Exodus 12 — Ilonggo (Ang Biblia (1982))

1Ang Ginoo nagsiling kay Moises kag kay Aaron sa duta sang Egipto,

2“Ining bulan manginpamuno sang mga bulan sa inyo; ini manginnahauna nga bulan sang tuig sa inyo.

3Ipamolong ninyo sa bug-os nga katilingban sang Israel nga sa ikapulo nga adlaw sining bulan ang tagsa ka tawo sa ila magkuha sing isa ka cordero sono sa ila mga kabaranggayan, isa ka cordero sa tagsa ka panimalay;

4kag kon ang panimalay tama kadiotay nga sa isa ka cordero, niyan sia kag ang iya kasilingan nga madason sa iya balay magkuha sing isa sono sa kadamuon sang mga tawo; isipon ninyo sa cordero sono sa makaon sang tagsa ka tawo.

5Ang inyo cordero manginwala sing kasawayan, lalaki nga isa ka tuig; kuhaon ninyo ini sa mga carnero ukon sa mga kanding;

6kag bokoton ninyo ini tubtub sa adlaw nga ikapulo kag apat sining bulan, kon ang bug-os nga pagtilipon sang katilingban sang Israel mag-ihaw sang ila mga cordero sa kahaponon.

7Niyan magkuha sila sang dugo, kag ipalhit ini sa duha ka bakalan kag sa olohan sang ganhaan sang mga balay nga kaonan nila sini.

8Sa sadtong gab-i magkaon sila sang unud, nga inasal sa kalayo; upud ang tinapay nga wala sing tapay kag ang mga gamhon nga mapait kaonon nila ini.

9Dili ninyo pagkaonon ini nga hilaw ukon linaga sa tubig, kondi inasal sa kalayo, ang iya olo pati ang iya mga tiil kag ang iya mga kasudlan.

10Kag dili kamo magbilin sing bisan ano sini tubtub sa aga, ang mabilin sini tubtub sa aga sonogon ninyo sa kalayo.

11Amo ini ang inyo pagkaon sini: nawagkusan ang inyo mga hawak, ang inyo mga sapin sa inyo mga tiil, kag ang inyo sungkud sa inyo kamut; kag kaonon ninyo ini sing dalidali. Ini pascua sang Ginoo.

12Kay magaagi ako sa sadtong gab-i sa duta sang Egipto, kag magapatay sang tanan nga panganay sa duta sang Egipto, tingub ang tawo kag ang sapat; kag batok sa tanan nga mga dios sang Egipto magahukom ako: Ako amo ang Ginoo.

13Ang dugo mangintanda sa inyo, sa mga balay diin kamo; kag kon makita ko ang dugo, magaligad ako sa inyo, kag wala sing kalalat-an sa inyo nga maglaglag sa inyo, kon akon laglagon ang duta sang Egipto.

14“Ining adlaw manginhandumanan sa inyo, kag bantayan ninyo ining piesta sa Ginoo; sa bug-os ninyong mga kaliwatan bantayan ninyo ini subong nga dayon nga pagsolondan.

15Pito ka adlaw magkaon kamo sing tinapay nga walay tapay; sa nahaunang adlaw ipalayo ninyo ang tapay gikan sa inyo mga balay, kay bisan sin-o nga magkaon sang tinapay nga may tapay, kutub sa nahaunang adlaw tubtub sa ikapito, ina nga tawo utdon gikan sa Israel.

16Sa nahaunang adlaw may balaan nga pagtilipon sa inyo, kag sa ikapitong adlaw may balaan nga pagtilipon; wala sing bisan anong buluhaton nga himoon sadtong adlaw; luwas sang kinahanglan kaonon sang tagsa ka tawo, ina lamang ang maaman ninyo.

17Kag bantayan ninyo ang piesta sang tinapay nga walay tapay, kay sa sini gid nga adlaw ginpagowa ko ang inyo kasoldadosan gikan sa duta sang Egipto: busa bantayan ninyo ining adlaw, sa bug-os ninyong mga kaliwatan, sa dayon nga pagsolondan.

18Sa nahaunang bulan, sa ikapulo kag apat nga adlaw sang bulan sa kahaponon, magkaon kamo sing tinapay nga walay tapay, kag gani tubtub sa ikaduha ka pulo kag isa nga adlaw sang bulan sa kahaponon.

19Sa pito ka adlaw wala sing makita nga tapay sa inyo mga balay; kay ang bisan sin-o nga magkaon sang may tapay, inang tawo utdon gikan sa katilingban sang Israel, bisan sia manlulugayaw ukon tumandok.

20Dili kamo magkaon sing bisan ano nga may tapay; sa inyo tanan nga mga puluy-an magkaon kamo sing tinapay nga walay tapay.”

21Niyan gintawag ni Moises ang tanan nga tigulang sang Israel, kag nagsiling sa ila, “Pili kamo sing mga cordero sono sa inyo mga panimalay, kag ihawa ang cordero sang pascua.

22Magkuha kamo sing isa ka pungpung nga isopo kag itusmog ini sa dugo nga yara sa batiya, kag ipalhit ang dugo nga yara sa batiya sa olohan sang ganhaan kag sa duha ka bakalan; kag wala sa inyo sing maggowa sa ganhaan sang iya balay tubtub sa aga.

23Kay ang Ginoo magaagi sa pagpatay sang mga Egiptohanon; kag kon makita niya ang dugo sa olohan sang ganhaan kag sa duha ka bakalan, ang Ginoo magaligad sa ganhaan, kag indi magtugut nga ang manuglaglag magsulud sa inyo mga balay sa pagpatay sa inyo.

