Exodus 28

Ilonggo (Ang Biblia (1982))

← Chapter 27 Jump to: Chapter 29 →

1“Niyan papalapiton mo sa imo si Aaron nga imo utud, kag ang iya mga lalaking anak upud sa iya, gikan sa katawohan sang Israel, sa pag-alagad sa akon sa pagkasacerdote—si Aaron, si Nadab kag si Abiu, si Eleazar kag si Itamar, mga anak ni Aaron.

2Kag himoan mo sing balaan nga mga panapton si Aaron nga imo utud, nga sa himaya kag katahum.

3Kag magpamolong ka sa tanan nga but-anan, nga ginpuno ko sang espiritu sang kaalam, agud nga maghimo sila sang mga panapton ni Aaron sa pagpakabalaan sa iya agud nga mag-alagad sia sa akon sa pagkasacerdote.

4Ini sila amo ang mga panapton nga himoon nila: hapin sa dughan, kag isa ka efod, kag isa ka malaba nga bayo, kag bayo nga pinuna, isa ka turbante, kag isa ka wagkus; magahimo sila sing mga panapton nga balaan nga kay Aaron nga imo utud kag sa iya mga anak nga lalaki agud nga mag-alagad sila sa akon sa pagkasacerdote.

5“Magkuha sila sang bulawan, sang asul kag sang purpura kag sang escarlata, kag sang lino nga manipis nga binolong.

6Kag maghimo sila sang efod nga bulawan, nga asul kag purpura kag escarlata, kag lino nga manipis nga binolong, nga himo sang sampaton nga manugbuhat.

7May duha ka hombrera ini nga nagatambi sa duha ka pamusud sini, agud nga masugpon ini.

8Kag ang wagkus nga hinabol sing matahum gid nga yara sa sini, sa pagwagkus sini, manginkaangay sa sining buhat kag naunay, sa bulawan, sa asul kag purpura kag escarlata, kag lino nga manipis nga binolong.

9Kag magkuha ka sing duha ka batong onice, kag itigib sa ila ang mga ngalan sang mga anak sang Israel,

10ang anum sang ila mga ngalan sa isa ka bato, kag ang anum ka ngalan nga nabilin sa isa man ka bato, sono sa ila pagkatawo.

11Sa buhat sang manugtigib sa bato kaangay sang mga pagtigib sang singsing nga inugpat-in, patigban mo ang duha ka bato sono sa mga ngalan sang mga anak sang Israel; papalibutan mo sila sing mga engaste nga bulawan.

12Kag ibutang mo ang duha ka bato sa ibabaw sang mga hombrera sang efod, subong nga mga bato nga handumanan sang mga anak sang Israel; kag dalhon ni Aaron sa iya duha ka abaga ang mga ngalan nila nga handumanan sa atubangan sang Ginoo.

13Kag maghimo ka sing mga engaste nga bulawan,

14kag duha ka tinalikala nga ulay nga bulawan, himoon mo sila kaangay sang mga linubid nga linubag; kag itakud mo ang mga tinalikala nga linubag sa mga engaste.

15“Kag maghimo ka sang hapin sang paghukom sa dughan, ang himo sang sampaton nga manugbuhat; himoon mo ini kaangay sa pagbuhat sang efod; himoon mo ini sa bulawan, sa asul kag sa purpura kag sa escarlata, kag sa lino nga manipis nga binolong.

16Manginkasilo ini kag dubli, isa ka dangaw ang iya kalabaon kag isa ka dangaw ang iya kasangkaron.

17Kag takdan mo ini sing apat ka kubay nga mga bato. Isa ka kubay nga sardio, topacio, kag carbunclo manginnahaunang kubay;

18kag ang kubay nga ikaduha esmeralda, zafiro, kag diamante;

19kag ang kubay nga ikatlo jacinto, agata, kag ametista;

20kag ang kubay nga ikap-at berilo, kag onice, kag jaspe; libutan sila sing bulawan sa ila mga engaste.

21Ang mga bato manginsono sa mga anak sang Israel, napulog duha, sono sa mga ngalan nila; kaangay sa pagtigib sang singsing nga inugpat-in, ang tagsatagsa sono sa iya ngalan, ini sila manginsa napulo kag duha ka kabikahan.

22Kag maghimo ka sa hapin sa dughan sing mga tinalikala nga kaangay sang mga lubid, nga linubag nga bulawan nga ulay;

23kag maghimo ka sa hapin sa dughan sing duha ka singsing nga bulawan, kag itakud mo ang duha ka singsing sa duha ka pamusud sang hapin sa dughan.

