2 Kings 17

Gussi (EBIBILIA ENCHENU) 2020

← Chapter 16 Jump to: Chapter 18 →

1Ase omwaka o ikomi na kabere bw’okogamba kw’Ahasi, omoruoti bw’Abayuda, Hosea, mosinto o Ela, agachaka kogambera Abaisraeli agwo Samaria, na akagamba emiaka kianda.

2Agakora ayare amabe ase obosio bw’Omonene, korende takorete amabe buna abaruoti b’Abaisraeli, abwo bamotang’anerete, bakorete.

3Salimaneseri, omoruoti bw’Abaasuri, akarwania Hosea, na Hosea akerua asare, akaba okomoa ebango.

4Nyuma y’engaki gete omoruoti bw’Abaasuri akamanya obobisi bwa Hosea buna konya atomire abanto ase So, omoruoti bw’Abamisiri, na buna atigete korua ebango ase omoruoti bw’Abaasuri buna arenge gokora omwaka ase omwaka. Ase ayio akamobwata akamosiba echela.

5Omoruoti bw’Abaasuri akagenda ase ense eria, akaboera Samaria ase engaki y’emiaka etato.

6Ase omwaka o kianda bw’okogamba kwa Hosea, omoruoti bw’Abaasuri akabwata Samaria, agoosa Abaisraeli, akabaira Asuri; akabeka abande ase omochie o Hala, na abande ang’e na Habori, orooche rwa Gosani, na abande ase emechie y’Abamedi.

7Aya igo akoregete, ekiagera Abaisraeli bakorete ebibe ase Omonene, Nyasae obo oyobarusetie ase ense ya Misiri na korwa ase okoboko gwa Farao, omoruoti o Misiri, na ekiagera bakorerete chinyasae ching’ao.

8Boigo bakaba bakobwatia chingencho chi’abanto b’ebisaku biria Omonene aseretie korwa ase amasio abo, na echi’abaruoti b’Abaisraeli.

9Abaisraeli bagakora bobisi ebinto ebibe ase Omonene, Nyasae obo. Bakeagachera aase aimokererete igoro ase bagosasimera, agwo aase abo onsi bamenyete, ase emerobiri y’okorenda yaagachire amo nemechie egiteire chindwaki.

10Bageteneneria chisiiro chi’ogosasima na emete y’Asera igoro ase kera ekegoro egetambe, na inse ya kera omote omobese.

11Agwo aase aimokererete igoro bagasamba ubani buna abanto b’ebisaku biria Omonene aseretie korwa asebare baare gokora. Bagakora ebinto bi’obokayayu, bakagechia Omonene goika akaba nendamwamu;

12bagakorera emegwekano y’ogosasimwa eyio Omonene abakanetie ng’a tibayekorera.

13Omonene konya obeire ogokurera Abaisraeli na Abayuda goetera ase kera omobani, na ase kera omorori, ogoteba, “Onchoka, motige chinchera chiaino chi’obobe, na mobwate amachiko aane, na emeroberio yane echikire, koreng’ana namachiko onsi ayio nachigete chisokoro chiaino, ayio nabatomerete inwe goetera ase abasomba baane ababani.”

14Korende tibaigwete; bagakong’ia ebigoti biabo buna chisokoro chiabo chiakorete, abwo batamwegenete Omonene, Nyasae obo.

15Abaisraeli bagachaya emeroberio yaye echikire na okobwatana kwaye kw’ogotianania, koria akorete ne chisokoro chiabo, na ogokurerwa aruete asebare. Bagakora emegwekano y’ogosasimwa etagwenerete kende, bakayebwatia, bakabwatia chingencho chi’abanto b’ebisaku babaetanaine, abwo Omonene abakanetie ng’a tibakora buna barabwo.

16Bagatiga amachiko onsi ay’Omonene, Nyasae obo, bakabomba emegwekano ebere ye chimori; boigo bakaroisia omote bw’Asera, enyasae eria enkungu, bagasasima erioba na omotienyi ne ching’enang’eni, na gokorera Baali enyasae eria.

17Barabwo bagasamba abana babo, abamura na abaiseke, bakaba ebing’wanso, naende bagakora oboriori na oborogi, bakerua abanyene gokora ebibe ase obosio bw’Omonene, bakamogechia goika akaba nendamwamu.

18Ase ayio Omonene akaba nendamwamu enene ase Abaisraeli na akabaseria korwa ase obosio bwaye; onde tatigarete otatiga egesaku ki’Abayuda gioka.

19Abayuda nabarabwo tibabwatete amachiko ’Omonene, Nyasae obo, korende bakabwatia chingencho chiria Abaisraeli barentete.

20Omonene akaanga chinderia chionsi chi’Abaisraeli, akabaa egesusuro, akababeka ase amaboko ’abasakori goika akabaseria korwa ase obosio bwaye kegima.

