2 Kings 15

Gussi (EBIBILIA ENCHENU) 2020

← Chapter 14 Jump to: Chapter 16 →

1Ase omwaka bw’emerongo ebere, na etano na ebere, bw’okogamba kwa Yeroboamu, omoruoti bw’Abaisraeli, Asaria, mosinto bw’Amasia, omoruoti bw’Abayuda, agachaka kogamba.

2Nigo arenge nemiaka ikomi na etano nomo ekero achagete kogamba, na akagamba emiaka emerongo etano, na ebere, agwo Yerusalemu. Ng’ina nigo arenge korokwa Yekolia o Yerusalemu.

3Asaria agakora ayare amaronge ase amaiso ’Omonene, koreng’ana buna aya onsi Amasia ise akorete.

4Korende nonya naboigo, aase aimokererete igoro agosasimerwa tatagorete, na abanto bakagenderera korua ebing’wanso na gosamba ubani igoro y’aase aria.

5Omonene akarentera omoruoti oborwaire bwa ukoma bokaba bomoriete goika rituko ri’ogokwa kwaye. Ase igo omoruoti akamenya enyomba ere bweka ao. Yotamu, omwana oye omomura, akaba omoteneneri bw’enyomba y’obogambi, akagambera abanto b’ense eria.

6Bono amang’ana ande onsi igoro y’Asaria, na aya onsi akorete, nigo arikire ase Ebuku y’ogokora kw’Abaruoti b’Abayuda.

7Asaria akarara ase chisokoro chiaye chiararete, agatindekwa aase chisokoro chiaye chiatindegetwe, agwo ase Omochie o Daudi, na Yotamu, omwana oye omomura, akaba okogamba ase ribaga riaye.

8Ase omwaka bw’emerongo etato, na etano na etato bw’okogamba gw’Asaria omoruoti bw’Abayuda, Zakaria, mosinto o Yeroboamu, akagambera Abaisraeli agwo Samaria ase engaki y’emetienyi etano nomo.

9Agakora ayare amabe ase amaiso ’Omonene, buna chisokoro chiaye chiakorete. Teatananete korwa ase ebibe biria Yeroboamu, mosinto o Nebati, akorete akagera Abaisraeli bagakora ebibe.

10Salumu, mosinto o Yabesi, agakora omoroberio bw’okomoita, akamoitera ase amasio ’abanto, akaba okogamba ase ribaga riaye.

11Bono amang’ana ande onsi igoro ya Zakaria nigo arikire ase Ebuku y’ogokora kw’Abaruoti b’Abaisraeli.

12Ase ayio eira eria Omonene arierete Yehu ng’a abana baye goika ekiaare gia kane mbabe bagoikaransa ase ekerogo ki’oboruoti kw’Abaisraeli egaikeranigwa.

13Salumu, mosinto o Yabesi, agachaka kogamba ase omwaka bw’emerongo etato, na kianda, bw’okogamba gwa Usia, omoruoti bw’Abayuda, akagamba omotienyi oyomo agwo Samaria.

14Erio Menahemu, mosinto o Gadi, akarua Tirisa, akagenda Samaria, agaita Salumu, mosinto o Yabesi, agwo Samaria, naende akaba okogamba ase ribaga riaye.

15Bono amang’ana onsi igoro ya Salumu, na omoroberio oria bw’ogoita akorete, nigo arikire ase Ebuku y’ogokora kw’Abaruoti b’Abaisraeli.

16Ase engaki eria Menahemu agasaria kegima omochie o Tifusa, agaita kera oyomo orenge imeo, na ase chingongo chionsi chiayoetanaine korwa Tirisa na kogenderera, ekiagera tibamoigorerete ebiita bi’omochie oria asoe. Boigo akoora abakungu bonsi b’aroro barenge barito.

17Ase omwaka bw’emerongo etato, na kianda, bw’okogamba gw’Asaria, omoruoti bw’Abayuda, Menahemu, mosinto o Gadi, agachaka kogambera Abaisraeli, akagamba emiaka ikomi agwo Samaria.

18Nere agakora ayare amabe ase amaiso ’Omonene; ase amatuko aye onsi teatananete korwa ase ebibe biria Yeroboamu, mosinto o Nebati, akorete akagera Abaisraeli bagakora ebibe.

19Puli, omoruoti bw’Abaasuri agacha korwania ense eria, na Menahemu akaa Puli chibesa chie chifeta, chitalanta elifu eyemo, erinde amokonye na akore oboruoti bwaye bobe ne chinguru.

