2 Kings 22

Gussi (EBIBILIA ENCHENU) 2020

← Chapter 21 Jump to: Chapter 23 →

1Yosia nigo arenge nemiaka etano na etato, ekero achagete kogamba, na akagamba emiaka emerongo etato nomo agwo Yerusalemu. Ng’ina nigo arenge korokwa Yedida, mosubati bw’Adaya korwa Bosikati.

2Yosia agakora ayare amaronge ase amaiso ’Omonene, akabwatia chinchera chionsi chia Daudi sokoro yaye; taonchogete gochia aande onsi, ensemo y’okorio gose ey’okobee.

3Ase omwaka o ikomi na gatano ase okogamba kwa Yosia omoruoti agatoma Safani omoriki, mosinto bw’Asalia o Mesulamu, ase enyomba y’Omonene, agateba,

4“Genda ase Hilikia, omokuani omonene, omoborie abare chibesa chiarentirwe ase enyomba y’Omonene, echio abarendi b’egesieri basangereirie korwa ase abanto.

5Chibesa echi chiegwe abateneneri b’emeremo egokorwa ase enyomba y’Omonene, na barabwo bachiee abakori emeremo b’enyomba eyio, baria bakoyeroisia,

6na abasenia be chibao, na abaagachi, na abaagachi b’amagena. Naende chibesa chiria chigorwe chibao, na amagena abaachire ase okoagachera enyomba.

7Korende timobaboria borokie omobaro bwe chibesa chirabekwe ase amaboko abo, ekiagera nigo barachikorere emeremo ase obwegenwa.”

8Hilikia, omokuani omonene, agatebia Safani omoriki, “Nanyorire ebuku y’Amachiko ase enyomba y’Omonene.” Hilikia akaa Safani ebuku eria, nere akayesoma.

9Nyuma y’ayio omoriki oria akagenda ase omoruoti, akamotebia, “Abasomba bao mbarusia chibesa chionsi chianyorekana ase enyomba, bakaa abakori emeremo abwo bare abateneneri b’emeremo egokorwa ase enyomba y’Omonene.”

10Naende Safani agatebia omoruoti, “Hilikia omokuani nang’a ebuku.” Erio Safani agasomera omoruoti ebuku eria.

11Na ekero omoruoti aigwete amang’ana ’Ebuku eria y’Amachiko agatandora chianga chiaye.

12Erio agachika Hilikia omokuani, na Ahikamu, mosinto o Safani, na Akibori, mosinto o Mikaya, na Safani omoriki, na Asaia, omokoreri bw’omoruoti, akabatebia,

13“Genda moborie momanye korwa ase Omonene igoro yane, na igoro y’abanto baito, na igoro y’Abayuda bonsi, tomanye amang’ana are ase ebuku eye yanyorekanire. Endamwamu y’Omonene yokire asetore, ekiagera chisokoro chiaito tichiaigwerete amang’ana ’ebuku eye, na tichiakorete aya onsi arikire ase engencho yaito.”

14Ase igo Hilikia omokuani, na Ahikamu, na Akibori, na Safani, na Asaia bakagenda koboria Hulda, omobani omokungu, mokaa Salumu, mosinto o Tikiwa, o Harasi. Salumu oyio nigo arenge omorendi bwe rigachero rie chianga. Ase ekero ekio Hulda nigo amenyete agwo Yerusalemu ase ensemo enyia.

15Omokungu oria akabatebia, “Omonene, Nyasae bw’Abaisraeli, nigo agoteba ng’a mogende ase omonto oria obatomete gocha asende, momotebie:

16Aya naro Omonene agoteba: Rora inche Omonene nindete igoro y’aase aiga, na igoro y’abanto b’aiga, amabe aya onsi arikire ase ebuku eye omoruoti bw’Abayuda asomire.

17Barabwo bantigire inche na basambire ubani ase chinyasae ching’ao, na bangechirie goika nabeire nendamwamu ase engencho y’emeremo yonsi bakorire namaboko abo. Ase ayio, endamwamu yane neyoke igoro y’aase aiga, tegokendigwa.

18Korende ase omoruoti bw’Abayuda, oria obatoma erinde amanye korwa asende inche Omonene, aya naro moramotebie: Aya naro Omonene, Nyasae bw’Abaisraeli, agoteba igoro y’amang’ana aya kwaigwete:

19Ekero kwaigwa amang’ana aria, naye ogekanya, okaba omoitongo ase obosio bwane inche Omonene. Na ekero kwaigwete buna nakwanete igoro y’aase aiga, na igoro y’abanto b’aiga ng’a goika basirigwe na babe okoragererigwa, aye ogatandora chianga chiao, naende okarera ase obosio bwane. Naboigo inche Omonene nkogotebia ng’a nakoigure.

20Ase ayio, ningosangererie ase chisokoro chiao chiachiete; aye nobekwe ase embeera yao kore nomorembe, na amaiso ao takorora obobe boria bwonsi ndarente igoro y’aase aiga.” Barabwo bakairera omoruoti amang’ana ayio.

← Chapter 21 Jump to: Chapter 23 →