Exodus 3

Ilonggo (Ang Biblia (1982))

← Chapter 2 Jump to: Chapter 4 →

1Karon si Moises nagpahalab sang panong ni Jetro nga iya ugangan nga lalaki, ang sacerdote sang Midian; kag gindala niya ang panong sa nakatundan sang kamingawan, kag nag-abut sa bukid sang Dios, sa Horeb.

2Kag nagpahayag sa iya ang manugtunda sang Ginoo sa dabdab sang kalayo sa tunga sang sapinit; kag sia nagtolok, kag yari karon, ang sapinit nagdabdab sing kalayo, apang ang sapinit wala maupus.

3Kag si Moises nagsilling, “Magalipas ako kag tan-awon ining daku nga talan-awon, ngaa ang sapinit wala masonog.”

4Sang nakita sang Ginoo nga naglipas sia sa pagtan-aw, ang Dios nagtawag sa iya gikan sa sapinit, “Moises, Moises!” Kag nagsiling sia, “Yari ako.”

5Niyan nagsiling sia, “Dili ka magpalapit diri; huksa ang imo mga sapin sa imo mga tiil, kay ang duug nga ginatindugan mo dutang balaan.”

6Kag nagsiling sia, “Ako ang Dios sang imo amay, ang Dios ni Abraham, ang Dios ni Isaac, kag ang Dios ni Jacob.” Kag si Moises nagtabon sang iya nawung, kay nahadluk sia sa pagtolok sa Dios.

7Niyan nagsiling ang Ginoo, “Nakita ko ang kapipit-an sang akon katawohan nga yara sa Egipto, kag nabatian ko ang ila pagtuaw bangud sang ila mga agalon sa pangabudlay; nahibaloan ko ang ila mga kasubu,

8kag nagapanaug ako sa pagluwas sa ila gikan sa kamut sang mga Egiptohanon, kag sa pagpagowa sa ila gikan sinang duta sa pagpataklad sa ila sa isa ka dutang maayo kag malapad, sa duta nga nagailig sing gatas kag dugus, sa duug sang mga Canaanhon, sang mga Hethanon, sang mga Amornon, sang mga Pereznon, sang mga Hevhanon, kag sang mga Jebusnon.

9Kag karon, tan-awa, ang pagtuaw sang katawohan sang Israel nag-abut sa akon, kag nakita ko ang pagpigus nga ginpigus sa ila sang mga Egiptohanon.

10Kari, ipadala ko ikaw kay Faraon agud nga mapagowa mo ang akon katawohan, mga anak sang Israel, gikan sa Egipto.”

11Apang si Moises nagsiling sa Dios, “Sin-o bala ako nga magkadto ako kay Faraon, kag magpagowa ako gikan sa Egipto sang mga anak sang Israel?”

12Sia nagsiling, “Apang magaupud ako sa imo; kag ini mangintanda sa imo, nga napadala ko ikaw: kon mapagowa mo na ang katawohan gikan sa Egipto, magaalagad kamo sa Dios sa sining bukid.”

13Niyan si Moises nagsiling sa Dios, “Kon ako mag-abut sa katawohan sang Israel kag magsiling sa ila, ‘Ang Dios sang inyo ginikanan nagpadala sa akon sa inyo,’ kag sila magpamangkot sa akon, ‘Sin-o bala ang iya ngalan?’ ano bala ang isiling ko sa ila?”

14Ang Dios nagsiling kay Moises, “AKO AMO AKO.” Kag nagsiling sia, “Amo ini ang isiling mo sa katawohan sang Israel, ‘Si AMO AKO nagpadala sa akon sa inyo.’”

15Ang Dios nagsiling man kay Moises, “Isiling ini sa katawohan sang Israel, ‘Ang Ginoo, ang Dios sang inyo ginikanan, ang Dios ni Abraham, ang Dios ni Isaac, kag ang Dios ni Jacob, nagpadala sa akon sa inyo’: ini amo ang akon ngalan sa gihapon, kag ini amo ang akon handumanan sa tanan nga kaliwatan.

16Lakat kag tipona ang mga tigulang sang Israel, kag isiling sa ila, ‘Ang Ginoo, ang Dios sang inyo mga ginikanan, ang Dios ni Abraham, ni Isaac, kag ni Jacob, nagpahayag sa akon, nga nagasiling, “Napanilagan ko kamo kag ang ginhimo sa inyo sa Egipto;

17kag nagasaad ako nga pagowaon ko kamo gikan sa kapipit-an sang Egipto, pakadto sa duta sang mga Canaanhon, sang mga Hethanon, sang mga Amornon, sang mga Pereznon, sang mga Hevhanon, kag sang mga Jebusnon, sa duta nga nagailig sing gatas kag dugus.” ’

18Kag magapamati sila sa imo tingug; kag ikaw kag ang mga tigulang sang Israel magkadto sa hari sang Egipto kag magsiling sa iya, ‘Ang Ginoo, ang Dios sang mga Hebreo, nagpakigkita sa amon; kag karon, ginaampo namon sa imo, palakta kami sing tatlo ka adlaw nga lalakton sa kamingawan, agud nga maghalad kami sa Ginoo nga amon Dios.’

19Ako nakahibalo nga ang hari sang Egipto indi magtugut nga maglakat kamo, kon indi paagi sa kamut nga gamhanan.

20Gani untayon ko ang akon kamut kag laglagon ang Egipto sang tanan nga katingalahan nga himoon ko sa tunga niya; ugaling palakton kamo niya.

21Kag hatagan ko ining katawohan sing kahamuut sa itololok sang mga Egiptohanon; kag kon maglakat kamo, indi kamo maglakat nga wala sing dala,

22kondi magapangayo ang tagsa ka babayi sa iya kaiping, kag sa nagadapon sa iya balay, sing mga huluyason nga pilak kag bulawan, kag mga panapton, kag ibutang ninyo sila sa inyo mga anak nga lalaki kag sa inyo mga anak nga babayi; sa amo hublasan ninyo ang mga Egiptohanon.”

← Chapter 2 Jump to: Chapter 4 →