Exodus 32

Ilonggo (Ang Biblia (1982))

← Chapter 31 Jump to: Chapter 33 →

1Sang nakita sang katawohan nga si Moises nagpalantang sa pagdulhog sa bukid, nagtipon sing tingub ang katawohan kay Aaron, kag nagsiling sa iya, “Tindug ka, himoi kami sing mga dios, nga magauna sa amon; kay nahanungud sining Moises, ang lalaki nga nagpagowa sa amon gikan sa duta sang Egipto, wala kami makahibalo kon ano ang nahanabu sa iya.”

2Kag si Aaron nagsiling sa ila, “Palusa ninyo ang mga aritos nga bulawan nga yara sa mga dulunggan sang inyo mga asawa, sang inyo mga anak nga lalaki, kag sang inyo mga anak nga babayi, kag dalha sila sa akon.”

3Gani ang bug-os nga katawohan nagpalus sang mga aritos nga bulawan nga yara sa ila mga dulunggan, kag gindala sila kay Aaron.

4Kag ginbaton niya ini sa kamut nila, kag ginpamandayan ini sang tigib, kag ginhimo ini nga tinday nga baka nga tinunaw; kay nagsiling sila, “Ini sila amo ang imo mga dios, O Israel, nga nagpagowa sa imo gikan sa duta sang Egipto!”

5Sang nakita ini ni Aaron, nagpatindug sia sing halaran sa atubangan sini; kag nagpabantala si Aaron kag nagsiling, “Buwas manginpiesta sa Ginoo.”

6Kag sang madason nga adlaw nagbangon sila sing aga pa, kag nagdolot sing mga halad-nga-sinonog kag nagdala sing mga halad-sa-paghidait; kag naglingkod ang katawohan sa pagkaon kag sa pag-inum, kag nagtindug sa paghampang.

7Kag ang Ginoo nagsiling kay Moises, “Magdulhog; kay ang imo katawohan, nga ginpataklad mo pagowa gikan sa duta sang Egipto, nagdunut sang ila kaugalingon;

8sa madali naglipas sila sa dalanon nga akon ginsogo sa ila; naghimo sila sa ila sing tinday nga baka nga tinunaw, kag nagsimba sini kag naghalad sa sini, kag nagsiling, ‘Amo ini ang imo mga dios, O Israel, nga nagpagowa sa imo gikan sa duta sang Egipto!’”

9Kag ang Ginoo nagsiling kay Moises, “Nakita ko ining katawohan, kag yari karon, ini katawohan nga tingkoyan;

10busa karon pabayai ako, nga magdabdab ang akon kasingkal batok sa ila kag mapapas ko sila; apang gikan sa imo himoon ko ang isa ka dakung pungsud.”

11Apang si Moises nagpakilooy sa Ginoo nga iya Dios, kag nagsiling, “O Ginoo, ngaa bala nagdabdab ang imo kasingkal batok sa imo katawohan, nga ginpagowa mo gikan sa duta sang Egipto sa dakung gahum kag sa makusug nga kamut?

12Ngaa bala nga magsiling ang mga Egiptohanon, ‘Sa kalaut ginpagowa niya sila, sa pagpatay sa ila sa kabukiran, kag sa pagpapas sa ila gikan sa kadaygan sang duta’? Bayai ang imo masingkal nga kaakig, kag magkalisud sining malaut batok sa imo katawohan.

13Dumduma si Abraham, si Isaac, kag si Israel, nga imo mga alagad, nga sa ila nagsumpa ka sa imo kaugalingon, kag nagsiling sa ila, ‘Pabuaron ko ang inyo mga kaliwatan subong sang mga bitoon sang langit, kag ihatag ko sa inyo mga kaliwatan ining bug-os nga duta nga akon ginsaad, kag panublion nila ini sing dayon.’”

14Kag ang Ginoo nagkalisud sang malaut nga iya ginsiling nga buut niya himoon sa iya katawohan.

15Kag si Moises nagbalik, kag nagdulhog sa bukid nga nagadala sa iya kamut sang duha ka tapitapi sang pagpamatuud, mga tapitapi nga nasulatan sa ila duha ka nawung; sa isa ka nawung kag sa pihak nasulatan sila.

16Kag ang mga tapitapi binuhat sang Dios, kag ang sulat sinulat sang Dios, nga natigib sa ibabaw sang mga tapitapi.

