayio akairana, akaumerana n’Elisha, akamotebia, “Omwana tacheti moyo.”
32
Ekero Elisha asoete nyomba, akarora omwana bwareirie igoro ase oborere bwaye okwete.
33
Agasoa nyomba, agasieka egesieri; ere na omwana boka bakaba nyomba ime. Erio Elisha agasaba Omonene,
34
akariina borere igoro, akerambora igoro ase omwana oria, akabeka omonwa oye igoro ase omonwa bw’omwana, na amaiso aye igoro ase amaiso ’omwana, na amaboko aye igoro ase amaboko ’omwana; na buna eramborete igoro ase omwana, omobere bw’omwana ogachaka koba ne riberera.
35
Elisha akaimoka, agataarataara nyomba ime ara kabere, naende akariina borere, akerambora igoro ase omwana, na omwana oria agasimora ara gatano na kabere, erio akaramokia amaiso aye.
36
Elisha akarangeria Gehasi, akamotebia, “Rangeria Omosunemu oyio!” Gehasi akamorangeria, na ekero omokungu oria achete, Elisha akamotebia, “Imokia omwana oo!”
37
Agacha agatung’ama ase amagoro Elisha, akaumama, erio akaimokia omwana oye, agasoka isiko.
38
Elisha akagenda naende Giligali ekero enchara yarenge ase ense eria. Na aborokigwa b’ababani kobaikaransire ase obosio bwaye, agatebia omosomba oye, “Tereka enyongo eria enene riko, oroiserie aborokigwa b’ababani omosori!”
39
Oyomo obo akagenda mogondo kwaa chinyeni, na agwo akanyora ekemeri ki’orosana gekoranda, nere agatwa emiongo y’orosana korwa ase ekemeri keria, agaichoria egetambaa kiaye. Erio akayenachana, akayebeka ase omosori ime; tamanyete ng’a miongo ki yarenge.
40
Bono endagera eria egaterekerwa abanto baria barie, korende ekero barenge koyeria, bakarera neriogi, “Aye omonto o Nyasae, obee! Endagera eye yatorenteire amakweri!” Barabwo tibanyara koyeria.
41
Elisha agateba, “Renta obosie!” Erio akabobeka ase enyongo ime, agateba, “Bekera abanto endagera eye barie.” Bono egento gi’okorenta amabe tikiarenge ase enyongo eria ime.
42
Omonto agacha korwa Baali‐Salisa, akarentera omonto oria o Nyasae emegati emerongo ebere y’esairi y’okwama ogotang’ani, na ebigara ebibese bire egunia ime. Elisha agateba, “Kae abanto barie!”
43
Korende omosomba oye agateba, “Naki ndanyare kobeka endagera eye ase amasio ’abanto rigana erimo?” Elisha agateba eria kabere, “Yee abanto barie, ekiagera aya naro Omonene atebire: Mbarie, naende batigarie eyende.”
44
Ase ayio agaterekera abanto, na barabwo bakaria, naende bagatigaria eyende, buna Omonene atebete.
← Chapter 3
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 5 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25