bible
ra
🌐 Language
English
Español
Français
Deutsch
Português
Italiano
Nederlands
Русский
中文
日本語
한국어
العربية
Türkçe
Tiếng Việt
ไทย
Indonesia
All Languages
Home
/
Gussi
/
Gussi (EBIBILIA ENCHENU) 2020
/
2 Kings 10
2 Kings 10
Gussi (EBIBILIA ENCHENU) 2020
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 11 →
1
Ahabu nabwate abana abamura emerongo etano na ebere agwo Samaria. Yehu akarika amarube, akayatoma Samaria, ase abagambi abarenge Yesireeli, na ase abagaaka, na ase abarendi b’abana b’Ahabu, agateba,
2
“Abana b’omonene oino nao bare nainwe, ne chigari ne chibarasi nao chire amo nainwe, amo nemechie egiteire chindwaki, boigo nebirwanero bionsi. Ase ayio, rirube rikobaikera,
3
mochore oyore omuya mono, naende oisanerete, korwa ase egati y’abana abamura b’omonene oino, erio momobeke aikaranse ase ekerogo ki’oboruoti gia ise. Erio morwanerere enyomba y’omonene oino.”
4
Korende barabwo bakaba nobwoba obonene mono, bagateba, “Abaruoti babere tibanyarete kobua Yehu, naki intwe torakore tomobue?”
5
Ase ayio, ere oria otenenerete enyomba y’omoruoti, na oria otenenerete omochie, amo nabagaaka na abateneneri b’abana b’Ahabu, bagatoma amang’ana ase Yehu, bakabora, “Intwe nabasomba bao, nabo torakore onsi aya ogotochika. Titobeka onde bwensi koba omoruoti; aye kora kende gionsi oranche.”
6
Naende akabarikera rirube eria kabere, akabatebia, “Onye more ase ensemo yane, naende onye more ang’e konyigwera, butora emetwe y’abana b’omonene oino, na ankio, engaki buna eye mochiche asende aiga Yesireeli.” Abana b’omoruoti emerongo etano na ebere, nao bamenyete amo nabanto abanene b’omochie, baria batenenerete.
7
Ekero rirube riria riabaikerete, bakaimokia abana b’omoruoti emerongo etano na ebere, bakabaita nemioro. Erio bakabeka emetwe yabo ebitonga ime, bakayetoma gochia ase Yehu agwo Yesireeli.
8
Ekero omonto arentete amang’ana ng’a emetwe y’abana b’omoruoti yarentirwe, Yehu agateba, “Yebeke amo ase chitui ibere agwo ase egesoero ki’egeita, ebeereo goika mambia.”
9
Rituko ria kabere ekero asogete mambia, agatenena agakwana nabanto bonsi, akabora, “Inwe timori na komocha. Ninche nakora omoroberio mamincha y’omonene one, nkamoita, korende ning’o oita abaiga bonsi?
10
Ase ayio, manya ng’a ring’ana ri’Omonene tirikogwa inse bosa, riria Omonene akwanete igoro y’enyomba y’Ahabu. Ekeene, Omonene okorire aya akwanete goetera ase omosomba oye Elija.”
11
Erio Yehu agaita abanto bonsi baria batigarete b’enyomba y’Ahabu agwo Yesireeli, agaita nabanto baye abanene bonsi, na abasani baria bamanyaine, na abakuani baye, tatigaretie nonya noyomo.
12
Yehu akaimoka, akagenda Samaria. Ekero arenge inchera, agaika Beti‐Ekedi aase abarisia barenge konachera ching’ondi amarionya,
13
akaumerana nabamwabo Ahasia, omoruoti bw’Abayuda, akaboria, “Inwe mbarabi?” Nabarabwo bakairaneria, “Intwe nigo tore abamwabo Ahasia, nigo tokogenda gokwania abana b’omoruoti, na ab’eting’ana, ng’ina omoruoti.”
14
Yehu agatebia abanto baye. “Babwate bare moyo!” Na barabwo bakababwata bare moyo, bakabaita na kobaruta ase engoro agwo ang’e na Beti‐Ekedi, abanto emerongo ene, na babere; tatigaretie nonya noyomo.
15
Ekero Yehu aruete aase agwo akaumerana na Yehonadabu, mosinto o Rekabu, ogocha komorotota. Yehu akamokwania, akamoboria, “Enkoro yao nendonge ere asende buna eyane ere asore?” Yehonadabu akamoiraneria, “Ee, nendonge ere.” Yehu akamotebia, “Onye nabo, tobwatane amaboko.” Bakabwatana amaboko, na Yehu akamoriinia ase egari yaye ime.
16
Akamotebia, “Inchuo amo nainche, orore risemi riane na omokia one ase Omonene!” Erio bakagenda komo ase egari ya Yehu.
17
Na ekero aigete Samaria, agaita abanto bonsi batigarete ase enyomba y’Ahabu agwo Samaria, goika akabasiria kegima, buna Omonene atebete goetera ase Elija.