17Sang pagkabati ni Josue sang kinagahud sang katawohan sang nagasinggit sila, nagsiling sia kay Moises, “May kinagahud sang inaway sa dologan.”

18Apang nagsiling sia, “Indi ini sininggit sang pagdaug, ukon tingug sang mga ginadaug, kondi kinagahud sang mga nagaamba ang ginapamatian ko.”

19Kag sang malapit na sia sa dologan kag nakita ang tinday nga baka kag ang sinaut, nagdabdab ang kaakig ni Moises, kag ginpus-ang niya ang mga tapitapi gikan sa iya mga kamut kag naboong sila sa kunsaran sang bukid.

20Kag ginkuha niya ang tinday nga baka nga ila nahimo, kag ginsonog ini sa kalayo, kag ginbukbuk ini nga nanginpolbos, kag ginsabwag ini sa tubig, kag ginpainum ini sa katawohan sang Israel.

21Kag si Moises nagsiling kay Aaron, “Ano bala ang ginhimo sa imo sining katawohan nga gindala mo ang dakung sala sa ila?”

22Kag si Aaron nagsiling, “Dili magdabdab ang kaakig sang akon ginoo; ikaw nakakilala sang katawohan, nga nabuyo sila sa malaut.

23Kay sila nagsiling sa akon, ‘Himoi kami sing mga dios, nga magauna sa amon; kay nahanungud sining Moises, ang lalaki nga nagpagowa sa amon gikan sa duta sang Egipto, wala kami makahibalo kon ano ang nahanabu sa iya.’

24Kag nagsiling ako sa ila, ‘Ang bisan sin-o nga may bulawan paluson nila ini’; gani ginhatag nila ini sa akon, kag ginpilak ko ini sa kalayo, kag naggowa ining tinday nga baka.”

25Kag sang nakita ni Moises nga ang katawohan nabuhian (kay ginbuhian sila ni Aaron, nga ululigyaton sa ila mga kaaway),

26niyan si Moises nagtindug sa gawang sang dologan, kag nagsiling, “Ang bisan sin-o nga dampig sa Ginoo, magkari sia sa akon.” Kag ang tanan nga lalaki nga mga anak ni Levi nagtipon sila sing tingub sa iya.

27Kag nagsiling sia sa ila, “Amo ini ang ginasiling sang Ginoong Dios sang Israel, ‘Magtaklus ang tagsa ka tawo sang iya espada, kag magpakadto pakari sa gawang pa gawang sa bug-os nga dologan, kag patyon sang tagsa ka lalaki ang iya utud nga lalaki, kag sang tagsa ka lalaki ang iya kaupud, kag sang tagsa ka lalaki ang iya isigkatawo.’”

28Kag ginhimo sang mga anak ni Levi sono sa ginpamolong ni Moises; kag may nagkalamatay sa katawohan sadtong adlaw nga mga tatlo ka libo ka lalaki.

29Kag si Moises nagsiling, “Ihalad ang inyo kaugalingon karon nga adlaw sa pag-alagdan sang Ginoo, kay ang tagsa ka lalaki nagbatok sa iya anak nga lalaki kag nagbatok sa iya utud nga lalaki, agud nga sia maghatag sa inyo sing pagpakamaayo sining adlaw.”

30Sa adlaw nga madason nagsiling si Moises sa katawohan, “Nakasala kamo sing daku nga sala. Kag karon magataklad ako pakadto sa Ginoo; ayhan makahimo ako sing katumbasan tungud sa inyo sala.”

31Gani si Moises nagbalik sa Ginoo kag nagsiling, “O, ining katawohan nakasala sing daku nga sala; kag naghimo nga sa ila sing mga dios nga bulawan.

32Apang karon, kon patawaron mo ang ila sala—kag kon indi, panasa ako, ginaampo ko sa imo, sa imo tolon-an nga nasulat mo.”

33Apang ang Ginoo nagsiling kay Moises, “Ang bisan sin-o nga nakasala batok sa akon, sia panason ko sa akon tolon-an.

34Kag karon lakat ka, tuytuyi ang katawohan sa duug nga napamolong ko sa imo; yari karon, ang akon manugtunda magauna sa imo. Wala sing sapayan sa adlaw nga ako magduaw, paduawon ko sa ila ang ila mga sala.”

35Kag ang Ginoo nagpatay sang katawohan, bangud nga naghimo sila sang tinday nga baka nga nahimo ni Aaron.

← Chapter 31 Jump to: Chapter 33 →