2 Kings 8

Gussi (EBIBILIA ENCHENU) 2020

← Chapter 7 Jump to: Chapter 9 →

1Elisha agatebia omokungu oria konya abokeirie omwana oye koba moyo, “Imoka aye amo nabanto b’enyomba yao mong’anye korwa aase aiga, mogende momenye ase ense engeni aande onsi orarore, ekiagera Omonene ochikire enchara echiche ase ense eye, nero egenderere ase engaki y’emiaka etano na ebere.”

2Ase igo omokungu oria akaimoka na agakora buna omonto oria o Nyasae amotebetie; akagenda amo nabanto b’enyomba yaye, akamenya ase ense y’Abafilisti ase engaki y’emiaka etano na ebere.

3Ase omoerio bw’emiaka eria etano na ebere, omokungu oria akairana korwa ase ense y’Abafilisti, akagenda ase omoruoti agasaba aegwe enyomba yaye, na oboremo bwaye.

4Bono omoruoti nigo arenge gokwana na Gehasi, omosomba bw’omonto oria o Nyasae, akamoboria amotebie amang’ana amanene Elisha konya akorire.

5Na ekero Gehasi agendererete gotebia omoruoti buna Elisha abogetie omonto okwete akaba moyo, akarora omokungu oria Elisha abogetie omwana oye akaba moyo ogocha gosaba omoruoti ng’a aegwe enyomba yaye, na oboremo bwaye. Gehasi akamotebia, “Aye omoruoti, omonene one, omokungu oria nere oyo, na omwana oria oye Elisha abogetie akaba moyo nere oyo.”

6Ekero omoruoti aboretie omokungu oria, nere akamotebia amang’ana onsi. Ase ayio omoruoti agachora omoteneneri oyomo anyare gokonya omokungu oria, akamotebia, “Irania ebinto bionsi biria biarenge bi’omokungu oyo, amo nokwama gwonsi korwa ase oboremo boria, gochakera rituko riria aruete ase oboremo boria goika bono.”

7Elisha akagenda Damesiki, na Beni‐Hadadi, omoruoti bw’Abasiiria, nigo arenge omorwaire. Ekero Beni‐Hadadi atebetigwe ng’a omonto oria o Nyasae ochire,

8agatebia Hasaeli, “Imokia ekeegwa, ogende orotote omonto oria o Nyasae, oborie Omonene goetera asare, omanye gose ningwene korwa ase oborwaire obo.”

9Ase igo Hasaeli akagenda korotota Elisha, akamoirera ebiegwa, ebinto ebiya mono bia Damesiki, ebinto biisaine kobogorigwa ne chingamia emerongo ene. Ekero aigete asare, agatenena ase obosio bwaye, agateba, “Omwana oo Beni‐Hadadi, omoruoti bw’Abasiiria, ontomire gocha asore gokoboria gose nagwene korwa ase oborwaire bwaye.”

10Elisha akamoiraneria, “Omonene nigo anyorokirie ng’a ere goika akwe, korende genda omotebie ng’a ekeene nagwene.”

11Naende akarigereria omonto oria namaiso amomo pa goika omonto oria agaichana. Na Elisha, omonto o Nyasae, agachaka korera.

12Hasaeli akamoboria, “Ninki kiaba aye, omonene one, okorera?” Elisha akamoiraneria, “Nekiagera namanyire obobe boria orakore ase Abaisraeli; nosambe chiburi chiabo, noite abasae babo nomoro, naende nonachane abana babo abake ebing’ese, na abakungu babo bare barito noboore chinda chiabo.”

13Hasaeli agateba, “Inche omosomba oo, inki ing’isaine? Inche inga buna esese. Naki ndanyare gokora egento buna ekio.” Elisha akamoiraneria, “Omonene onyorokirie ng’a aye nobe omoruoti bw’Abasiiria.”

14Hasaeli akarua ase Elisha, akairana ase omonene oye. Nere akamoboria, “Naki Elisha agotebia?” Hasaeli akamoiraneria, “Nigo antebia ng’a ekeene aye nogwene.”