24Kag itakud mo ang duha ka tinalikala nga bulawan sa duha ka singsing sa mga pamusud sang hapin sa dughan;

25ang duha ka ukbung sang duha ka linubag nga tinalikala itakud mo sa duha ka engaste, kag itakud sila sa mga hombrera sang efod, nayon sa atubangan niya.

26Kag maghimo ka sing duha ka singsing nga bulawan, kag itakud mo sila sa duha ka pamusud sang hapin sa dughan, sa iya sidsid, nga nayon sa kilid sang efod sa sulud.

27Kag maghimo ka sing duha ka singsing nga bulawan, kag itakud sila sa ibabaw sang duha ka hombrera sang efod nayon sa idalum, sa bahin nga sa atubangan sini malapit sa ila tinambihan sa ibabaw sang hinabol sing sinampaton nga wagkus sang efod.

28Kag ang hapin sa dughan ihigot sang laso nga asul sa iya mga singsing sa mga singsing sang efod, agud nga ini manginsa ibabaw sang hinabol sing sinampaton nga wagkus sang efod, kag agud nga indi mapalus sa efod ang hapin sa dughan.

29Gani si Aaron magadala sang mga ngalan sang mga anak sang Israel sa hapin sang paghukom sa dughan sa ibabaw sang iya tagiposoon, kon magsulud sia sa balaan nga puluy-an, nga handumanan nga dayon sa atubangan sang Ginoo.

30Kag ibutang mo sa sulud sang hapin sang paghukom sa dughan ang Urim kag ang Tumim, kag didto sila sa ibabaw sang tagiposoon ni Aaron, kon magsulud sia sa atubangan sang Ginoo kag dalhon ni Aaron ang paghukom sang katawohan sang Israel sa ibabaw sang iya tagiposoon sa atubangan sang Ginoo sing dalayon.

31“Kag maghimo ka sang malaba nga bayo sang efod nga bug-os nga asul.

32May liab sa olo sa tunga sini, ang liab may aporo nga hinabol sa palibut, subong nga daw liab sang limbutong, agud nga indi ini magisi.

33Sa mga sidsid sini himoan mo sing mga granada nga asul kag purpura kag escarlata, sa iya mga sidsid palibut, kag nagabal-ut sa ila ang mga kampanilya nga bulawan palibut,

34isa ka kampanilya nga bulawan kag isa ka granada, isa pa ka kampanilya nga bulawan kag isa ka granada, sa mga sidsid sang bayo nga malaba palibut.

35Kag isuklub ini kay Aaron sa pag-alagad, kag mabatian ang kilingkiling sini kon magsulud sia sa balaan nga duug sa atubangan sang Ginoo, kag kon maggowa sia, agud nga indi sia mapatay.

36“Kag maghimo ka sing isa ka pinanid nga bulawan nga ulay, kag itigib sa sini, kaangay sang mga tinigib sang singsing nga inugpat-in, ‘Balaan sa Ginoo.’

37Kag itakud ini sa turbante sa laso nga asul; ini manginsa atubangan sang turbante.

38Ini manginsa agtang ni Aaron, kag si Aaron magadala sang mga kalautan nga nahimo sa halad nga balaan nga pakabalaanon sang katawohan sang Israel subong nga ila mga dolot nga balaan; ini manginsa iya agtang sa gihapon, agud nga mahamut-an sila sa atubangan sang Ginoo.

39“Kag maghabol ka sing bayo nga pinilian nga lino nga manipis, kag maghimo ka sing turbante nga manipis, kag maghimo ka sing wagkus nga buhat sang manugborda.

40“Kag sa mga anak ni Aaron maghimo ka sing mga bayo kag mga wagkus kag mga gora; himoon mo sila nga sa himaya kag sa katahum.

41Kag isuklub mo sila kay Aaron nga imo utud, kag sa iya mga anak upud sa iya, kag haplason sila kag ihalad sila kag pakabalaanon sila, agud nga mag-alagad sila sa pagkasacerdote sa akon.

42Kag maghimo ka sa ila sing mga poroy nga lino sa pagtabon sang hublas nga unud; magalambut sila kutub sa hawak tubtub sa mga paa;

43kag isuklub sila ni Aaron, kag sang iya mga anak, kon magsulud sila sa layanglayang nga tiliponan, ukon kon magpalapit sila sa halaran sa pag-alagad sa balaan nga duug; agud nga indi sila magdala sing kalautan kag mapatay. Manginpalatukuran nga dayon ini sa iya kag sa iya mga kaliwatan sa olihi niya.

← Chapter 27 Jump to: Chapter 29 →