Exodus 2

Ilonggo (Ang Biblia (1982))

← Chapter 1 Jump to: Chapter 3 →

1Karon may isa ka lalaki sa panimalay ni Levi nga naglakat kag nagpangasawa sa anak ni Levi.

2Ang babayi nanamkon kag nag-anak sing lalaki; kag sang nakita niya nga sia maayoayo, gintago niya sia sing tatlo ka bulan.

3Kag sang indi na sia matago niya nagkuha sia sing isa ka takupis nga papiro, kag gingalagalahan ini sing asfalto kag balaw; kag ginsulud niya sa sini ang bata kag ginbutang ini sa kabagaasan sa bibi sang suba.

4Kag nagtindug sa malayo ang iya utud nga babayi, sa pagtan-aw sang mahanabu sa iya.

5Karon ang babaying anak ni Faraon nagdulhog sa pagpaligos sa suba, kag ang iya mga kadalagahan nagadayandayan sa pangpang sang suba; nakita niya ang takupis sa kabagaasan kag ginpadala ang iya alagad nga babayi sa pagkuha sini.

6Sang ginbuksan niya ini nakita niya ang bata; kag yari karon, ang bata nagahibi. Nalooy sia sa iya kag nagsiling, “Ini isa sang kabataan sang Hebreo.”

7Niyan ang iya utud nga babayi nagsiling sa babaying anak ni Faraon, “Magalakat bala ako sa pagtawag nga sa imo sing isa ka sisiwa sang mga babayi nga Hebreo agud nga mabatiti niya ang bata tungud sa imo?”

8Kag ang babaying anak ni Faraon nagsiling sa iya, “Lakat.” Gani naglakat ang dalaga kag gintawag ang iloy sang bata.

9Kag ang anak ni Faraon nagsiling sa iya, “Dalha ining bata, kag batiti-a sia tungud sa akon, kag ako magasohol sa imo.” Gani ginkuha sang babayi ang bata kag ginbatiti sia.

10Kag nagtubo ang bata, kag gindala sia sa anak ni Faraon, kag nangin-anak sia niya; kag ginhingalanan sia niya Moises, kay sia nagsiling, “Bangud nga ginkuha ko sia sa tubig.”

11Sang isa ka adlaw, sang daku na si Moises, nagkadto sia sa iya katawohan kag nagtan-aw sa ila mga lulan; kag nakita niya ang isa ka Egiptohanon nga nagabakol sang isa ka Hebreo, isa sang iya katawohan.

12Nagpangholongholong sia, kag sang nakita niya nga wala sing tawo ginpatay niya ang Egiptohanon kag gintago sia sa balas.

13Sang madason nga adlaw naggowa sia, yari karon, duha ka lalaki nga Hebreo nagaaway; kag nagsiling sia sa naghimo sang sayup, “Ngaa bala nga ginasakit mo ang imo isigkatawo?”

14Nagsabat sia, “Sin-o bala ang naghimo sa imo nga principe kag hukom sa amon? Naga-hunahuna ka bala sa pagpatay sa akon subong sang pagpatay mo sang Egiptohanon?” Niyan ginhadlukan si Moises, kag naghunahuna, “Sa pagkamatuud nasapwan ang butang.”

15Sang nakabati si Faraon sini, gintinguhaan niya sa pagpatay si Moises. Apang si Moises nagpalagyo gikan kay Faraon, kag nagpuyo sa duta sang Midian; kag naglingkod sia sa luyo sang bobon.

16Karon ang sacerdote sang Midian may pito ka anak nga babayi; kag nag-abut sila kag nagsag-ub sing tubig, kag nagpuno sang mga palaimnan sa pagpainum sang panong sang ila amay.

17Nag-abut ang mga manugpahalab kag gintabog sila; apang si Moises nagtindug kag nag-apin sa ila, kag nagpainum sang ila panong.

18Sang nagpauli sila kay Reuel nga ila amay, nagsiling sia, “Paano bala nga nag-abut kamo sing madali karon nga adlaw?”

19Nagsiling sila, “Isa ka Egiptohanon nagluwas sa amon sa kamut sang mga manugpahalab, kag ginsag-uban pa niya kami kag ginpainum ang panong.”

20Nagsiling sia sa iya mga anak nga babayi, “Kag diin bala sia? Ngaa bala nga ginbayaan ninyo ang tawo? Tawga sia, agud nga magkaon sia.”

21Kag si Moises nagsugut sa pagpuyo upud sa lalaki, kag ginpaasawa niya kay Moises ang iya anak nga si Zipora.

22Kag nag-anak sia sing lalaki kag ginhingalanan niya sia Gersom; kay nagsiling sia, “Nagmanlulugayaw ako sa dutang dumuloong.”

23Sang nagligad yadtong madamu nga adlaw napatay ang hari sang Egipto. Kag ang katawohan sang Israel nagpanghayhay bangud sang kahiolipnan, kag nagtuaw sila, kag naglambut sa Dios ang pagtuaw nila bangud sang kahiolipnan.

24Kag nabatian sang Dios ang pag-ugayong nila, kag ang Dios nagdumdum sang iya katipan kay Abraham, kay Isaac, kag kay Jacob.

25Kag nakita sang Dios ang katawohan sang Israel, kag nahibal-an sang Dios ang ila kahimtangan.

← Chapter 1 Jump to: Chapter 3 →