15Korende rituko ria kabere akabogoria ekiebisio ki’oborere akagetobeka ase amache ime, agatuba obosio bw’omoruoti nakerokio, gekamoguba goika agakwa. Erio Hasaeli akaba omoruoti ribaga ria Beni‐Hadadi.

16Ase omwaka o gatano bw’okogamba kwa Yoramu, mosinto bw’Ahabu, omoruoti bw’Abaisraeli, ekero Yehosafati arenge omoruoti bw’Abayuda, Yehoramu, mosinto o Yehosafati, agachaka kogamba.

17Nigo arenge nemiaka emerongo etato, na ebere, ekero abete omoruoti, akagamba emiaka etano na etato, agwo Yerusalemu.

18Ere akanyuoma omoiseke bw’Ahabu, na buna abanto b’enyomba y’Ahabu bakorete, ere boigo akabwatia chinchera chi’abaruoti b’Abaisraeli. Agakora ayarenge amabe ase obosio bw’Omonene.

19Korende nonya naboigo ase engencho ya Daudi, omosomba bw’Omonene, Omonene tanchete gosiria enyomba ya Yuda, ekiagera ariete eira ng’a Daudi abe etaya kogenderera botambe, ere amo nororeria rwaye.

20Ase amatuko ay’okogamba kwa Yehoramu, Abaedomu bagasaria, bakaanga koigwera Abayuda, bakebekera omoruoti.

21Erio Yehoramu akagenda Sairi amo ne chigari chiaye chionsi chi’esegi. Akaimoka botuko amo nabachiki baye be chigari, bakarwania Abaedomu abwo babaetanaine, korende abarwani baye b’esegi bagatama, bakagenda chinka chiabo.

22Igo Abaedomu bagasaria, bakaanga kogamberwa n’Abayuda na babeire baatananegete goika rero iga. Naende ase engaki eyio eyio abanto b’omochie o Libuna nabarabwo bagasaria, bagatiga obogambi bw’Abayuda.

23Bono amang’ana ande onsi igoro ya Yehoramu, na aya onsi akorete, nigo arikire ase Ebuku y’ogokora kw’Abaruoti b’Abayuda.

24Yehoramu akarara ase chisokoro chiaye chiararete, agatindekwa aase chiatindegetwe, ase Omochie o Daudi, na Ahasia, omwana oye omomura, akaba okogamba ase ribaga riaye.

25Ase omwaka o ikomi na kabere bw’okogamba kwa Yoramu, mosinto bw’Ahabu, ekero arenge omoruoti bw’Abaisraeli, Ahasia, mosinto o Yehoramu, omoruoti bw’Abayuda, agachaka kogamba.

26Ahasia nigo arenge nemiaka emerongo ebere na ebere, ekero achagete kogamba, na akagamba omwaka oyomo agwo Yerusalemu. Ng’ina nigo arenge korokwa Atalia; ere nigo arenge omochokoro bw’Omuri, omoruoti bw’Abaisraeli.

27Ahasia akaba omoko bw’enyomba y’Ahabu, na igo akabwatia chinchera chi’abanto b’enyomba yaye. Agakora ayare amabe ase obosio bw’Omonene, buna abanto b’enyomba y’Ahabu bakorete.

28Ahasia akagenda amo na Yoramu, mosinto bw’Ahabu, korwania Hasaeli, omoruoti bw’Abasiiria, agwo Ramoti o Gileadi. Abasiiria bagaaka Yoramu chingoma.

29Omoruoti Yoramu akairana Yesireeli gochia korwarigwa chingoma chiria anyorete korwa ase Abasiiria aaria Rama, ekero arwanete na Hasaeli, omoruoti bw’Abasiiria. Ahasia, mosinto o Yehoramu, omoruoti bw’Abayuda, akagenda korora Yoramu, mosinto bw’Ahabu agwo Yesireeli, ekiagera Yoramu nigo arenge omorwaire.

← Chapter 7 Jump to: Chapter 9 →