2 Kings 5

Gussi (EBIBILIA ENCHENU) 2020

← Chapter 4 Jump to: Chapter 6 →

1Naamani, omochiki bw’abarwani esegi b’omoruoti bw’Abasiiria, nigo arenge omonto bw’engencho enene ase obosio bw’omonene oye, na omonene oye nigo amosigete mono, ekiagera ase engencho ya Naamani Omonene aete Abasiiria obobui. Ere nigo arenge omonto etuoni y’esegi, korende oborwaire bwa ukoma mbwamoriete.

2Engaki eyemo, ekero Abasiiria bagendete gosakora, bagoosa omoiseke omoke korwa ase ense y’Abaisraeli, na ere akaba ogokorera moka Naamani emeremo.

3Omoiseke oria agatebia moka omonene oye, “Onye ndiria omonene one arenge koba amo nomobani oria okare agwo Samaria, omobani oria nanga namogwenia oborwaire bwaye bwa ukoma.”

4Ase ayio Naamani akagenda agatebia omonene oye amang’ana aya omwana oria omoiseke bw’Abaisraeli amotebetie.

5Na omoruoti bw’Abasiiria akamotebia, “Genda bono iga, nainche nintome rirube ase omoruoti bw’Abaisraeli.” Naamani akagenda akairera omoruoti bw’Abaisraeli chitalanta chie chifeta ikomi, ne chisekeli chie chitahabu chilifu isano nemo, ne chianga chi’omoyega ikomi.

6Akairana rirube ase omoruoti bw’Abaisraeli riarikire iga, “Ekero rirube eri rikogoikera, omanye ng’a natomire Naamani, omosomba one, erinde omogwenie ase oborwaire bwaye bwa ukoma.”

7Ekero omoruoti bw’Abaisraeli asomete rirube riria, agatandora chianga chiaye, akabora, “Inee! Inche Nyasae inde? Inde nokobua kw’ogoita na korenta moyo, erinde omonto oyo otoma amang’ana asende ng’a ngwenie omonto obwate oborwaire bwa ukoma? Rigereria monyare korora ng’a omoruoti oyo nigo arigetie eriomana asende.”

8Korende Elisha, omonto oria o Nyasae, akaigwa ng’a omoruoti bw’Abaisraeli otandoire chianga chiaye, agatoma omonto ase omoruoti amotebie, “Ninki kiagera aye gwatandora chianga chiao? Tiga omonto oyio achiche asende, erio nario aramanye ng’a omobani nare ase Abaisraeli.”

9Bono Naamani akagenda amo ne chibarasi ne chigari chiaye, agatenena ase egesieri ki’enyomba y’Elisha.

10Elisha agatoma omonto asare, akamotebia “Genda bwesibie ase orooche rwa Yorodan ara gatano na kabere, na omobere oo noirane obe buna orenge ritang’ani, naye nocheneke.”

11Naamani akagechigwa; erio akagenda, ogoteba, “Rora nigo narengereria ng’a ere nigo arenge gosoka gocha asende, atenene asabe ase erieta ri’Omonene, Nyasae oye, naende abeke okoboko kwaye igoro ase ndwarete, na agwenie oborwaire bwane bwa ukoma.

12Inee! Chindooche chia Damesiki, Abaana na Faripari, tichiri chingiya kobua chindooche chi’ense y’Abaisraeli? Inee! Tinarenge gwesibia ase chirochio ncheneke?” Bono akaonchoka akagenda ore nokogechigwa.

13Korende abasomba baye bakamochiera, bakamotebia, “Tata, onye omobani oyo nagotebia okore egento kere egekong’u, Inee, tikwarenge kogekora? Korende bono, nase ki otakomoigwera ekero agotebia: Genda bwesibie, naye nocheneke?”

14Ase ayio agatirimboka, agasoa ase orooche rwa Yorodan ara gatano na kabere, buna omonto oria o Nyasae amotebetie. Omobere oye okairanerana okaba buna oyo bw’omwana omoke, ere agacheneka.

15Akairana ase omonto oria o Nyasae, ere amo nabanto bonsi barenge komo, agatenena ase obosio bwaye, akamotebia, “Bono namanyire ng’a Nyasae onde tari ase ense yonsi, otatiga oyo bw’Abaisraeli. Ase ayio bono, koranche oire ekeegwa korwa asende inche omosomba oo.”

16Elisha agateba, “Ekeene, buna Omonene are moyo, oria inche ngokorera, tinkoira ekeegwa nonya nekemo.” Naamani akamosorora anche abiire, korende Elisha akaanga.

17Erio Naamani agateba, “Onye taibo, nagosabire, tiga inche omosomba oo ng’egwe amaroba aisaine chigurube ibere, chiyombo ibere chiranyare kobogoria, ekiagera korwa bono na kogenderera inche omosomba oo tinkorua ebing’wanso ase enyasae ende yonsi, otatiga nase Omonene bweka.

18Tiga Omonene anyabere inche omosomba oo ase amang’ana aya: Ekero omonene one akogenda ase enyomba ya Rimoni gochia gosasima aroro ogwesiirera ase okoboko kwane, nainche boigo ekero keria nyekumbe ime ase enyomba ya Rimoni. Omonene anyabere inche, omosomba oo, ase ring’ana eri.”

19Elisha akamotebia, “Genda nomorembe.” Korende ekero Naamani arure asare, agendire egeka egeke korwa aroro,

20Gehasi, omosomba bw’Elisha omonto oria o Nyasae, agateba, “Rigereria, omonene one otigire Naamani, Omosiiria oria, ogendire, na tancheti koegwa egento ase ebio arentire. Ekeene buna Omonene are moyo, inche iminyoke imobwatie, inyore egento korwa asare.”

21Ase igo Gehasi akabwatia Naamani. Na ekero Naamani aroche omonto okominyoka korwa nyuma yaye, agaika korwa ase egari igoro, akagenda akaumerana nere, akamoboria, “Mang’ana ki aba?”

22Gehasi akamoiraneria, “Amang’ana onsi namaya. Omonene one nigo antoma ng’a bono iga aborokigwa babere b’ababani bachire korwa ense y’ebigoro y’Efraimu, koranche obae etalanta eyemo y’efeta, ne chianga chi’omoyega ibere.”

23Naamani akamotebia, “Koranche oire chitalanta ibere.” Igo akamosorora, akamosibera chitalanta ibere chie chifeta ase emebuko ebere, akamoa ne chianga ibere, agatweka abasomba baye babere. Barabwo bakabibogoria, bagatang’ana bosio bwa Gehasi.

24Ekero baigete agwo ase ekegoro, Gehasi akabirusia korwa ase amaboko abo, akabibeka nyomba ime. Erio agatiga abanto baria bakagenda.

25Agasoa nyomba, agatenena ase obosio bw’omonene oye Elisha, nere akamoboria, “Gehasi, ng’ai gese kwarenge?” Ere akairaneria, “Inche omosomba oo tinagendete aande.”

26Korende Elisha akamotebia, “Inee! Tinagenda amo naye ase omoika, ekero omonto oria aonchoka korwa ase egari yaye oumerana naye? Inee! Eye nero engaki y’ogwancha chibesa, ne chianga, na emegondo y’emezeituni na ey’emesabibu, ne ching’ondi, ne chiombe, na abasomba, abasacha na abakungu?

27Ase ayio, oborwaire bwa ukoma bwa Naamani nabokobwate aye na ororeria rwao kogenderera botambe.” Gehasi akarua ase obosio bw’Elisha, akagenda ore noborwaire bwa ukoma, orabete se.

← Chapter 4 Jump to: Chapter 6 →