Exodus 18

Ilonggo (Ang Biblia (1982))

← Chapter 17 Jump to: Chapter 19 →

1Si Jetro, ang sacerdote sang Midian, ugangan ni Moises, nakabati sang tanan nga ginhimo sang Dios tungud kay Moises kag tungud sa Israel nga iya katawohan, kon paano nga ginpagowa sang Ginoo ang Israel sa Egipto.

2Karon si Jetro, ugangan ni Moises, nagkuha kay Zipora, asawa ni Moises, sa tapus nga ginpapauli niya sia,

3kag ang iya duha ka anak nga lalaki, nga ang isa sa ila ginhingalanan Gersom (kay nagsiling sia, “Nanginmanlulugayaw ako sa duta nga dumuloong”),

4kag ang isa ginhingalanan Eliezer (kay nagsiling sia, “Ang Dios sang akon amay kabulig ko, kag nagluwas sa akon sa espada ni Faraon”).

5Kag nag-abut si Jetro, ugangan ni Moises, upud ang iya mga anak kag asawa niya kay Moises sa kamingawan diin sia nagpahamtang sing dologan sa bukid sang Dios.

6Kag sang ginsugiran sang isa si Moises, “Yari karon ang imo ugangan nga si Jetro nagakari sa imo upud ang imo asawa kag ang iya duha ka anak nga lalaki upud sa iya,”

7si Moises naggowa sa pagbaton sa iya ugangan, kag nagyaub kag naghaluk sa iya; kag nagpamangkotanay sila sang ila kahimtangan, kag nagsulud sila sa layanglayang.

8Niyan ginsugid ni Moises sa iya ugangan ang tanan nga ginhimo sang Ginoo kay Faraon kag sa mga Egiptohanon tungud sang Israel, ang tanan nga kabudlayan nga nag-abut sa ila sa dalanon, kag kon paano ang pagluwas sa ila sang Ginoo.

9Kag nagkalipay si Jetro tungud sang tanan nga pagkaayo nga nahimo sang Ginoo sa Israel, nga naluwas niya sila sa kamut sang mga Egiptohanon.

10Kag si Jetro nagsiling, “Pakamaayohon ang Ginoo, nga nagluwas sa inyo sa kamut sang mga Egiptohanon kag sa kamut ni Faraon.

11Karon nakilala ko nga ang Ginoo labi pa kadaku sa tanan nga dios, bangud nga ginluwas niya ang katawohan sa idalum sang kamut sang mga Egiptohanon, sang nagpabugal sila batok sa ila.”

12Kag si Jetro, ugangan ni Moises, nagkuha sing halad-nga-sinonog kag mga halad nga sa Dios; kag si Aaron kag ang tanan nga tigulang sang Israel nag-abut sa pagkaon sing kalan-on upud sa ugangan ni Moises sa atubangan sang Dios.

13Sa madason nga adlaw si Moises naglingkod sa paghukom sa katawohan, kag ang katawohan nagtindug sa palibut ni Moises kutub sa aga tubtub sa kahaponon.

14Sang nakita sang ugangan ni Moises ang tanan nga ginhimo niya tungud sa katawohan, nagsiling sia, “Ano bala ining ginahimo mo tungud sa katawohan? Ngaa bala nga nagalingkod ka nga ikaw lamang, kag ang bug-os nga katawohan nagatindug sa palibut nimo kutub sa aga tubtub sa kahaponon?”

15Kag si Moises nagsiling sa iya ugangan, “Bangud nga ang katawohan nagakari sa akon sa pagpakisayud sa Dios;

16kon may kasaba sila, nagakari sila sa akon kag ako nagahukom sa tunga sang isa ka tawo kag sang iya isigkatawo, kag ginapakilala ko sila sang mga palatukuran sang Dios kag sang iya mga paghukom.”

17Ang ugangan ni Moises nagsiling sa iya, “Ang ginahimo mo indi maayo.

18Magaas-as kamo, ikaw kag ang katawohan upud sa imo, kay ang butang tama kabug-at sa imo; indi ka makasarang sa paghimo sini nga ikaw lamang.

19Pamatii karon ang akon tingug; ako magalaygay sa imo, kag ang Dios magaupud sa imo! Magmanugpangatubang ikaw sang katawohan sa Dios, kag magdala sang mga kasaba sa Dios;

20kag magtudlo ka sa ila sang mga palatukuran kag mga kasogoan, kag pakilalahon sila sang dalan nga dapat nila laktan kag sang dapat nila himoon.

21Labut pa magpangita ka sa tunga sang katawohan sing mga tawo nga sangkul, nga mahadlukon sa Dios, mga tawo nga maminatud-on nga nagadumut sang hamham; kag padumalahon sila sa katawohan subong nga mga manugdumala sang linibo, sang ginatus, sang kinalim-an, kag sang tagnapulo.

22Kag pahukma sila sa katawohan sa tanan nga tion; ang tagsa ka daku nga kasaba dalhon nila sa imo, apang ang tagsa ka kasaba nga magamay sila ila magahukom; sa sini magalabi kahapus sa imo, kag sila magadala sang lulan upud sa imo.

23Kon himoon mo ini, kag ang Dios nagasogo sing subong, niyan makabatas ka, kag ining bug-os nga katawohan magakadto sa ila duug sa paghidait.”

24Gani ginpamatian ni Moises ang tingug sang iya ugangan kag ginhimo ang tanan nga nasiling niya.

25Ginpili ni Moises ang mga lalaki nga sangkul sa bug-os nga Israel, kag ginbutang sila nga mga pangolo sang katawohan, mga manugdumala sang linibo, sang ginatus, sang kinalim-an, kag sang tagnapulo.

26Kag sila naghukom sang katawohan sa tanan nga tion; ang kasaba nga maiwat gindala nila kay Moises, apang ang tagsa ka magamay sila ila ang naghukom.

27Niyan gintugutan ni Moises sa pagpauli ang iya ugangan, kag nagkadto sia sa iya duta.

← Chapter 17 Jump to: Chapter 19 →