Exodus 4

Ilonggo (Ang Biblia (1982))

← Chapter 3 Jump to: Chapter 5 →

1Niyan si Moises nagsabat, “Apang yari karon, indi sila magpati sa akon ukon magpamati sa akon tingug, kay magasiling sila, ‘Wala magpahayag sa imo ang Ginoo.’”

2Ang Ginoo nagsiling sa iya, “Ano bala ina sa imo kamut?” Nagsiling sia, “Isa ka sungkud.”

3Kag sia nagsiling, “Ihaboy ini sa duta.” Gani ginhaboy niya ini sa duta, kag nahimo nga man-ug; kag si Moises nagpalagyo gikan sini.

4Apang ang Ginoo nagsiling kay Moises, “Untaya ang imo kamut, kag kapti ini sa ikog”—gani gin-untay niya ang iya kamut kag ginkaptan ini kag nahimo nga sungkud sa iya kamut—

5“agud nga magpati sila nga nagpahayag sa imo ang Ginoo, ang Dios sang iba mga ginikanan, ang Dios ni Abraham, ang Dios ni Isaac, kag ang Dios ni Jacob.”

6Sa liwat, ang Ginoo nagsiling sa iya, “Isuksuk ang imo kamut sa imo dughan.” Kag ginsuksuk niya ang iya kamut sa iya dughan; kag sang pagkuha niya sini, yari karon, ang iya kamut nag-aroon, subong kaputi sang nieve.

7Niyan ang Dios nagsiling, “Isuksuk liwat ang imo kamut sa imo dughan.” Gani ginsuksuk niya liwat ang iya kamut sa iya dughan; kag sang ginkuha niya ini sa iya dughan, yari karon, nag-uli ini subong sang iya unud.

8“Kon indi sila magpati sa imo,” ang Dios nagsiling, “ukon magpamati sa nahaunang tanda, magapati sila sa naolihing tanda.

9Kon indi pa sila magpati sa sining duha ka tanda ukon indi magpamati sang imo tingug, magkuha ka sing tubig sang Nilo, kag iula ini sa mamalang duta; kag ang tubig nga ginakuha mo sa Nilo mangindugo sa duta nga mamala.”

10Apang si Moises nagsiling sa Ginoo, “O, Ginoo ko, indi ako madagmit maghambal, bisan tubtub karon ukon kutub sang pagpamolong mo sa imo alagad; kondi makuli ako sa paghambal kag mabug-at sing dila.”

11Niyan ang Ginoo nagsiling sa iya, “Sin-o bala ang naghimo sang baba sang tawo? Sin-o bala ang nagahimo sa iya nga apa, ukon bungul, ukon makakita, ukon bulag? Indi bala ako, ang Ginoo?

12Busa karon lakat ka, kag magaupud ako sa imo baba kag magatudlo sa imo sang imo ihambal.”

13Apang nagsiling sia, “O, Ginoo ko, ginaampo ko, ipadala ang iban nga tawo.”

14Niyan ang kaakig sang Ginoo nagdabdab batok kay Moises kag nagsiling sia, “Wala bala dira si Aaron, nga Levinhon, nga imo utud? Nakahibalo ako nga sia makahambal sing maayo; kag yari karon, nagakari sia sa pagpakigkita sa imo, kag kon makita niya ikaw magakalipay sia sa iya tagiposoon.

15Kag ikaw magpamolong sa iya kag magbutang sa iya baba sang mga polong; kag magaupud ako sa imo baba kag sa iya baba, kag magatudlo sa inyo sang himoon ninyo.

16Sia ang imo manughambal sa katawohan; kag sia manginbaba sa imo, kag ikaw manginsubong sang Dios sa iya.

17Kag dalhon mo ining sungkud sa imo kamut, nga sa sini magahimo ka sang mga tanda.”

18Si Moises nagbalik kay Jetro nga iya ugangan kag nagsiling sa iya, “Tuguti ako, ginaampo ko, sa pagbalik sa akon kahimataan sa Egipto kag sa pagtan-aw kon buhi pa sila.” Kag si Jetro nagsiling kay Moises, “Lakat ka sa paghidait.”

19Kag ang Ginoo nagsiling kay Moises sa Midian, “Balik sa Egipto; kay patay na ang tanan nga nagatinguha sang imo kabuhi.”

20Gani ginkuha ni Moises ang iya asawa kag ang iya mga anak nga lalaki kag ginpasakay sila sa asno, kag nagbalik sia sa duta sang Egipto; kag gindala ni Moises ang sungkud sang Dios sa iya kamut.

21Kag ang Ginoo nagsiling kay Moises, “Kon makabalik ka na sa Egipto, tan-awa nga himoon mo sa atubangan ni Faraon ang tanan nga katingalahan nga ginbutang ko sa imo kamut; apang patig-ahon ko ang iya tagiposoon, agud nga indi niya pagtugutan nga maglakat ang katawohan.

22Kag magsiling ka kay Faraon, ‘Amo ini ang ginasiling sang Ginoo, Ang Israel akon anak nga panganay,

23kag nagasiling ako sa imo, “Tuguti sa paglakat ang akon anak agud nga mag-alagad sia sa akon”; kon magdumili ka sa pagpalakat sa iya, yari karon, patyon ko ang imo anak nga lalaki nga panganay. ’”

24Sa dalayonan sa dalanon ang Ginoo nagsugata sa iya kag nagtinguha sa pagpatay sa iya.

25Niyan si Zipora nagkuha sing santikan kag gin-utud ang napunta nga panit sang iya anak nga lalaki, kag gintandug sini ang mga tiil ni Moises, kag nagsiling, “Sa pagkamatuud dugoon nga kalaslon nga lalaki ikaw sa akon,”

26Gani ginpabay-an niya sia. Niyan nagsiling sia, “Dugoon nga kalaslon ikaw sa akon,” bangud sang circuncision.

27Ang Ginoo nagsiling kay Aaron, “Lakat ka sa pagsugata kay Moises sa kamingawan.” Gani sia naglakat, kag ginsugata sia sa bukid sang Dios kag ginhalukan sia.

28Kag ginsugid ni Moises kay Aaron ang tanan nga polong sang Ginoo nga sa amo ginpadala niya sia, kag ang tanan nga tanda nga gintulin niya sa iya nga himoon.

29Niyan naglakat si Moises kag si Aaron kag gintipon ang tanan nga tigulang sang katawohan sang Israel.

30Kag ginpamolong ni Aaron ang tanan nga polong nga ginpamolong sang Ginoo kay Moises, kag naghimo sang mga tanda sa itololok sang katawohan.

31Kag ang katawohan nagpati; kag sang nabatian nila nga ang Ginoo nagduaw sa katawohan sang Israel kag nga nakita niya ang ila kapipit-an, nagyaub sila kag nagsimba.

← Chapter 3 Jump to: Chapter 5 →