Exodus 26

Ilonggo (Ang Biblia (1982))

← Chapter 25 Jump to: Chapter 27 →

1“Labut pa maghimo ka sang kayangkayang nga may napulo ka kumbung nga lino na manipis nga binolong kag asul kag purpura kag escarlata; nga may mga querubin nga nahimo sing sampaton himoon mo sila.

2Ang kalabaon sang tagsa ka kumbung duha ka pulo kag walo ka maniko, kag ang kasangkaron sang tagsa ka kumbung apat ka maniko; isa lamang ka takus ang tanan nga kumbung.

3Ang lima ka kumbung tambihon sila; kag ang iban nga lima ka kumbung tambihon sila.

4Kag himoan mo sing mga sulusingsing nga asul ang kilid sang kumbung nga nahigad gid sa nahauna nga tinambitambi; kag subong man himoan mo sing mga sulusingsing ang kilid sang kumbung nga nahigad gid sa ikaduha nga tinambitambi.

5Himoan mo sing kalim-an ka sulusingsing ang isa ka kumbung, kag himoan mo sing kalim-an ka sulusingsing ang kilid sang kumbung nga sa ikaduha nga tinambitambi; ang mga sulusingsing magatunguray.

6Kag maghimo ka sing kalim-an ka kaw-it nga bulawan, kag tabiron ang mga kumbung ang isa sa isa sang mga kaw-it, agud nga mangin-isa ang kayangkayang.

7“Kag maghimo ka sing mga kumbung nga bulbul sang mga kanding nga layanglayang nga taklap sa kayangkayang; napulo kag isa kakumbung ang himoon mo.

8Ang kalabaon sang isa ka kumbung katloan ka maniko, kag ang kasangkaron sang isa ka kumbung apat ka maniko; isa lamang ka takus ang napulog isa ka kumbung.

9Kag tambihon mo ang lima ka kumbung sing pain, kag ang anum ka kumbung sing pain, kag paloyloyon mo ang ikan-um nga kumbung sa atubangan sang layanglayang.

10Kag himoan mo sing kalim-an ka sulusingsing ang kilid sang isa ka kumbung nga nahigad gid sang nahauna nga tinambitambi, kag kalim-an ka sulusingsing ang kilid sang kumbung nga nahigad gid sa ikaduha nga tinambitambi.

11“Kag maghimo ka sing kalim-an ka kaw-it nga saway, kag itakud ang mga kaw-it sa mga sulusingsing, kag tabiron ang layanglayang agud nga mangin-isa ini.

12Kag ang nagaloyloy nga bahin nga nabilin sang mga kumbung sang layanglayang, ang katunga sang kumbung nga nabilin, paloyloyon sa likod sang kayangkayang.

13Kag ang maniko sa isa ka kilid, kag ang maniko sa pihak nga kilid, sang nabilin sang kalabaon sang mga kumbung sang layanglayang paloyloyon sa duha ka kilid sang kayangkayang, sa pagtaklap sini.

14Kag himoan mo ang layanglayang sing taklap nga mga panit sang mga carnero nga lalaki nga nalugum sa mapula kag mga panit sang kanding.

15“Kag maghimo ka sing mga tapi sa patindug nga kahoy nga acasia nga sa kayangkayang.

16Napulo ka maniko ang kalabaon sang isa ka tapi, kag isa ka maniko kag tunga ang kasangkaron sang tagsa ka tapi.

17May duha ka diladila ang tagsa ka tapi, nga naangut ang isa sa isa; amo ini ang himoon mo sa tanan nga mga tapi sang kayangkayang.

18Himoon mo ang mga tapi sang kayangkayang: duha ka pulo ka tapi nga sa kilid nga nabagatnan;

19kag maghimo ka sing kap-atan ka boho nga palatindugan nga naaporohan sing pilak sa idalum sang duha ka pulo ka tapi, duha ka boho sa idalum sang isa ka tapi nga sa iya duha ka diladila, kag duha ka boho sa idalum sang isa pa ka tapi nga sa iya duha ka diladila;

20kag sa ikaduha nga kilid sang kayangkayang, sa kilid nga naaminhan, duha ka pulo ka tapi,

21kag ang ila kap-atan ka boho nga palatindugan nga naaporohan sing pilak, duha ka boho sa idalum sang isa ka tapi, kag duha ka boho sa idalum sang isa pa ka tapi;

22kag sa nalikod nga bahin sang kayangkayang nayon sa katundan himoan mo sing anum ka tapi.

23Kag himoan mo sing duha ka tapi nga sa mga pamusud sang kayangkayang nayon sa likod nga bahin;

24magbulagay sila sa sadsaran, apang tabiron sila tubtub sa ukbung, sa isa ka argolya; amo ini sa ila nga duha; sila manginsa duha ka pamusud.

25Kag may walo ka tapi, nga ang ila mga boho nga palatindugan naaporohan sing pilak, napulo kag anum ka boho; duha ka boho sa idalum sang isa ka tapi, kag duha ka boho sa idalum sang isa pa ka tapi.

26“Kag maghimo ka sing mga balabag nga kahoy nga acasia, lima nga sa mga tapi sang isa ka kilid sang kayangkayang,

27kag lima ka balabag nga sa mga tapi sang pihak nga kilid sang kayangkayang, kag lima ka balabag nga sa mga tapi sa kilid sang kayangkayang sa likod nga bahin nayon sa katundan.

28Ang balabag nga natunga magaagi sa tunga sang mga tapi gikan sa isa ka pamusud tubtub sa isa.

29Taklapan mo ang mga tapi sing bulawan, kag himoan mo sing mga argolya nga bulawan nga goloan sang mga balabag; kag taklapan mo ang mga balabag sing bulawan.

30Kag patindugon ang kayangkayang sono sa huwaran sini nga napakita ko sa imo sa bukid.

31“Kag maghimo ka sing kumbung nga asul kag purpura kag escarlata kag lino nga manipis nga binolong; himoon ini nga may mga querubin nga himo sang sampaton nga manugbuhat;

32kag bitayon mo ini sa ibabaw sang apat ka haligi nga acasia nga taklapan sing bulawan, ang ila mga panga bulawan, nga nagatindug sa apat ka boho nga palatindugan nga naaporohan sing pilak.

33Kag bitayon mo ang kumbung sa mga kaw-it, kag dalhon mo didto sa sulud sang kumbung ang kaban sang pagpamatuud; kag ang kumbung magapain sang duug nga balaan gikan sa labi gid kabalaan sa inyo.

34Itongtong mo ang pakilooyan sa kaban sang pagpamatuud sa duug nga labi gid kabalaan.

35Kag ipahamtang mo ang latok sa gowa sang kumbung, kag ang candelero sa atubangan sang latok sa kilid nga nabagatnan sang kayangkayang; kag ibutang mo ang latok sa kilid nga naaminhan.

36“Kag maghimo ka sing lipon nga sa ganhaan sang layanglayang, nga asul kag purpura kag escarlata kag lino nga manipis nga binolong, ang buhat sang manugborda.

37Kag maghimo ka nga sa lipon sing lima ka haligi nga acasia, kag taklapan sila sing bulawan; ang ila mga panga bulawan, kag magbasia ka nga sa ila sing lima ka boho nga palatindugan nga naaporohan sing saway.

← Chapter 25 Jump to: Chapter 27 →

Recommended Reading

Commentary Exodus Commentaries → Devotional Exodus Devotional Guide → Get This Bible 1982 Study Bible →