24Bantayan ninyo ining butang nga pagsolondan sa inyo kag sa inyo mga anak sa gihapon.

25Kag kon mag-abut kamo sa duta nga ihatag sa inyo sang Ginoo, sono sa ginsaad niya, bantayan ninyo ining pag-alagdan.

26Kag kon ang inyo mga anak magsiling sa inyo, ‘Ano bala ang kahologan sining pag-alagdan?’

27magasiling kamo, ‘Ini halad sang pascua sang Ginoo, kay nagligad sia sa kabalayan sang katawohan sang Israel sa Egipto, sang pagpatay niya sang mga Egiptohanon apang ginluwas ang amon kabalayan.’” Kag ang katawohan nagyaub kag nagsimba.

28Niyan ang katawohan sang Israel naglakat kag naghimo sang subong; sono sa ginsogo sang Ginoo kay Moises kag kay Aaron, amo ang ginhimo nila.

29Sa tunga sang gab-i ginpatay sang Ginoo ang tanan nga panganay sa duta sang Egipto, kutub sa panganay ni Faraon nga nagalingkod sa iya trono tubtub sa panganay sang bihag nga yara sa bilanggoan nga madulum, kag ang tanan nga panganay sang kahayupan.

30Kag nagtindug si Faraon sang gab-i, sia, kag ang tanan niya nga alagad, kag ang tanan nga Egiptohanon; kag may dakung hinaya sa Egipto, kay wala sing balay nga wala sing isa nga patay.

31Kag ginpatawag niya si Moises kag si Aaron sa kagab-ihon, kag nagsiling, “Tindug kamo, halin kamo gikan sa tunga sang akon katawohan, kamo kag ang katawohan sang Israel; kag lakat kamo, alagda ang Ginoo, sono sa ginsiling ninyo.

32Kuhaa ang inyo panong kag ang inyo kabakahan, sono sa ginsiling ninyo, kag maglakat; kag pakamaayoha man ako!”

33Kag ginsako sang mga Egiptohanon ang katawohan, sa pagpagowa sa ila sing madali gikan sa duta; kay nagsiling sila, “Tanan kami mga patay.”

34Gani gindala sang katawohan ang ila linamas sa wala pa magkumbo, nga nagabagtong sang ila lamasan upud sa ila panapton sa ila mga abaga.

35Ginhimo sang katawohan sang Israel sono sa polong ni Moises, kay nagpangayo sila sa mga Egiptohanon sing huluyason nga pilak kag bulawan, kag panapton;

36kag ang Ginoo nagpapahamuut sang katawohan sa itololok sang mga Egiptohanon, sa bagay nga ginhatagan sila nila sang ila ginpangayo. Sa amo ginhublasan nila ang mga Egiptohanon.

37Kag ang katawohan sang Israel nagpanlakatan kutub sa Rameses pa Sucot, mga anum ka gatus ka libo ka lalaki nga naglakat, walay labut ang kababayin-an kag kabataan.

38Isa ka nagasalakut nga kadam-an ang nagtaklad man upud sa ila, kag kabakahan, mga panong kag kahayupan nga tama kadamu.

39Kag sa linamas nga gindala nila gikan sa Egipto nagbibingka sila sing mga kalan-onon nga walay tapay, kay walay tapay ini, bangud nga ginsobol sila pagowa sa Egipto kag indi makapalantang, kag wala sila makaaman nga sa ila kaugalingon sing mga kalan-on.

40Ang tion nga ginpuyo sang katawohan sang Israel sa Egipto apat ka gatus kag katloan ka tuig.

41Kag sa katapusan sang apat ka gatus kag katloan ka tuig, sa amo gid nga adlaw, naggowa ang tanan nga kasoldadosan sang Ginoo gikan sa duta sang Egipto.

42Gab-i ini sang pagbantay sang Ginoo, sa pagpagowa sa ila sa duta sang Egipto; gani sa amo man nga gab-i isa ka gab-i sang pagbantay nga sa Ginoo sang tanan nga katawohan sang Israel sa bug-os nila nga mga kaliwatan.

43Kag ang Ginoo nagsiling kay Moises kag kay Aaron, “Ini amo ang pagsolondan sang pascua: wala sing dumuloong nga magkaon sini;

44apang ang tagsa ka ulipon nga ginbakal sa cuarta makakaon sini sa tapus mo macircuncidar sia.

45Ang manlulugayaw ukon ang alagad nga sinoholan dili magkaon sini.

46Kaonon ini sa isa ka balay; dili gid kamo magdala sa gowa sang balay sang unud sini; kag dili ninyo pagbalion ang iya tul-an.

47Ang bug-os nga katilingban sang Israel magahiwat sini.

48Kag kon ang dumuloong magpanlugayaw upud sa imo kag magbantay sang pascua sa Ginoo, circuncidahon ang tanan niya nga lalaki, niyan magpalapit sia kag maghiwat sini; manginsubong sia sang tumandok sang duta. Apang wala sing dicircuncidado nga tawo nga magkaon sini.

49Isa ka kasogoan sa tumandok kag sa dumuloong nga nagapanlugayaw sa tunga ninyo.”

50Amo ini ang ginhimo sang katawohan sang Israel; sono sa ginsogo sang Ginoo kay Moises kag kay Aaron, amo ang ginhimo nila.

51Kag sa amo gid nga adlaw ginpagowa sang Ginoo ang katawohan sang Israel sa duta sang Egipto sono sa ila mga kasoldadosan.