18
Yehu agasangereria abanto bonsi, akabatebia, “Ahabu nigo akorerete Baali ake igo, korende inche Yehu nigo ndayekorere mono goetania.
19
Ase ayio bono, ndangereria ababani bonsi ba Baali, na abakoreri baye bonsi, na abakuani baye bonsi; onde tabaisa gotigara otache, ekiagera inche ngochia nde korua ekeng’wanso ekenene ase Baali. Omonto onde bwensi oramoche, tachicha, takoba moyo.” Korende Yehu nigo akorete ayio ase obong’ainereria, erinde aite na gosiria abakoreri ba Baali.
20
Yehu agachika, agateba, “Rangeria abanto babe nomosangererekano omochenu ase Baali!” Ase ayio, barabwo bakararia amang’ana ayio.
21
Yehu agatoma amang’ana ase Abaisraeli bonsi, na abakoreri ba Baali bonsi bagacha, goika nonya nomonto oyomo tatigara otachete. Bagasoa enyomba ya Baali, na enyomba eria egaichora nabanto churi.
22
Agatebia omoteneneri bwe chianga chi’ogosasimera, “Orentere abakoreri bonsi ba Baali chianga chiabo.” Ere akabarentera chianga.
23
Yehu agasoa enyomba ya Baali amo na Yehonadabu, mosinto o Rekabu, agatebia abakoreri ba Baali “Rigia na morore ng’a omosomba bw’Omonene tari ase egati yaino nonya noyomo, korende nabakoreri ba Baali boka.”
24
Erio bagasoa korua ebing’wanso bi’ogosambwa, na ebing’wanso binde. Yehu konya obekire abanto emerongo etano na etato isiko, abatebetie, “Omonto onde bwensi asemore oratige omonto atooreke ase abwo nkobeka ase amaboko aino, oyio goika akwe ribaga riaye.”
25
Ekero Yehu akoorete korua ekeng’wanso ki’ogosambwa, agatebia abarendi na abatang’ani, “Soa ime, mobaite, timotiga onde atooreke.” Kobaitire nemioro, abarendi na abatang’ani bakabatuguta isiko. Erio bagasoa akanyomba ka ime k’enyomba ya Baali,
26
ne chisiiro chiateneneirie Baali bagachisokia korwa aroro, bagachisamba.
27
Bagatagora omogwekano o Baali enyene na enyomba yaye, erio bakaroisia aase aria akaba echoo, naboigo ere nonya ngoika rero iga.
28
Ase enchera eyio Yehu agasiria Baali korwa ase Abaisraeli.
29
Korende tatigete kobwatia chinchera chia Yeroboamu, mosinto o Nebati; agakora ebibe biria Yeroboamu akorete akagera Abaisraeli bagakora ebibe. Tatigete emegwekano ye chimori chi’etahabu eria yarenge agwo Beteli na Dani.
30
Omonene agatebia Yehu, “Ekiagera gwakorire buya ase ogokora ayare amaronge ase amaiso aane, naende gwakoreire enyomba y’Ahabu koreng’ana nebirengererio bi’enkoro yane, abana bao goika ekiaare gia kane mbabe bagoikaransa ase ekerogo ki’oboruoti ki’Abaisraeli.”
31
Korende Yehu tarendete na kobwata amachiko ’Omonene, Nyasae bw’Abaisraeli, nenkoro yaye yonsi. Tatigete gokora ebibe biria Yeroboamu akorete, akagera Abaisraeli bagakora ebibe.
32
Ase amatuko aria Omonene agachaka gokeyia ense y’Abaisraeli. Hasaeli akababua ase chinsemo chiabo chionsi,
33
gochakera moocha ya Yorodan na kogenderera gochia irianyi goika Aroeri, omochie ore ang’e nakarooche k’Arinoni. Eye nense ya Gileadi na Basani, ase ebisaku bia Gadi na Reuben na ekeng’ese gi’ekia Manase biamenyete.
34
Bono amang’ana ande onsi igoro ya Yehu, na aya onsi akorete, na okobua kwaye gwonsi, nigo arikire ase Ebuku y’ogokora kw’Abaruoti b’Abaisraeli.
35
Na Yehu akarara ase chisokoro chiaye chiararete, agatindekwa agwo Samaria, na Yehoahasi, omwana oye omomura, akaba okogamba ase ribaga riaye.
36
Engaki Yehu agambete igoro ase Abaisraeli agwo Samaria nemiaka emerongo ebere, na etano na etato.
← Chapter 9
Jump to:
Chapter 1
Chapter 2
Chapter 3
Chapter 4
Chapter 5
Chapter 6
Chapter 7
Chapter 8
Chapter 9
Chapter 10
Chapter 11
Chapter 12
Chapter 13
Chapter 14
Chapter 15
Chapter 16
Chapter 17
Chapter 18
Chapter 19
Chapter 20
Chapter 21
Chapter 22
Chapter 23
Chapter 24
Chapter 25
Chapter 11 →
All chapters:
1
2
3
4
5
6
7
8
9
10
11
12
13
14
15
16
17
18
19
20
21
22
23
24
25