20Menahemu akarusia chibesa echio buna ebango korwa ase Abaisraeli abarenge abanda; kera oyomo obo akarua chisekeli chie chifeta emerongo etano. Chibesa echi akaa omoruoti bw’Abaasuri. Ase ayio omoruoti bw’Abaasuri akairana tamenya ase ense eria.

21Bono amang’ana ande onsi igoro ya Menahemu, na aya onsi akorete, nigo arikire ase Ebuku y’ogokora kw’Abaruoti b’Abaisraeli.

22Menahemu akarara ase chisokoro chiaye chiararete, na Pekahia, omwana oye omomura, akaba okogamba ase ribaga riaye.

23Ase omwaka bw’emerongo etano bw’okogamba gw’Asaria, omoruoti bw’Abayuda, Pekahia, mosinto o Menahemu, agachaka kogambera Abaisraeli agwo Samaria, akagamba emiaka ebere.

24Agakora ayare amabe ase obosio bw’Omonene; teatananete korwa ase ebibe biria Yeroboamu, mosinto o Nebati, akorete akagera Abaisraeli bagakora ebibe.

25Peka, mosinto o Remalia, omotang’ani bw’abarwani esegi baye, agakora omoroberio amo n’Abagileadi emerongo etano bw’ogoita Pekahia, barabwo bakamoitera agwo Samaria, agaita n’Arigobu na Arie, ase enyomba enene y’omoruoti.

26Bono amang’ana ande onsi igoro ya Pekahia, na aya onsi akorete, nigo arikire ase Ebuku y’ogokora kw’Abaruoti b’Abaisraeli.

27Ase omwaka bw’emerongo etano, na ebere, bw’okogamba gw’Asaria, omoruoti bw’Abayuda, Peka, mosinto o Remalia, agachaka kogambera Abaisraeli, agwo Samaria, akagamba emiaka emerongo ebere.

28Peka agakora ayare amabe ase amaiso ’Omonene. Teatananete korwa ase ebibe biria Yeroboamu, mosinto o Nebati, akorete akagera Abaisraeli bagakora ebibe.

29Ase engaki y’okogamba gwa Peka, omoruoti bw’Abaisraeli, Tigilati‐Pileseri, omoruoti bw’Abaasuri, agacha akabwata Iyoni, na Abeli‐Beti‐Maaka, na Yanoa, na Kedesi, na Hasori, na orogongo rwa Gileadi, na orwa Galili, na ense yonsi ya Nafutali. Boigo agoosa abanto, akabaira ase ense y’Abaasuri.

30Ase omwaka bw’emerongo ebere bw’okogamba kwa Yotamu, mosinto bwa Usia, Hosea, mosinto bwa Ela, agakora omoroberio bw’ogoita Peka, mosinto o Remalia; akamoita, naende akaba okogamba ase ribaga riaye.

31Bono amang’ana ande onsi igoro ya Peka, na aya onsi akorete, nigo arikire ase Ebuku y’ogokora kw’Abaruoti b’Abaisraeli.

32Ase omwaka o kabere bw’okogamba gwa Peka, mosinto o Remalia, omoruoti bw’Abaisraeli, Yotamu, mosinto bwa Usia, omoruoti bw’Abayuda, agachaka kogamba.

33Nigo arenge nemiaka emerongo ebere, na etano, ekero achagete kogamba, na akagamba emiaka ikomi na etano nomo agwo Yerusalemu. Ng’ina nigo arenge korokwa Yerusa, omosubati o Zadoki.

34Ere agakora ayare amaronge ase amaiso ’Omonene, buna aya onsi Usia ise akorete.

35Korende nonya naboigo, aase aimokererete igoro agosasimerwa agatigwa kobao; abanto bakagenderera korua ebing’wanso na gosambera ubani igoro y’aase agwo. Yotamu akaagacha Egeita kia Rogoro ki’enyomba y’Omonene.

36Bono amang’ana ande onsi igoro ya Yotamu, na aya onsi akorete, nigo arikire ase Ebuku y’ogokora kw’Abaruoti b’Abayuda.

37Ase amatuko aria Omonene agachaka gotoma Resini, omoruoti bw’Abasiiria, na Peka, mosinto o Remalia, bakagenda korwania Abayuda.

38Yotamu akarara ase chisokoro chiaye chiararete, agatindekwa aase chiatindegetwe, agwo ase Omochie o Daudi, sokoro yaye, na Ahasi omwana oye omomura, akaba okogamba ase ribaga riaye.

← Chapter 14 Jump to: Chapter 16 →