Exodus 9

Ilonggo (Ang Biblia (1982))

← Chapter 8 Jump to: Chapter 10 →

1Niyan ang Ginoo nagsiling kay Moises, “Kadtoi sa sulud si Faraon, kag sugiri sia, ‘Ang Ginoo, ang Dios sang mga Hebreo, nagasiling sing subong sini, “Tuguti sa paglakat ang akon katawohan, agud nga alagdon nila ako.

2Kay kon magdumili ka sa pagpalakat sa ila kag punggan nimo sila,

3yari karon, ang kamut sang Ginoo nga may daku gid nga kamatay manginsa imo kahayupan nga yara sa latagon, sa mga kabayo, sa mga asno, sa mga camelyo, sa kabakahan, kag sa mga panong.

4Apang tuhayon sang Ginoo ang kahayupan sang Israel kag ang kahayupan sang Egipto, agud nga wala sing mapatay sang tanan nga iya sang katawohan sang Israel.” ’”

5Kag ang Ginoo nagpat-ud sing tion, nga nagasiling, “Buwas himoon sang Ginoo ining butang sa duta.”

6Kag sa madason nga adlaw ginhimo sang Ginoo ining butang; napatay ang tanan nga kahayupan sang mga Egiptohanon, apang ang kahayupan sang katawohan sang Israel wala mapatyi bisan isa.

7Kag ginpakadtoan ni Faraon, kag yari karon, sa kahayupan sang mga Israelnon wala sing napatay bisan isa. Apang ang tagiposoon ni Faraon nagbatinggilan, kag wala niya pagtuguti sa paglakat ang katawohan.

8Kag ang Ginoo nagsiling kay Moises kag kay Aaron, “Dala kamo sing mga tinapnay nga mga abo sang horno, kag ipasabwag ini kay Moises nayon sa langit sa itololok ni Faraon.

9Kag manginyab-ok ini sa bug-os nga duta sang Egipto, kag manginhubag nga nagabuswang sa tawo kag sa sapat, sa bug-os nga duta sang Egipto.”

10Gani nagkuha sila sing abo sa horno, kag nagtindug sa atubangan ni Faraon, kag si Moises nagsabwag sini nayon sa langit, kag nanginhubag ini nga nagabuswang sa tawo kag sa sapat.

11Kag ang mga salamangkero indi makatindug sa atubangan ni Moises bangud sang mga hubag, kay hubagon ang mga salamangkero kag ang tanan nga Egiptohanon.

12Apang ginpatig-a sang Ginoo ang tagiposoon ni Faraon, kag wala sia magpamati sa ila; sono sa napamolong sang Ginoo kay Moises.

13Niyan nagsiling ang Ginoo kay Moises, “Bangon ka sing aga pa gid kag tindug sa atubangan ni Faraon, kag isiling sa iya, ‘Amo ini ang ginasiling sang Ginoo, ang Dios sang mga Hebreo, “Tuguti sa paglakat ang akon katawohan, agud nga alagdon nila ako.

14Kay sa sining tion ipadala ko ang tanan ko nga kalalat-an sa imo tagiposoon, kag sa imo mga alagad kag sa imo katawohan, agud nga makahibalo ka nga wala na gid sing iban nga kaangay sa akon sa bug-os nga duta.

15Kay karon nauntay ko na kuntani ang akon kamut kag nalaglag ikaw kag ang imo katawohan sa kalalat-an, kag ikaw nawala kuntani sa duta;

16apang tungud sining katuyoan ginbuhi ko ikaw, sa pagpakita sa imo sang akon gahum, agud nga mapahayag ang akon ngalan sa bug-os nga duta.

17Nagapakataas ka pa sang imo kaugalingon batok sa akon katawohan, kag indi magtugut sa ila sa paglakat.

18Yari karon, buwas sa mga amo ining tion magapaulan ako sing daw bato nga hielo nga tama kadamu, subong sang wala pa nga mas-a mahanabu sa Egipto kutub sang adlaw nga ginpasad ini tubtub karon.