21Ekero ataboranete Abaisraeli korwa ase enyomba ya Daudi, barabwo bakabeka Yeroboamu, mosinto o Nebati akaba omoruoti obo. Yeroboamu akang’usa Abaisraeli bagatiga gotunyana Omonene, akagera bagakora ebibe ebinene mono.

22Abaisraeli bagakora ebibe bionsi biria Yeroboamu akorete; tibeatananete korwa ase birobio.

23Ase igo Omonene akarusia Abaisraeli korwa ase obosio bwaye, buna akwanete goetera ase ababani, abasomba baye. Nabo Abaisraeli bakarusigwa korwa ase ense yabo abanyene, bakairwa Asuri, nao bare goika rero iga.

24Omoruoti bw’Abaasuri akarenta abanto korwa Babeli, na Kuta, na Awa, na Hamati, na Sefariwaimu, akababeka ase emechie ya Samaria bayemenye ribaga ri’Abaisraeli. Ase igo abanto abwo bakaira ense ya Samaria, bakamenya ase emechie y’aroro.

25Na ekaba ase omochakano obo bw’okomenya aroro tibamoirogete Omonene; ase ayio Omonene agatoma chindo ase egati yabo, chigaita abanto bande babo.

26Omoruoti bw’Abaasuri atebigwa ng’a abanto b’ebisaku biria arentete na akabeka ase emechie ya Samaria, tibamanyete amachiko a Nyasae bw’ense eria. Na bono Nyasae oria otomire chindo ase egati yabo, ne chindo chiria chiaitire abanto bande babo, ekiagera tibamanyeti amachiko a Nyasae bw’ense eria.

27Erio omoruoti bw’Abaasuari agachika, agateba, “Toma gochia aase aria oyomo bw’abakuani baria kwarusetie aroro, amenye aroro, orokererie abanto amachiko a Nyasae oria.”

28Na igo oyomo bw’abakuni baria bairetwe korwa Samaria akagenda komenya agwo Beteli, akaba okworokereria abanto bamoiroke Omonene.

29Korende nonya nabo abanto ba kera egesaku bakaroisia chinyasae chiabo abanyene, bagachibeka ase chinyomba chi’aase aimokererete igoro agosasimerwa, echio abanto ba Samaria baagachete; abanto ba kera egesaku bagakora igo ase emechie eria bamenyete.

30Abanto ba Babeli bakaroisia omogwekano bw’enyasae yabo Sukoti‐Benoti, bakayosasima na abanto ba Kuta omogwekano o Nerigali, na abanto ba Hamati oyo bw’Asima,

31na abanto ba Awa oyo o Nibuhasi, na Taritaki, na abanto ba Sefariwaimu, bagasamba abana babo bakaba ebing’wanso ase Adirameleki na Anameleki, chinyasae chia Sefariwaimu.

32Boigo bakamoiroka Omonene, bagachora korwa ase egati yabo abanto be chingencho ao ao bakaba abakuani b’aase aimokererete igoro agosasimerwa, baria baruete ebing’wanso ase engencho yabo ase chinyomba chi’aase aria.

33Bakamoiroka Omonene, korende boigo bagakorera chinyasae chiabo abanyene, bagakora buna abanto b’ebisaku biria, ase bang’anyetigwe korwa, barenge gokora.

34Goika rituko ria rero nigo bagokora buna banarete gokora ritang’ani. Tibamoirogete Omonene, na tibari kobwatia emeroberio echikire, gose amachiko onsi aria Omonene achigete abanto b’ororeria rwa Yakobo, oria arogete Israeli.

35Omonene agakora okobwatana kw’ogotianania nabarabwo, akabachika, “Timobaisa koiroka chinyasae ching’ao, gose gotung’ama gochisasima; timochikorera gose timochiruera ebing’wanso.

36Korende mong’iroke inche Omonene. Nabarusetie korwa ase ense ya Misiri ase okobua okonene na ase okoboko koramboire; motung’ame monsasime inche bweka na monduere ebing’wanso.

37Emeroberio yane yonsi echikire, na amachiko aane onsi, aria nabarikerete, moyarende botambe na koyakorera. Timobaisa koiroka chinyasae chinde ching’ao,

38na timobaisa kweba okobwatana kw’ogotianania koria nakorete nainwe. Timobaisa koiroka chinyasae chinde ching’ao,

39korende mong’iroke inche Omonene, Nyasae oino; inche nimbarusie korwa ase amaboko ’ababisa baino.”

40Korende nonya naboigo bakaanga tibaigwera, bagakora buna chingencho chiabo chintang’ani chiarenge.

41Ase ayio abanto b’ebisaku ebio bakamoiroka Omonene, na amo nayio bakaba bagokorera emegwekano yabo baare gosasima. Abana babo na abachokoro babo nabo bagokora goika rero iga, buna chisokoro chiabo chiare gokora.

← Chapter 16 Jump to: Chapter 18 →