19Busa karon padala ka, ipasilong sing malig-on ang imo kahayupan kag ang tanan nga imo nga yara sa latagon; kay ang tagsa ka tawo kag sapat nga yara sa latagon kag wala mapasilongi matup-an sila sang ulan nga daw bato nga hielo, kag mapatay sila.” ’”

20Niyan ang nahadluk sang polong sang Ginoo sa mga alagad ni Faraon nagpapalagyo sang iya mga ulipon kag sang iya kahayupan pakadto sa kabalayan;

21apang ang wala magsapak sang polong sang Ginoo nagbiya sang iya mga ulipon kag sang iya kahayupan sa latagon.

22Kag ang Ginoo nagsiling kay Moises, “Untaya ang imo kamut nayon sa langit, agud nga may ulan nga daw bato nga hielo sa bug-os nga duta sang Egipto, sa tawo kag sa sapat kag sa tagsa ka tanum sang latagon, sa bug-os nga duta sang Egipto.”

23Niyan gin-untay ni Moises ang iya sungkud nayon sa langit; kag ang Ginoo nagpadala sing daguub kag ulan nga daw bato nga hielo, kag ang kalayo nagburhot pakadto sa duta. Kag ginpaulan sang Ginoo sing daw bato nga hielo sa duta sang Egipto;

24may ulan nga daw bato nga hielo, kag kalayo nga nagakirab sing dalayon sa tunga sang ulan nga hielo, madamul gid subong sang wala pa gid mahanabu sa bug-os nga duta sang Egipto kutub nga nanginpungsud ini.

25Ang ulan nga daw bato nga hielo naglaglag sang bug-os nga duta sang Egipto sang tanan nga yara sa latagon, tingub ang tawo kag sapat; kag ang ulan nga daw bato nga hielo naglaglag sang tagsa ka tanum sang latagon, kag nagbali sang tagsa ka kahoy sang latagon.

26Lamang sa duta sang Gosen, diin ang katawohan sang Israel, wala sing ulan nga daw bato nga hielo.

27Niyan ginpakadtoan ni Faraon, kag ginpatawag si Moises kag si Aaron, kag nagsiling sa ila, “Sa sining tion nakasala ako; ang Ginoo matarung, kag ako kag ang akon katawohan malaut.

28Pakilooyi ang Ginoo; kay tuman na ang mabaskug nga mga pagdaguub kag ang ulan nga daw bato nga hielo; ako magatugut sa pagpalakat sa inyo, kag indi na kamo magpabilin pa.”

29Si Moises nagsiling sa iya, “Sa gilayon nga ako makagowa sa banwa, magauntay ako sang akon mga kamut sa Ginoo; ang daguub magauntat, kag wala na gid sing ulan nga daw bato nga hielo, agud nga makahibalo ka nga ang duta iya sang Ginoo.

30Apang nahanungud sa imo kag sa imo mga alagad, nakahibalo ako nga wala pa kamo mahadluk sa Ginoong Dios.”

31(Ang lino kag ang sebada nalaglag, kay ang sebada nagauhay kag ang lino nagapamulak.

32Apang ang trigo kag ang espelta wala malaglag, kay wala pa mag-ulhot sila.)

33Gani si Moises naghalin sa atubangan ni Faraon pagowa sa banwa, kag nag-untay sang iya mga kamut sa Ginoo; kag nag-untat ang daguub kag ang ulan nga daw bato nga hielo, kag ang ulan wala na magtupa sa duta.

34Apang sang nakita ni Faraon nga nag-untat ang ulan kag ang ulan nga daw bato nga hielo kag ang daguub, sia nagpadayon pa sa pagpakasala, kag nagpatig-a sang iya tagiposoon, sia kag ang iya mga alagad.

35Gani ang tagiposoon ni Faraon nagtig-a, kag wala niya pagtuguti sa paglakat ang katawohan sang Israel; sono sa napamolong sang Ginoo paagi kay Moises.

← Chapter 8 Jump to: Chapter 10 →